جاڭا كاسىپورىن قازاقستاندىق مۇناي حيمياسى ونىمدەرىن شىعارماق. بۇل ونىمدەر مۇناي-گاز سەكتورىندا قىزمەت ەتۋشى كومپانيالاردىڭ قاجەتىن وتەيتىن بولادى.
جاڭا كومپانيا باسشىلىعىمەن كەزدەسۋدە باتىس قازاقستان وبلىسىنىڭ اكىمى التاي كولگىنوۆ 2017-2018 جىلدارى سالىنۋى ءتيىس وندىرىستىك قۇرىلىس نىساندارىنىڭ جوسپارىمەن تانىستى. جاڭا كاسىپورىنعا ينۆەستيتسيا تارتۋ, العاشقى كەزەڭدە بىلىكتى مامانداردى شەتەلدەن الدىرۋدىڭ زاڭدىلىقتارى پىسىقتالدى. ارىپتەستىك بايلانىستىڭ وزگە دە قىرلارى تالقىعا ءتۇستى.
قازاقستاندىق, يراندىق مەن كانادالىق كاسىپكەرلەر تاراپىنان بىرىككەن كاسىپورىندى قۇرۋعا قاجەتتى بارلىق قۇجاتتارعا قول قويىلىپ, قۇرىلىس نىساندارىنىڭ جۇمىسى باستالىپ تا كەتتى.
«QazChem» كومپانياسىنىڭ باسقارۋشى ديرەكتورى اليرەزا سايەد حوسەينيدىڭ ايتۋىنشا, جاڭا كاسىپورىندا ەڭ زاماناۋي قوندىرعىلار ورناتىلىپ, قورشاعان ورتاعا زالالسىز, ەكولوگيالىق لاستاۋسىز جۇمىس ىستەيتىن بولادى.
جاقىن كۇندەرى كومپانيانىڭ ءوندىرىس الاڭىندا مۇناي رەاگەنتتەرىن سينتەزدەپ, تاسىمالداۋعا دايىندايتىن تسەح سالىنباق.
قازىردىڭ وزىندە سۋ مەن مۇناي نەگىزىندەگى تەحنولوگيالىق ەرىتىندىلەردى شىعاراتىن بلەندينگ تسەحىنىڭ ينجينيرينگى تولىق ءازىر. رەزەرۆۋار پاركى, ساقتاۋشى قويمالار جانە حيميالىق زەرتحانا جوباسى دايىن.
كومپانيانىڭ دامۋ بويىنشا ديرەكتورى عايسا جۇماليەۆتىڭ ايتۋىنشا, جاڭا زاۋىت تاياۋ ارادا مۇناي-گاز كومپانيالارىن قازاقستاندا وندىرىلگەن جوعارى ساپالى حيميا ونىمدەرىمەن قامتاماسىز ەتەتىن بولادى. باتىس قازاقستان وبلىسىنىڭ گەوگرافيالىق جاعىنان ىڭعايلى ورنالاسۋى ءونىمدى تاسىمالداۋ شىعىنىن ەداۋىر ازايتادى. كومپانيا تاياۋ بولاشاقتا ەاەو ەلدەرىنىڭ نارىعىنا ءونىم شىعارۋدى دا جوسپارلاپ وتىر.
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتى تۇسىرگەن اۆتور