قازاقستان رەسپۋبليكاسى ۇلتتىق بانكى توراعاسىنىڭ ورىنباسارى ولەگ سمولياكوۆ "قازينۆەستبانك" اق-تى بانكتىك جانە وزگە دە وپەراتسيالاردى جانە باعالى قاعازدار نارىعىنداعى قىزمەتتى جۇزەگە اسىرۋعا بەرىلگەن ليتسەنزيادان ايىرۋعا بايلانىستى تۇسىنىكتەمە بەردى, - دەپ حابارلايدى بانكتىڭ ءباسپاسوز قىزمەتى.
ايتۋلارىنشا, ءبىرىنشى كەزەكتە, بۇل كرەديتتەۋ كەزىندە تاۋەكەلدەردى باعالاۋ مەن باسقارۋ بويىنشا ءالسىز ىشكى ساياسات پەن راسىمدەر. مۇنداي قىزمەت ساپالى كەپىلدەرمەن قامتاماسىز ەتىلمەگەن نەسيە پورتفەلى كرەديتتىك تاۋەكەلدەرىنىڭ قارقىندى وسۋىنە اكەلدى. اتاپ ايتقاندا, كەپىلدەر نەگىزىنەن ناقتى اكتيۆتەرمەن ەمەس, بولاشاقتا تۇسەتىن اقشامەن جانە م ۇلىكپەن ۇسىنىلعان. بۇل بانكتىڭ پورتفەلىندەگى وسىنداي قارىزداردىڭ ۇلەسى 80 پايىزدان استام قۇرايدى. سونىمەن بىرگە 50 پايىز قارىز بويىنشا قارىز الۋشىلارعا جەڭىلدىكتى تالاپتار بەرۋ فاكتىلەرى قارىزدى وتەۋ بويىنشا جەڭىلدىكتى كەزەڭ ۇسىنۋ, سول سياقتى وتەۋ مەرزىمدەرىن جاپپاي ۇزارتۋ تۇرىندە بايقالعان.
سونىمەن قاتار, كرەديتتىك تاۋەكەلدەردى باسقارۋ جونىندەگى ىشكى راسىمدەردەگى كەمشىلىكتەر ورنىقسىز قارجىلىق جاعدايى, مىسالى, تەرىس مەنشىكتى كاپيتالى, جيناقتالعان شىعىنداردىڭ جوعارى مولشەرى بار قارىز الۋشىلاردى, بەرىلەتىن كرەديتتەردىڭ سومالارىنا سايكەس كەلمەيتىن بيزنەستى جۇرگىزۋ كىرىستەرى مەن اۋقىمدارى بار قارىز الۋشىلاردى كرەديتتەۋگە مۇمكىندىك بەرگەنى ايتىلادى.
"بانكتىڭ نەسيە پورتفەلىنىڭ جارتىسىنان استامىن قۇراعان قارىزداردى ىرىكتەپ تالداۋ ناتيجەلەرىنە نەگىزدەلگەن ەڭ تومەن باعالاۋ بويىنشا, پروۆيزيالاردى (رەزەرۆتەردى) قوسىمشا قالىپتاستىرۋ بويىنشا الەۋەتتى شىعىندار 30 ملرد. تەڭگەدەن استام قۇرايدى, ولاردى بىرجولعى تانۋ 20,6 ملرد. تەڭگە مولشەرىندەگى تەرىس كاپيتالدىڭ تۋىنداۋىنا اكەلەدى", - دەلىنگەن حابارلامادا.
ەكىنشىدەن, بانكتى ليتسەنزيادان ايىرۋ تۋرالى شەشىم قابىلدانعان ساتتە كوررەسپوندەنتتىك شوتتارداعى جانە كاسساداعى اقشا قالدىعى 1,9 ميلليارد تەڭگە بولعانى ايتىلادى. ال سول ساتتە كەيىنگە قالدىرىلعان تولەمدەر سوماسى شامامەن 20 ميلليارد تەڭگە بولىپتى.
ناتيجەسىندە بانك 2016 جىلعى 14 جەلتوقساننان باستاپ تولەمدەردىڭ ورىندالماۋ فاكتىلەرىنە جول بەرگەن. بارلىعى 230 ميلليون تەڭگەدەن استام سوماعا 50-دەن استام تولەم قۇجاتى ورىندالماعان.
بۇدان باسقا, ۇلتتىق بانك بانكتىڭ قىزمەتىن قاداعالاۋ شەڭبەرىندە ۇزاق ۋاقىت بويى بانك مەنەدجمەنتىمەن جانە ونىڭ اكتسيونەرلەرىمەن اشىق سۇحبات جۇرگىزىپ, بانك كاپيتالىنىڭ قابىلدانعان تاۋەكەلدەرگە بارابار بولماۋى جانە وتىمدىلىكتىڭ تومەن كورسەتكىشتەرى جاعدايلارىندا بانككە قارجىلىق قولداۋدى قامتاماسىز ەتۋدەگى شۇعىل قاجەتتىلىكتى بەلگىلەدى. سوعان قاراماستان, بانكتى بارابار قايتا كاپيتالداندىرۋ ۋاقتىلى جۇزەگە اسىرىلعان جوق, ال ۇلتتىق بانكتىڭ كرەديتتەۋدىڭ ىشكى ساياساتىن جانە راسىمدەرىن وزگەرتۋ بويىنشا تالاپتارى ۋاقتىلى ورىندالماعان.
ۇلتتىق بانك باسقارماسى نەسيە پورتفەلىنىڭ جوعارى كرەديتتىك تاۋەكەلدەرى جانە بانكتىڭ مەنەدجمەنتىمەن جانە اكتسيونەرلەرىمەن سۇحبات جۇرگىزۋدىڭ سىندارلى ناتيجەلەرىنىڭ بولماۋى فاكتىلەرىن نازارعا الا وتىرىپ, بانكتى ليتسەنزياسىنان ايىرۋ جانە بانككە ۋاقىتشا اكىمشىلىكتى ەنگىزۋ تۋرالى شەشىم قابىلدادى.
"بانك اۋقىمىنىڭ شامالى ەكەندىگىن اتاپ وتكەن ماڭىزدى, بانكتىڭ بانك جۇيەسىنىڭ اكتيۆتەرى مەن مىندەتتەمەلەرى بويىنشا ۇلەسى نەبارى شامامەن 0,7 پايىزدى قۇرايدى. ۇلتتىق بانك جەكە تۇلعا سالىمشىلارعا تەڭگەمەن جانە شەتەل ۆاليۋتاسىمەن دەپوزيتتەردىڭ, تولەم كارتوچكالارىنداعى جانە بانك شوتتارىنداعى اقشانىڭ قازاقستاننىڭ دەپوزيتتەرگە كەپىلدىك بەرۋ قورىنىڭ (بۇدان ءارى - قدكق) كەپىلدىگىمەن قورعالعانىن تاعى دا ەسكە سالادى, ياعني سوت بانكتى ماجبۇرلەپ تاراتۋ تۋرالى ودان ءارى شەشىم قابىلداعان جاعدايدا قدكق جەكە تۇلعا سالىمشىلارعا كەپىلدىكتى وتەماقى تولەمدەرىن جۇزەگە اسىرادى.
كەپىلدىكتىڭ ەڭ جوعارى شەگى مىناداي:
- تەڭگەمەن دەپوزيتتەر بويىنشا - 10 ميلليون تەڭگەگە دەيىن;
- شەتەل ۆاليۋتاسىمەن دەپوزيتتەر بويىنشا - 5 ميلليون تەڭگەگە دەيىن.
وتەماقىنىڭ الەۋەتتى سوماسى 768 ملن. تەڭگەنى قۇرايدى. قدكق-نىڭ كەپىلدىكتى وتەماقىنى تولەۋگە ارنالعان قاراجاتى 500 ملرد. تەڭگە بولادى. ياعني سالىمشىلاردىڭ بارلىق دەپوزيتتەرى كەپىلدىك بەرىلەتىن سوما شەگىندە تولىق كولەمدە قاناعاتتاندىرىلادى", - دەلىنگەن ءباسپاسوز حابارلاماسىندا.