ءۇشىنشى ورىن مولدوۆادان كەلگەن «SunStroke Projekt» توبىنا بۇيىردى. وسى ورايدا, قازاقستاندىق انسۇيەر قاۋىمنىڭ ءبىرازىنىڭ بۇيرەگى بۇرعان بولگاريالىق ءانشى تۋرالى از-كەم ايتا كەتەيىك. كريستيان كوستوۆتىڭ اناسى زاۋرەش ەسىمدى قازاق قىزى. «Eurovision-2017» بايقاۋىنىڭ ىرىكتەۋ كەزەڭىندە وزا شاپقان ونەرلى جىگىت تاياۋدا «ەگەمەن قازاقستان» گازەتىنە سۇحبات بەرىپ, ءومىر جولى مەن ونەر جولى تۋرالى ايتقان ەدى. – بويىمداعى ونەر اتامنان بەرىلگەن دەسەم, ارتىق ايتپايمىن. سىزدەر مەنىڭ سەيفوللا اتامدى كورسەڭىزدەر عوي. جۇرگەن جەرى دۋمان, كەز كەلگەن وتىرىستىڭ جۇلدىزىنا اينالادى. جالپى, ءبىز وتباسىمىزبەن ونەرگە جاقىنبىز. انام مەن تاتەم ەكەۋى كاراوكەنىڭ حانشايىمدارى. كىشى باۋىرلارىم ارمان مەن سوفيا ماسكەۋدەگى اتاقتى ۆ.س.لوكتەۆ ءانسامبلىنىڭ حورىندا ونەر كورسەتەدى,– دەپ اقتارىلا ايتقان بولاتىن. بولگاريالىق بوزبالاعا بۇيرەگىمىز بۇرعانىنىڭ تاعى ءبىر سەبەبى, 12 جاسىندا رەسەيدە وتكەن حالىقارالىق بايقاۋدا جەرلەسىمىز, تالانتتى مۋزىكانت باتىرحان شۇكەنوۆپەن جۇپتاسىپ ونەر كورسەتىپ, كورەرمەن كوزايىمىنا اينالعان ەدى. بيىلعى جىلى بۇرناعى جىلدارمەن سالىستىرعاندا قازاقستاندىق كورەرمەننىڭ كوڭىلىن كوبىرەك اۋدارعان «Eurovision-2017» تاريحقا اينالدى. ساحنادا بەكەر تەر توگىپ جۇرمەگەنىن دالەلدەگەن كريستيان كوستوۆ حالىقارالىق ءان بايقاۋىندا ميلليونداردىڭ نازارىن اۋدارىپ, ەكىنشى ورىندى جەڭىپ الۋىنىڭ ءوزى جاس ءانشى ءۇشىن ۇلكەن جەتىستىك ەكەنى داۋسىز. ءمولدىر ۇنىمەن تالايلاردى تامساندىرعان, ناعاشىسىنا تارتقان بوزبالانىڭ باعىندىرار بيىكتەرى ءالى الدا دەپ سەنەيىك.
ارنۇر اسقار, «ەگەمەن قازاقستان»