ءدىن تاقىرىبىن جازاتىن جۋرناليستەر باس قوستى

جۋىردا وسكەمەندە قازاقستان مۇسىلماندارى ءدىني باسقارماسىنىڭ وسكەمەن ايماعى وكىلدىگىنىڭ مۇرىندىق بولۋىمەن «ادامگەرشىلىك قۇندىلىقتاردى ناسيحاتتاۋداعى باق-تىڭ ءرولى» تاقىرىبىندا ءى رەسپۋبليكالىق جۋرناليستەر فورۋمى ءوتتى. تاعىلىمدى شاراعا قمدب-عا قاراستى ەلىمىزدىڭ بارلىق وڭىرلەرىندەگى ءباسپاسوز حاتشىلارى, جۋرناليستەر, عالىمدار, ءدىني بىرلەستىك جەتەكشىلەرى, جاس­تار مەن ايماقتىڭ يمامدارى قاتىستى. – سوڭعى جىلدارى عالام­تور بەتتەرىندە, اقپارات قۇرال­دارىندا ۇنەمى بولماسا دا, ارا-تۇرا اسىل دىنىمىزگە نۇقسان كەلتىرەتىن ۇشقارى وي-پىكىرلەر مەن ءارتۇرلى ماقالالار جاريا­لانىپ ءجۇر. مۇنىڭ ءبارى ءبىل­مەستىكتەن, دۇرىس ءتۇسىن­بە­گەن­دىكتەن تۋىندايتىنى بەل­گىلى. سوندىقتان ءدىن تاقى­رىبىن جاز­عاندا جۋرناليستەر قاۋىمى ەلىمىزدە ءدىني الاۋىزدىق تۋدىرمايتىنداي, كەرىسىنشە ەلدىڭ بىرلىگىن بەكەمدەپ, جۇرت­تى يماندىلىققا, ىزگىلىككە شاقى­راتىن دۇنيەلەرگە كوبىرەك قالام سىلتەسە دەگەن ىزگى نيەتپەن ۇيىمداستىرىپ وتىرمىز بۇل شارانى, – دەدى قمدب وسكەمەن ايماعىنىڭ وكىل يمامى, وبلىستىق «حاليفا التاي» مەشىتىنىڭ باس يمامى ەرمەك مۇ­قاتاي فورۋمدى اشقان سوزىندە. فورۋمدا بايانداما جاساعان قازاقستان مۇسىلماندارى ءدىني باسقارماسىنىڭ ءباسپاسوز ءبولىمىنىڭ باسشىسى اعابەك سىدىقوۆ جۋرناليستەر ءدىن تاقىرىبىن قاۋزاعاندا سەنساتسيا ىزدەگەننەن گورى, جۇرتقا تاعىلىم-تاربيە, ۇلگى-ونەگە بەرەتىن دۇنيەلەرگە كوڭىل بولسە, بۇل ماسەلەگە بايىپتىلىقپەن, سالماقتىلىقپەن, جاۋاپكەر­شىلىكپەن قاراسا دەگەن تىلەگىن جەتكىزدى. – انىق-قانىعىنا كوز جەت­كىزىلمەي, اسىعىستىقپەن, قالاي بولسا سولاي جاريالاناتىن ماتەريالدار كوبەيدى. ماسەلەن, «مەشىتتە اياق كيىم ۇرلاندى», «مولدا اقشا سۇرادى», «مە­شىتتە توبەلەس شىقتى» دەگەن سەكىلدى اقپاراتتاردى جۇرتتان ءسۇيىنشى سۇراعانداي اپىل-عۇپىل جاريالاۋعا اسىعاتىن ءارىپ­تەستەرىمىزدىڭ قاتارى ازايماي تۇر. «وتىز تىستەن شىق­قان ءسوز وتىز رۋلى ەلگە تارايدى» دەگەندەي, بۇدان كەيىن بۇل اقپاراتتى قانشا جەردەن تەرىسكە شىعارساڭ دا, حالىق اراسىندا العاشقى ەستىگەن نەمەسە وقىعان اقپارات قالىپ قويادى. كەيىن ءجۇز دالەل كەلتىرسە دە, سول ادام تۋرالى قوعامدا تەرىس پىكىر قالىپتاسادى. ءدىن – نازىك تاقىرىپ. ونى رەي­تينگ كوتەرۋ باعىتىندا پاي­دا­لانباعانىمىز ابزال, – دەپ پىكىرىن بىلدىرگەن ول ءدىن تاقى­رىبىن جازاتىن جۋرناليستەر ماقالالارىن جاريا­لاماس بۇرىن باسقارماعا جۇگىنسە, دەگەن ۇسىنىسىن جەتكىزدى. سون­داي-اق, ول وسى تاقى­رىپتا قالام تەربەيتىن جۋر­ناليستەردىڭ كا­سىپتىك ەتيكاسى تۋرالى كودەكس قا­بىلدانسا, جو­عارى وقۋ ورىندارىندا ءدىني تاقىرىپتاردا قوسىمشا دارىستەر وقىلىپ, ارنايى فاكۋلتاتيۆتەر اشىلسا دەگەن سياقتى بىرقاتار تىلەگىن ايتتى. وزەكتى ماسەلە توڭىرەگىندە اڭگىمە وربىگەن جيىنعا وڭىردەگى وزگە ءدىننىڭ وكىلدەرى دە قاتىسىپ, وي-پىكىرلەرىن ورتاعا سالدى. – بۇگىندە ءدىني ەكسترەميزم پروبلەماسى وزەكتى. ەل بولىپ شاما-شارقىمىزشا وعان قارسى كۇرەسىپ جاتىرمىز. ەش­بىر مەملەكەت بۇل قاۋىپتەن ساقتان­دىرىلماعان. ۇرپاق ءوسىپ كەلەدى. كوبىنىڭ «رۋحاني ۇس­تازى» دا, تاربيەلەيتىن «اكە-شەشەسى» دە – تەلەديدار بولىپ تۇر. وندا كورسەتىلەتىنى – ىلعي قانتوگىس, ساتقىندىق. بالا تەلەديداردان كورگەنىن ىستەيدى. سوندىقتان ۇرپاق تاربيەسىنە زيالى قاۋىم, قالام يەلەرى, ءدىن وكىلدەرى دە بەلسەنە ارالاسۋى كەرەك. ويتكەنى, بالانىڭ بولا­شاعى – ەل بولاشاعى, – دەدى وسكەمەن شىركەۋىنىڭ ءدىن قىز­مەتشىسى كونستانتين دياكوۆ. ازامات قاسىم, «ەگەمەن قازاقستان» وسكەمەن سۋرەتتى تۇسىرگەن عىلىمبەك ءسابيتوۆ