بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن پالاتانىڭ اعىمداعى جىلعى سوڭعى جالپى وتىرىسىندا حالىق قالاۋلىلارى «كوللەكتورلىق قىزمەت تۋرالى» جانە وعان ىلەسپە زاڭ جوباسىن ءبىرىنشى وقىلىمدا ماقۇلدادى, دەپ حابارلادى ءماجىلىستىڭ ءباسپاسوز قىزمەتى.
2012 جىلى ەلباسى تاۋەكەلدەر كونتراكتسياسىن تاۋەلسىز باعالاۋ ينستيتۋتتارىن جانە كوللەكتورلىق اگەنتتىكتەردى ودان ءارى دامىتۋ تۇجىرىمداماسىن بەكىتتى. وندا ازاماتتاردىڭ قۇقىقتارىن قورعاۋ ءۇشىن كوللەكتورلىق قىزمەتتى مەملەكەت تاراپىنان رەتتەۋ بەلگىلەنگەن. الايدا, بايانداماشى قر ۇلتتىق بانكى توراعاسى دانيار اقىشەۆتىڭ ايتۋىنشا, ول وسى ۋاقىتقا دەيىن ءالى جاسالعان جوق. كوللەكتورلىق كومپانيالار ءبىراز ۋاقىتتان بەرى جۇمىس ىستەپ كەلە جاتسا دا, ولاردىڭ قىزمەتى زاڭمەن رەتتەلمەيدى جانە مەملەكەت تاراپىنان باقىلانبايدى.
قازىرگى كەزدىڭ وزىندە شامامەن 60 كومپانيا بانكتەرمەن جاساسقان شارتتار نەگىزىندە بەرەشەكتى ءوندىرىپ جاتىر. بانكتەردىڭ 928 مىڭ بورىشكەرى كوللەكتورلىق اگەنتتىكتەردىڭ ءوندىرىپ الۋ پروتسەسىندە. حالىقتىڭ نەسيەلىك بورىشى وتە جوعارى. سوندىقتان, ۇسىنىلىپ وتىرعان زاڭ جوباسى كوللەكتورلىق قىزمەتتەر نارىعىن دامىتۋ, بورىشكەرلەر مەن كرەديتورلاردىڭ قۇقىقتارى مەن مۇددەلەرىن قورعاۋ, كوللەكتورلىق اگەنتتىكتەر قىزمەتىنىڭ اشىقتىعىن كۇشەيتۋ, بەرەشەگىن ءوندىرىپ الۋ بويىنشا جۇمىستا تيىمدىلىكتى جانە قاۋىپسىزدىكتى ارتتىرۋدى قامتاماسىز ەتەدى. وسى باعىتتا ۇلتتىق بانك زاڭ جوباسىنىڭ نورمالارىن جۇزەگە اسىرۋعا جانە زاڭ جوباسى قابىلدانعان ساتتەن باستاپ قازاقستان ازاماتتارىن الەۋمەتتىك قولداۋدى جانە كوللەكتورلىق اگەنتتىكتەردى باقىلاۋدى جەدەل قولعا الۋعا دايىن.
وسى كۇنى ەكولوگيالىق ماسەلەلەرگە تۇزەتۋلەرگە بايلانىستى زاڭ جوباسى دا دەپۋتاتتار قولداۋىنا يە بولدى. ول قازاقستان رەسپۋبليكاسىنىڭ قولدانىستاعى ەكولوگيالىق زاڭناماسىن جەتىلدىرۋ جانە قۇقىق قولدانۋ پراكتيكاسى پروتسەسىندە انىقتالعان قۇقىقتىق كولليزيالاردى جويۋ ماقساتىندا ازىرلەنگەن. سونداي-اق زاڭ جوباسىندا ەكولوگيالىق كودەكستىڭ كەيبىر نورمالارىن قولدانىسقا ەنگىزۋدىڭ بىرىڭعاي مەرزىمىن بەلگىلەۋ ۇسىنىلادى.