بۇگىن قر پرەمەر-ءمينيسترى باقىتجان Cاعىنتاەۆتىڭ توراعالىعىمەن وتكەن ۇكىمەتتىڭ كەزەكتى وتىرىسىندا ءتيىستى مينيسترلىكتەر ازىرلەگەن ەكى بىردەي باعدارلاما تانىستىرىلدى.
پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ 2017-2021 جىلدارعا ارنالعان اگروونەركاسىپ كەشەنىن دامىتۋ باعدارلاماسىن ۇسىندى. بۇل باعدارلامانىڭ ماقساتى – ەلىمىزدىڭ ازىق-ت ۇلىك قاۋىپسىزدىگىن قامتاماسىز ەتۋ جانە اۋىلشارۋاشىلىق ونىمدەرىنىڭ ەكسپورتىن ۇلعايتۋ, باسەكەگە قابىلەتتى اگروونەركاسىپ كەشەنىن قالىپتاستىرۋ بولىپ تابىلادى.
مينيستر اتاپ وتكەندەي, باعدارلامانى جۇزەگە اسىرۋ ناتيجەسىندە قازاقستان حالقى ءۇشىن اۋىل شارۋاشىلىعى سالاسى نەگىزگى كىرىس كوزىنە اينالۋعا ءتيىس.
2021 جىلعا قاراي اۋىل شارۋاشىلىعى ونىمدەرىنىڭ جالپى جيىنى 30%-عا 1 ترلن تەڭگەگە نەمەسە 3,3 ترلن تەڭگەدەن 4,3 ترلن تەڭگەگە دەيىن ۇلعايتۋ جوسپارلانۋدا. سونىمەن قاتار, ەڭبەك ونىمدىلىگىن 50%-عا 1,2 ملن تەڭگەدەن 1,9 ملن تەڭگەگە ارتتىرۋ, ەكسپورت 17%-عا 2,1 ملرد-2,5 ملرد اقش دوللارىنا دەيىن, جانە يمپورت كولەمىن 17%-عا 3,4 ملرد-2,8 ملرد اقش دوللارىنا دەيىن تومەندەتۋ كوزدەلىپ وتىر. ناتيجەسىندە سۋارمالى جەرلەردىڭ ۇلەسىن 40%-عا ياعني, 1,4 ملن گا 2 ملن گا دەيىن ارتىپ, وسىنىڭ ناتيجەسىندە كىرىس 30 ەسەگە دەيىن كوبەيەدى.
2017-2021 جىلدارداعى جاڭا اوك دامىتۋ مەملەكەتتىك باعدارلاماسىن تالقىلاۋعا اقتوبە وبلىسىنىڭ اكىمى بەردىبەك ساپارباەۆ, الماتى وبلىسىنىڭ اكىمى اماندىق باتالوۆ, «تايىنشا-استىق» جشس باس ديرەكتورى اناتولي رافالسكي, «رزا» اق پرەزيدەنتى سامۇرات يماندوسوۆ, «اگروترەيدينگ» جشس ديرەكتورى سەرگەي ميلەنكو, «اگروترەيدينگ» ديرەكتورلار كەڭەسىنىڭ توراعاسى دين كيم قاتىستى.
قر پرەمەر-ءمينيسترى باقىتجان ساعىنتاەۆ مينيسترلەر كابينەتىنە اوك دامىتۋ مەملەكەتتىك باعدارلاماسى بويىنشا ازىرلىك جۇمىستارىن جىل سوڭىنا دەيىن اياقتاۋدى تاپسىردى.
«ايتىلعان ەسكەرتۋلەر مەن ۇسىنىستاردى نازارعا الا وتىرىپ, باعدارلاما جوباسىن ماقۇلداۋدى جانە جىل سوڭىنا دەيىن مەملەكەتتىك ورگاندارمەن, اكىمدىكتەرمەن, بيزنەس قاۋىمداستىقتارمەن كەلىسىلگەن سوڭ بەكىتۋگە شىعارۋدى ۇسىنامىن. كەلەسى جىلى ءبىز جاڭا باعدارلاما بويىنشا جۇمىس ىستەۋدى باستاۋىمىز كەرەك»,-دەدى پرەمەر.
قر پرەزيدەنتى ن.نازارباەۆتىڭ تاپسىرماسى بويىنشا اگرارلىق سەكتوردى جەدەل دامىتۋ مىندەتى العا قويىلعانى بەلگىلى. وسىعان بايلانىستى ەل ۇكىمەتى 2017-2021 جىلدارعا ارنالعان اگروونەركاسىپ كەشەنىن دامىتۋ مەملەكەتتىك باعدارلاماسىن ازىرلەدى. سونىڭ ناتيجەسىندە تاياۋ بەس جىل ىشىندە اۋىل شارۋاشىلىعى ونىمدەرىن ءوندىرۋ مەن وڭدەۋ ەكونوميكانى ءارتاراپتاندىرۋ مەن ءوسىمنىڭ نەگىزگى درايۆەرى بولۋعا ءتيىس.
سونداي-اق, ۇكىمەت وتىرىسىندا دەنساۋلىق ساقتاۋ جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى تۋرالى باياندادى.
مينيستر اتاپ وتكەندەي, بۇل باعدارلامانىڭ نەگىزگى ماقساتى – ءوزىن-ءوزى جۇمىسپەن قامتىعانداردى, جۇمىسسىزداردى جانە وزگە دە بىلىكتىلىگى جوق تۇلعالاردى ءونىمدى جۇمىسقا تارتۋ ەكەنىن جەتكىزدى. جاڭا باعدارلاما 15 پەن 45 جاس ارالىعىنداعى ايىنا 60 مىڭنان تومەن تابىس تاباتىن ءوزىن-ءوزى جۇمىسپەن قامتىعاندارعا, جۇمىسسىزدارعا جانە كاسىپتىك بىلىكتىلىگى جوق تۇلعالارعا جۇمىس تابۋعا نەمەسە جاڭا ماماندىقتى مەڭگەرۋگە كومەكتەسۋگە ءتيمىس.
باعدارلاما 550 مىڭعا جۋىق ادامدى قامتيدى دەپ كۇتىلۋدە. ولاردىڭ 84 %-ى اۋىل تۇرعىندارى ەكەنىن ايتا كەتۋ كەرەك.
مەملەكەت باسشىسى نۇرسۇلتان نازارباەۆتىڭ تاپسىرماسىمەن قر ۇكىمەتى ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ جاڭا باعدارلاماسىن ازىرلەگەن بولاتىن. باعدارلامانىڭ ماقساتى ناتيجەلى جۇمىسپەن قامتۋعا جاعداي جاساۋ ارقىلى حالىققا ءوز تابىستارىن ارتتىرۋعا مۇمكىندىك بەرۋ بولىپ تابىلادى.
«ەگەر ءبىز بۇرىن «جۇمىسپەن قامتۋدىڭ جول كارتاسى 2020» باعدارلاماسى بويىنشا ۋاقىتشا جۇمىس ورىندارىنا كوڭىل بولىنسە, ەندى وقىتۋ ارقىلى تەك قانا تۇراقتى جۇمىس ورىندارىنا كوڭىل بولىنەدى. ەڭ باستىسى, ادامدارعا ءوز ىستەرىن اشۋعا جانە جاڭا جۇمىس ورىندارىن قالىپتاستىرۋعا مۇمكىندىك بەرەمىز. جاۋاپتى ورگاندار انىقتالدى, وكىلەتتىلىكتەر بەرىلدى, ولاردىڭ اراسىندا جەرگىلىكتى اتقارۋشى ورگاندار بار»,-دەدى پرەمەر-مينيستر جاڭا باعدارلاما تۋرالى. پرەمەر-مينيستر وسى باعدارلاما بويىنشا بارلىق ازىرلىك جۇمىستارىن اياقتاپ, ونى 15 جەلتوقسانعا دەيىن ۇكىمەتكە بەكىتۋگە ۇسىنۋدى تاپسىردى.
ارنۇر اسقار,
"ەگەمەن قازاقستان".