اتىراۋ وبلىسى پروكۋراتۋراسىنىڭ باستاماسىمەن تۇرعىنداردىڭ قاۋىپسىزدىگىن قامتاماسىز ەتۋ ماقساتىندا ۆەدوموستۆوارالىق جۇمىسشى توبى قۇرىلدى. ونىڭ قۇرامىندا قۇقىق قورعاۋ ورگاندارىنىڭ قىزمەتكەرلەرى, دارىگەر, پسيحولوگ, تەولوگ ماماندار, كاسىپكەرلەر, مەملەكەتتىك قىزمەتشىلەر مەن الەۋمەتتىك سالا ماماندارى بار. وبلىس پروكۋرورى عالىمجان توعىزباەۆ جەتەكشىلىك ەتەتىن 45 ادامنان تۇراتىن توپ جۇمىسىن جىلىوي اۋدانىنان باستادى. اتالعان توپ ماقات, يندەر جانە ماحامبەت اۋداندارىندا دا بولىپ, 14 مىڭنان استام حالىقتى قامتىعان 182 شارا وتكىزدى.
توپ دەنساۋلىق ساقتاۋ, ءبىلىم بەرۋ, ەڭبەك جانە الەۋمەتتىك قورعاۋ سالالارى بويىنشا كەڭ اۋقىمدى اقپاراتتىق-ءتۇسىندىرۋ جۇمىستارىن جۇرگىزدى. اسىرەسە ەكسترەميزم مەن تەرروريزمگە قارسى كۇرەس باعىتىندا دىنگە ايرىقشا ماڭىز بەرىلدى. وسىنداي شارالاردىڭ ناتيجەسىندە 631 ادامعا مەديتسينالىق كومەك كورسەتىلدى. ونىڭ ىشىندە 250 ناۋقاسقا دياگنوز قويىلىپ, ەم تاعايىندالدى.
تابىستى بيزنەس – ايماقتىڭ, جالپى ەلىمىزدىڭ ەكونوميكالىق تۇرعىدا دامۋىنىڭ نەگىزگى وزەگى. اتالعان توپ بيزنەستىڭ تۇرلەرى, ولاردى قارجىلاي جانە مەملەكەت تاراپىنان كورسەتىلەتىن قولداۋدى ءتۇسىندىرۋ ماقساتىندا جۇيەلى جۇمىس جاساۋدا. بيزنەس باستامالار تۋرالى اقپاراتتار اۋىل اكىمدەرىنە جەتكىزىلۋدە, ولاردى وقىتىپ جاتىر. وسىنداي كەشەندى شارالاردىڭ يگى ناتيجەسى بايقالادى. 22 كاسىپكەرگە مەملەكەتتىك ورگانداردىڭ تاراپىنان قولداۋ كورسەتىلدى. ماسەلەن, جىلىوي اۋدانىنىڭ تۇرعىنىنا بيزنەسىن دامىتۋ ءۇشىن قايتارىمسىز نەگىزدە تىگىن جابدىعى بەرىلدى. كاسىپكەرلىككە كەدەرگى كەلتىرەتىن قيىندىقتار (نەسيە بەرۋ, بىلىكتىلىكتى ارتتىرۋ, بيزنەس نەگىزى, ت.ب.), وزگە دە ماسەلەلەر بويىنشا قوردالانعان پروبلەمالاردى ارنايى شتاب زەردەلەيدى.
ۆەدوموستۆوارالىق جۇمىسشى توبى ايماقتاعى جاعدايعا ساراپتاما جاسايدى. عالامتور كەڭىستىگىنە مونيتورينگ جۇرگىزەدى. ءدىني باعىتتاعى بەينەروليكتەردى قالاداعى LED ەكرانداردا, اۋرۋحانالاردا, تۇرعىندارعا قىزمەت كورسەتۋ ورتالىقتارىندا, ساۋدا ورتالىقتارى مەن حالىق كوپ جينالاتىن باسقا دا جەرلەردە كەڭىنەن كورسەتەدى.
الەۋمەتتىك جەلىلەرگە مونيتورينگ جۇرگىزۋ بارىسىندا ءدىني ساراپشىلاردىڭ قورىتىندىسىمەن مازمۇنى ەلدىڭ اتا زاڭىنا, قازاقستاننىڭ وزگە زاڭدارى مەن قۇقىقتىق-نورماتيۆتىك اكتىلەرگە قايشى كەلەتىن 70-تەن استام اۋديوجازبا انىقتالدى. جوعارىدا كورسەتىلگەن اۋديوجازبانى بۇعاتتاۋ بويىنشا ءتيىستى مينيسترلىككە ۇسىنىس جولداندى.
«پروكۋروردىڭ 100 كەڭەسى» جوباسىنا سايكەس, تۇرعىندارعا تەراكت قاۋپى تونگەندە جانە ول ورىن العان جاعدايدا كىمگە حابارلاۋ قاجەتتىگى, سىن ساعاتتا ءوزىن جانە جاقىن ادامدارىن قۇتقارۋعا ارەكەت ەتۋ شارالارى ءتۇسىندىرىلدى. ال, تەولوگتار راديكالدى يدەولوگيانىڭ قاۋپى, تەرىس اعىمداردىڭ نەگىزگى وزگەشەلىكتەرى, كەلتىرەتىن زارداپتارى تۋرالى تۇسىنىك جۇمىستارىن جۇرگىزدى. لاڭكەستىك تۇرعىدان وسال نىسانداردىڭ (مەكتەپ, ۆوكزال, اۋرۋحانا, ستاديون, ت.ب.) قىزمەتكەرلەرىنە جاتتىعۋ دابىلى كەزىندەگى ارەكەتتەرى وقىتىلىپ-ۇيرەتىلدى.
ماقساتتى جۇمىستار ودان ءارى جالعاسا بەرەدى.
ا.تايتۋللين,
اتىراۋ وبلىستىق پروكۋراتۋراسىنىڭ باسقارما باستىعى