31 جەلتوقسان كۇنى ساعات 21:00-دەن 03:00-گە دەيىن «حان شاتىر» ساۋدا, ويىن-ساۋىق ورتالىعى جانىنداعى مۇز قالاشىقتا قازاقستاندىق ەسترادا جۇلدىزدارىنىڭ قاتىسۋىمەن شوۋ-باعدارلاما مەن كونتسەرت وتەدى. بۇل تۋرالى استانا قالاسى اكىمدىگىنىڭ ءباسپاسوز قىزمەتى حابارلادى.
ەلوردادا جاڭا جىل ءتۇنى ايقىن تولەپبەرگەن, ءالي وقاپوۆ, مارجان اراپباەۆا, اعايىندى جۇگىنىسوۆتەر, «وردا» توبى, «دابىل» توبى جانە تاعى دا باسقا ارتىستەر ونەر كورسەتەدى. ەلىمىزدىڭ باس شىرشاسىنىڭ جانىندا اشىلعان مۇز قالاشىعىندا كەلۋشىلەردى كوپ قىزىق كۇتەدى. سونىمەن قاتار, جاڭا جىل ءتۇنى مەرەكەلىك وتشاشۋ ۇيىمداستىرىلادى.
"2017 جىلى وتشاشۋ ەلوردانىڭ ءۇش اۋدانىندا - «حان شاتىر» سوسو جانىندا, ەسىل وزەنىنىڭ جاعالاۋىندا, سونداي-اق ابىلاي حان داڭعىلى مەن ا.پۋشكين كوشەسىنىڭ قيىلىسىنداعى ساياباعىندا بولادى", - دەلىنگەن حابارلامادا. سونىمەن قاتار كونكي تەبۋدى ۇناتاتىن جاندار ءۇشىن جاعالاۋداعى جاڭا جىل ءتۇنى ەرەكشە بولماق. مۇندا قالا تۇرعىندارى ءۇشىن جاپپاي كونكي تەبۋ ۇيىمداستىرىلادى.