پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «كوللەكتورلىق قىزمەت تۋرالى» زاڭ جوباسىن ءبىرىنشى وقىلىمدا ماقۇلدادى, دەپ حابارلايدى قازاقپارات. «كوللەكتورلىق كومپانيالار كوپتەن بەرى پايدا بولىپ, ومىرىمىزگە كەڭىنەن ەندى, بىراق ولاردىڭ قىزمەتى زاڭمەن رەتتەلمەيدى جانە مەملەكەت تاراپىنان باعالانبايدى. قازىرگى كەزدىڭ وزىندە شامامەن 60 كومپانيا بانكتەرمەن جاساسقان شارتتار نەگىزىندە بەرەشەكتى ءوندىرىپ جاتىر. بانكتەردىڭ 928 مىڭ بورىشكەرى كوللەكتورلىق اگەنتتىكتەردىڭ ءوندىرىپ الۋ ۇدەرىسىندە. حالىقتىڭ نەسيەلىك بورىشى وتە جوعارى. وسى جاعدايدا بورىشتى ءوندىرىپ الۋ بويىنشا قاتىناستاردىڭ رەتتەلمەۋ پروبلەمالارىنىڭ اۋقىمى بولاشاقتا وسەدى. قازاقستاندا 5 ملن. ادامنىڭ بانكتىك قارىز شارتى بار», – دەدى د. اقىشەۆ.
زاڭ جوباسىندا بەرەشەگىن ءوندىرىپ الۋ بويىنشا جۇمىستا تيىمدىلىكتى جانە قاۋىپسىزدىكتى ارتتىرۋ, بورىشكەرلەردىڭ قۇقىقتارى مەن مۇددەلەرىن كوللەكتورلىق اگەنتتىكتەردىڭ زاڭسىز ارەكەتتەرىنەن قورعاۋ, كوللەكتورلىق قىزمەتتىڭ اشىقتىعىن ارتتىرۋ مەن ونى رەتتەۋ, تۇرعىنداردىڭ سەنىمىن جوعارىلاتۋ تەتىكتەرى ەسكەرىلگەن. سونىمەن قاتار, وندا كوللەكتورلىق قىزمەتتى جۇزەگە اسىرۋ بارىسىندا تۋىندايتىن قوعامدىق قاتىناستار رەتتەلەدى.