1999 جىلى ەلىمىزدەگى مەكتەپ جاسىنا دەيىنگى بالالاردىڭ 10,2 پايىزى عانا بالاباقشاعا بارسا, ەلباسى تاپسىرماسىمەن قولعا الىنعان باعدارلامالار ناتيجەسىندە بالاباقشامەن قامتىلعان بالالاردىڭ ۇلەسى سوڭعى 6 جىلدا 8 ەسە ءوسىپ, بۇگىندە 81,6 پايىزعا جەتتى.
2010 جىلى ىسكە قوسىلىپ, مەكتەپكە دەيىنگى ءبىلىم بەرۋ ىسىنە جاڭاشا سەرپىن بىتىرگەن «بالاپان» باعدارلاماسىنىڭ العاشقى قارلىعاشتارىنىڭ ءبىرى قاراعاندى وبلىسىنىڭ بۇقار جىراۋ اۋدانىنا قاراستى دوسكەي اۋىلىنداعى «اقبوتا» بوبەكجاي-بالاباقشاسى.
قاراعاندى وبلىستىق ءۇش تىلدىلىك «جول كارتاسىنا» اۋدانىمىز بويىنشا ەنگەن جالعىز بالاباقشا دا بۇگىندە تاربيەلەنۋشىلەر مەن بىرگە تاربيەشىلەر دە ورىس, قازاق, اعىلشىن تىلدەرىن مەڭگەرىپ, ءتىل ساباقتارىن تەرەڭدەتىپ وقيدى.
- ءبىلىم بەرۋ ستاندارتتارى بويىنشا ءبىزدىڭ بالاباقشا بۇلدىرشىندەردى ءبىرىنشى سىنىپقا ەمەس, دايارلىق سىنىپتارىنا دايىندايتىنىن ەسكەرسەك, ولار اعىلشىن تىلىندەگى ارىپتەردىڭ ايتىلۋىن, ساناۋدى ۇيرەنەدى, ياعني ءۇش تىلدە تاقپاقتار جاتتاپ, ءتىل ماشىعىن قالىپتاستىرادى, - دەيدى, «اقبوتا» بالاباقشاسىنىڭ مەڭگەرۋشىسى زاۋرەش وماروۆا.
جاس ۇرپاقتىڭ ەل بولاشاعىنا تىكەلەي اسەر ەتەتىندىگىن كوكىرەك كوزىمەن تۇيسىنەتىن ۇجىم 2012 جىلدان بەرى «ەتنومادەنيەت – ءتۇرلى مادەنيەتتەردى تانىتۋ قۇرالى رەتىندە» جوباسىن قولعا الىپ, ەتنومادەني مۇراجاي كابينەتىن اشقان. وندا قازاق, نەمىس, ۋكراين, تاتار, شەشەن, وزبەك, ورىس سياقتى ءتۇرلى ۇلتتاردىڭ مادەني جانە تاريحي قۇندىلىقتارىن تىزگەن كورمە جاساقتالعان. شاعىن مۇراجايعا جاڭادان كەلگەن كىشكەنتاي بۇلدىرشىندەر ءۇشىن ەكسكۋرسيالار جاساقتالىپ, ۇلتتىق قۇندىلىقتارىمىز كورنەكى تۇردە ناسيحاتتالىپ كەلەدى.
ايتا كەتۋ كەرەك, قۇرىلعانىنا از عانا ۋاقىت وتسە دە, «اقبوتا» ءوزىنىڭ ادىستەمەسىن داڭعىل جولعا قويعان. وسى ۋاقىت ىشىندە نىسان مەڭگەرۋشىسى زاۋرەش وماروۆا مەن ادىسكەر ايگۇل قالماعانبەتوۆانىڭ اۆتورلىعىمەن بىرنەشە باسپا كىتاپتار, سونىڭ ىشىندە «ماڭگىلىك ەل - قازاقستان» ادىستەمەلىك نۇسقاۋلىعى جارىق كورگەن. بۇنىڭ بارلىعى مەكتەپكە دەيىنگى زاماناۋي ءبىلىم بەرۋ تالاپتارىن جۇزەگە اسىرۋعا باعىتتالعان.
ەكى جاقتى ءتيىمدى جۇمىستى جۇزەگە اسىرۋ ءۇشىن وبلىس بويىنشا ۇيىمداستىرىلعان «جاس اتا-انا» جوباسىنا بارلىق اۋدان بالاباقشالارى قاتىستىرىلسا, سولاردىڭ ءبىرى «اقبوتا».
- قازىرگى تاڭدا بۇقار جىراۋ اۋدانى بويىنشا جەتى بالاباقشا بۇلدىرشىندەردى تاربيەلەسە, ولاردىڭ بەسەۋى ارالاس, بىرەۋى قازاق جانە بىرەۋى ورىس تىلىندە تاربيە جۇرگىزەدى. سونىمەن قاتار, اۋىل تۇرعىندارىنىڭ سۇرانىستارىن قامتاماسىز ەتۋ جانە مەكتەپكە دەيىنگى بالالاردىڭ ۋاقىتىن ۇيىمداستىرۋ, تاربيە بەرۋ ماقساتىندا مەكتەپ قابىرعالارىندا 41 شاعىن ورتالىق جۇمىس جاسايدى, - دەيدى اۋداندىق ءبىلىم بەرۋ ءبولىمىنىڭ باس مامانى جانار قيقىمبەكوۆا.
سونىمەن قاتار, ماماننىڭ ايتۋىنشا كەلەر جىلى اۋدانعا قاراستى بوتاقارا اۋىلىندا 90 بالاعا جانە دۋبوۆكا اۋىلدارىندا 160 بالاعا ارنالعان بۇرىنعى بالاباقشا عيماراتتارىنا رەكونسترۋكتسيا جاساپ, اشۋ جوسپاردا بار. تەك ۋاقىت پەن قارجى ەنشىسىندەگى ماسەلە بولىپ وتىر. ال وتكەن جىلى اشىلعان بايمىرزا اۋىلىنداعى 140 بالاعا ارنالعان بالاباقشا ءوزىنىڭ تاربيەلەنۋشىلەرىن جيناپ, جۇمىسىن جولعا قويۋدا.
نازەركە ابىكەەۆا
قاراعاندى وبلىسى, بۇقار جىراۋ اۋدانى