الەۋمەتتىك ماڭىزى بار ىستەردىڭ ساناتىنا, وسى تاڭداعى وزەكتى ماسەلەلەردىڭ ءبىرى – اليمەنت ءوندىرۋ تۋرالى اتقارۋشىلىق قۇجاتتار جاتادى. وسىعان وراي, 2015 جىلدىڭ 29 قازانىندا №376-V ساندى قازاقستان رەسپۋبليكاسىنىڭ زاڭىمەن 2016 جىلدىڭ 1 قاڭتارىنان باستاپ قولدانىسقا بەرىلگەن «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭعا وزگەرىستەر مەن تولىقتىرۋلار ەنگىزىلدى. زاڭنىڭ 138-بابىنا سايكەس, جەكە سوت ورىنداۋشىلارىنىڭ قۇزىرەتىنە مەملەكەتتىڭ مۇددەسى قوزعالعان اتقارۋشىلىق قۇجاتتاردان باسقا, جەكە جانە زاڭدى تۇلعالارعا قاتىستى, سونىمەن قاتار, الەۋمەتتىك ماڭىزى بار ىستەر بويىنشا بارلىق اتقارۋشىلىق قۇجاتتاردى ورىنداۋ جاتادى. سونىڭ ىشىندە, اليمەنت ءوندىرۋ تۋرالى اتقارۋشىلىق قۇجاتتار دا بار. سونداي-اق, الەۋمەتتىك ماڭىزى بار ىستەر بويىنشا جەكە سوت ورىنداۋشىلارى تاراپىنان جەكە تۇلعالارعا مەملەكەت كەپىلدىك بەرگەن تەگىن زاڭ كومەگى كورسەتىلەدى. زاڭنىڭ 117-1-بابىنا سايكەس, الەۋمەتتىك ماڭىزى بار ىستەر ساناتىنا جاتاتىن, سونىمەن قاتار, اليمەنت ءوندىرۋ تۋرالى اتقارۋشىلىق قۇجاتتار بويىنشا جەكە سوت ورىنداۋشىسى قىزمەتىنىڭ اقىسى بيۋدجەتتەن تولەنەدى. اۋماقتىق ورگانعا ۇسىنىلعان اتقارۋشىلىق ارەكەتتەردى جاساعانى جانە ءوندىرىپ الىنعان تولەمدەر تۋرالى ەسەپ جەكە سوت ورىنداۋشىسىنىڭ قىزمەتىنە اقى تولەۋ ءۇشىن نەگىز بولىپ تابىلادى. جەكە سوت ورىنداۋشىسىنىڭ وسى باپتىڭ 1-تارماعىندا كوزدەلگەن اتقارۋشىلىق قۇجاتتار بويىنشا ماجبۇرلەۋ شارالارىن قولدانۋعا بايلانىستى قىزمەتىنە اقى تولەۋ مولشەرىن قازاقستان رەسپۋبليكاسىنىڭ ۇكىمەتى بەلگىلەيدى. «جەكە سوت ورىنداۋشىسىنىڭ اليمەنتتەردى جانە جالاقىنى ءوندىرىپ الۋ تۋرالى اتقارۋشىلىق قۇجاتتار بويىنشا ماجبۇرلەۋ شارالارىن قولدانۋىنا بايلانىستى قىزمەتىنە اقى تولەۋ مولشەرىن بەلگىلەۋ تۋرالى» قازاقستان رەسپۋبليكاسى ۇكىمەتىنىڭ 2015 جىلعى 24 جەلتوقسانداعى №1053 قاۋلىسىنا سايكەس, جەكە سوت ورىنداۋشىسىنىڭ اليمەنتتەردى جانە جالاقىنى ءوندىرىپ الۋ تۋرالى اتقارۋشىلىق قۇجاتتار بويىنشا ماجبۇرلەۋ شارالارىن قولدانۋىنا بايلانىستى قىزمەتىنە اقى تولەۋ ءبىر اتقارۋشىلىق ءىس جۇرگىزۋگە 5 ايلىق ەسەپتىك كورسەتكىش مولشەرىندە بەلگىلەنگەن. جەكە سوت ورىنداۋشىلارىمەن, اليمەنت تولەمەي قاشىپ جۇرگەن بورىشكەرلەرگە, قازاقستان رەسپۋبليكاسىنان شىعۋىن ۋاقىتشا شەكتەۋ, مۇلكىن تاركىلەپ قانا قويماي, قازاقستان رەسپۋبيكاسىنىڭ اكىمشىلىك قۇقىق بۇزۋشىلىق زاڭىنىڭ 669-بابىنا سايكەس, 10 اەك كولەمىندە ايىپپۇل سالۋدان 5 تاۋلىككە دەيىن قاماۋعا الۋ جانە دە قىلمىستىق جاۋاپكەرشىلىككە تارتۋ سىندى شارالار قولدانىلادى.
زەرە قارجاۋوۆا, الماتى قالالىق ادىلەت دەپارتامەنتى
جەكە سوت ورىنداۋشىلار قىزمەتىن ۇيىمداستىرۋ ءبولىمىنىڭ جاۋاپتى مامانى