قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ «اياز اتاعا حات جاز» جوباسىن قولدادى, دەپ حابارلايدى اقوردانىڭ ءباسپاسوز قىزمەتى الەۋمەتتىك جەلىدە.
بەلگىلى بولعانداي, 2014 جىلدان بەرى «قازپوشتا» اق جۇزەگە اسىرىپ جاتقان اتالمىش جوبا اياسىندا ءاربىر ادام كەلىپ, بالالاردىڭ حاتىن تاڭداپ الىپ, ولاردىڭ تىلەكتەرىن ورىنداۋعا بولادى. وسىمەن ەكىنشى جىل قاتارىنان مەملەكەت باسشىسى وسى جوباعا قولداۋ كورسەتىپ, جاس قازاقستاندىقتاردىڭ ارماندارىن ورىنداۋدا.
بيىل نۇرسۇلتان نازارباەۆ پاۆلودارلىق ارداق شالاباەۆتىڭ اياز اتاعا جازعان حاتىنداعى «ەكسپو-2017» كورمەسىنە بيلەت سۇراعان تىلەگىن ورىندادى.
كەلەر جىلدىڭ باستى وقيعالارىنىڭ ءبىرى حالىقارالىق كورمەنى جوعارى دارەجەدە وتكىزۋ بولىپ تابىلادى. وسىعان وراي, مەملەكەت باسشىسى 11 جاسار ارداقتى قۋانتقىسى كەلىپ, استاناداعى ەكسپو-عا 4 بيلەت سىيلادى.
اتىراۋ وبلىسى ماحامبەت اۋدانىنداعى ارنايى مەكتەپ-ينتەرناتىنىڭ تاربيەلەنۋشىسىنە ەلباسى ءوزى ۇيرەنۋگە ارنالعان تىگىن ماشيناسىن, سونداي-اق دوپتار, راكەتكالار مەن باسقا دا سپورتتىق زاتتاردى سىيعا تارتتى. قىزىلوردا قالاسى تاسبوگەنت كەنتىندەگى 6 جاسار نۇريسلام سەرىكوۆتىڭ دە حاتى جاۋاپسىز قالمادى. ەلباسى وعان بالالار ادەبيەتى مەن «لەگو» كونسترۋكتورىن سىيلاۋدى ۇيعاردى.
جالپى, «اياز اتاعا حات جاز» ناۋقانى جاڭا جىل قارساڭىنداعى جاس قازاقستاندىقتاردىڭ تىلەكتەرىن ورىنداۋعا زور مۇمكىندىك تۋدىرۋدا. كوپتەگەن قازاقستاندىقتار مەملەكەت باسشىسىنان ۇلگى الىپ, مىڭداعان بالاقايدىڭ ارماندارىن ورىندايدى دەگەن ۇمىتتەمىز.
ايتا كەتەيىك, اتالمىش جوبانىڭ الەۋمەتتىك ماڭىزى زور. سەبەبى, ءبىزدىڭ ازاماتتارعا از قامتىلعان وتباسىلاردان شىققان, مۇگەدەك جانە جەتىم بالالاردىڭ تىلەكتەرىن ورىنداۋلارىنا بولادى.