سونىمەن, فەرمەرلەرگە اۋىل شارۋاشىلىعى كووپەراتيۆتەرىنە كىرۋدىڭ ارتىقشىلىعى نەدە؟ بۇل تۋرالى بۇگىن ۇكىمەت وتىرىسىندا پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ باياندادى.
ا.مىرزاحمەتوۆتىڭ ايتۋىنشا, ەلىمىزدىڭ ءاربىر فەرمەرى اۋىل شارۋاشىلىعى كووپەراتيۆى ارقىلى مەملەكەتتىك قولداۋ تابا الادى. ال كووپەراتيۆتەردى تەحنيكالىق جاعىنان جابدىقتاۋ «كازاگرو» ۇبح ارقىلى جۇزەگە اسىرىلادى. جقش بويىنشا ۆەتەرينارلىق, اگروحيميالىق, قارجىلىق, جانە ءونىمدى وتكىزۋ بويىنشا كەتكەن شىعىندارى كووپەراتيۆتەردى سۋبسيديالاۋ بويىنشا بەرىلەدى. «اۋىل شارۋاشىلىعى كووپەراتيۆىن دامىتساق, 500 مىڭ ۇساق ءوندىرۋشىنى تارتۋ جانە ونىمدەردى وتكىزۋ مەن وڭدەۋدىڭ پارمەندى جۇيەسىن قۇرا الامىز جانە شيكىزاتپەن قامتاماسىز ەتەتىن كاسىپورىنداردىڭ ۇلەسى 1,3 ەسەگە ارتادى», – دەدى مينيستر.
سونىمەن قاتار, اۋىل شارۋاشىلىعى كووپەراتسياسىن دامىتۋ بارىسىندا اۋىل تۇرعىندارىنىڭ كىرىسىن جىل سايىن 300 ملرد تەڭگەگە دەيىن ارتتىرۋ جانە ساۋدانىڭ ۇستەمە باعاسىن 15-20%-عا تومەندەتۋ كوزدەلىپ وتىر.
ويلاپ قاراساك, جىل سايىن 300 ملرد تەڭگە اۋىلدارعا قوسىمشا كىرىس رەتىندە كىرىپ وتىرسا, بۇل كورسەتكىش بولىنگەن سۋبسيديا كولەمىنەن ەكى ەسەگە ارتىق.
سونىمەن قاتار, كووپەراتيۆتەر وزدەرىنىڭ ۇلەسكەرلەرىنە, ياعني قوسالقى شارۋاشىلىق پەن ۇساق شارۋا قوجالىقتارىنا ۆەتەرينارلىق, اگروحيميالىق, تەحنيكالىق قىزمەت كورسەتۋ جانە جەم دايىنداۋ بويىنشا بىرنەشە قىزمەتتەر كورسەتە الادى.
مىسالى, اۋىل ادامدارىنىڭ مالى ءۇشىن ءشوپ قاجەت بولدى دەلىك. ونىڭ قۇنى جازعى ۋاقىتتا 20 مىڭ تەڭگەگە, كۇزدە 30 مىڭ تەڭگە, قىستا 40 مىڭ تەڭگەگە دەيىن قىمباتتايدى. ال كووپەراتيۆ مەملەكەتتىڭ قولداۋىمەن ليزينگ ارقىلى ساتىپ الىنعان تراكتور, ءشوپ شاباتىن ماشينا, تىركەمەلەردى پايدالانىپ, ارزان باعامەن شوپپەن قامتاماسىز ەتە الادى. كووپەراتيۆ اۋىل تۇرعىندارىن ءبىر ورتالىقتان قۇراما ازىقپەن قامتاماسىز ەتەدى.
كووپەراتسيانىڭ تاعى ءبىر ارتىقشىلىعى – اگرووندىرىستىك ماقساتتا جانە اۋىل شارۋاشىلىعىنا قاتىستى ەمەس بيزنەس تۇرلەرىن (مونشا, شاشتاراز جانە ت.ب) اشۋعا نەسيە بەرۋ قاراستىرىلعان. سونىمەن قاتار, كووپەراتيۆ ارقىلى كۇندەلىكتى تۇتىناتىن نەسيە الۋعا دا بولادى. اۋىل تۇرعىندارىنا نەسيە الۋ ءۇشىن بانككە نەمەسە اۋدان ورتالىعى مەن وبلىستارعا بارىپ ءجۇرۋدىڭ قاجەتى بولمايدى.
دينارا بىتىكوۆا,
«ەگەمەن قازاقستان»