مۇرات ءونال – ەۋروپا الاڭدارىندا ويناپ جۇرگەن جالعىز قازاق فۋتبولشىسى. تۇركيادا تۋىپ-ءوسىپ, ەۋروپاعا كوشكەن قانداسىمىزدىڭ بالاسى. 6 جاسىنان بەرى فۋتبولمەن اينالىسادى. قازىر گوللانديانىڭ ءبىرىنشى ليگاسىنداعى «ۆولەندام» كومانداسىنىڭ شابۋىلشىسى. جاسى 24-تە. گوللانديانىڭ 14,16,17 جاس ساناتىنداعى ۇلتتىق قۇرامالارىندا ويناعان. بۇگىنگە دەيىن گوللانديا جانە بەلگيانىڭ «امستەردام», «بريۋگگە», «دەن حااگ», «ۆولەندام» كوماندالارىندا ونەر كورسەتكەن. ارمانى – قازاق ەلىنىڭ ۇلتتىق قۇراماسىندا ويناۋ.
– فۋتبولمەن قاشان جانە قايدا اينالىسا باستادىڭ؟
– امستەردامداعى «ۆەسپۋچچي» اۋەسقوي كومانداسىنىڭ فۋتبول مەكتەبىنە 6 جاسىمدا قابىلداندىم. العاشقى قادامىم وسى مەكتەپتە باستالدى.
– كاسىپقوي فۋتبولشى رەتىندەگى ويىن ورنەگىڭ قاي كوماندادا باستالدى؟
– 17 جاسىمدا جاستار اراسىندا ۇزدىك شابۋىلشى اتاندىم. سوسىن سول جىلى بەلگيانىڭ ەڭ مىقتى كلۋبتارىنىڭ ءبىرى «بريۋگگەگە» ءوتتىم.
– گوللانديا جاستار قۇراماسىندا ويناعان ەكەنسىڭ. بۇل قۇراما ساپىندا قانداي جەتىستىكتەرگە جەتتىڭ؟
– 16 جاس ساناتىندا وڭتۇستىك امەريكاداعى ارۋبا قالاسىندا وتكەن تۋرنيردە فينالعا دەيىن جەتتىك.
– فۋتبولشى رەتىندە سەنىڭ ەڭ باستى قاسيەتتەرىڭ قانداي جانە جالپى گوللانديادا وسى سپورتتىڭ قانداي قاسيەتتەرى ماڭىزدى بولىپ سانالادى؟
– گوللانديا فۋتبول مەكتەبى الەمدەگى ەڭ مىقتى مەكتەپتەردىڭ ءبىرى. ەۋروپانىڭ ۇلكەن كوماندالارىندا كەم دەگەندە 1-2 گوللانديالىقتى كورە الاسىز. بۇل ەلدە كاسىپقوي فۋتبولشى ءۇشىن تەحنيكا, جىلدامدىق, كۇش جانە ەڭ باستىسى اقىل ماڭىزدى فاكتور بولىپ سانالادى. بۇلاردىڭ بىرەۋى كەم بولسا, ويناي المايسىز. «سەنىڭ ەڭ جاقسى قاسيەتتەرىڭنىڭ ءبىرى – وڭاي گول سوعۋىڭ», – دەيدى باپكەرىم.
– ەۋروپا الاڭدارىندا دوپ تەۋىپ ءجۇرگەن باسقا قازاق فۋتبولشىلارى بار ما؟
– جوق. كورە المادىم.
– ەۋروپا قازاقتارى قازاقستان كوماندالارىنىڭ ەۋروتۋرنيرلەردەگى ويىندارىنا بارا ما؟ جالپى, قازاق كوماندالارىنىڭ ويىندارىن قاداعالاپ جۇرە مە؟
– ءيا, ويىندارعا بارىپ تۇرادى. قازاق بولعاندارى ءۇشىن. ويتكەنى, قازاقستان ءبىزدىڭ ەلىمىز. بارلىق تۋرنيرلەردى قاداعالايمىز دەپ ايتا المايمىن. بۇل جاقتا تەك CaspioNet قانا كورسەتەدى. ال ول ارنا ويىنداردى تولىق بەرمەيدى. ودان تەك قىسقاشا مازمۇنىنان عانا حاباردار بولۋمەن شەكتەلەمىز.
– ال ءوزىڭ قازاق فۋتبولى تۋرالى نە بىلەسىڭ؟ قازاقستان ۇلتتىق قۇراماسىندا ويناعىڭ كەلەر مە ەدى؟
– مەن تەك قانا «اقتوبەنى» بىلەمىن. قاتەلەسپەسەم, وتكەن جىلى ەۋروپا ليگاسىندا گوللانديانىڭ كۇشتى كلۋبتارىنىڭ ءبىرى «از الكماارمەن» وينادى. قازاقستانعا ءبىر قازاق بالاسى رەتىندە كەز كەلگەن كومەگىم ءتيىپ جاتسا, بۇل مەن ءۇشىن ورىندالعان ارمان بولار ەدى. اسىرەسە, ونداي كومەگىم فۋتبول ارقىلى بولسا, مەن ءۇشىن ول ۇلكەن باقىت!
– ارنو پايپەرس كەزەڭىندە قازاقستان ۇلتتىق قۇراماسىنىڭ گوللاندياداعى وقۋ-جاتتىعۋ جيىنىنا شاقىرىلىپسىڭ. بىراق كوماندا ساپىنان كورە المادىق. قانداي سەبەپ بولدى؟
– ءيا, گوللاندياداعى جيىنعا شاقىرىلدىم جانە جولداستىق كەزدەسۋلەردىڭ بىرەۋىندە وينادىم. گول دا سوقتىم. مەنى جاقسى قارسى العان ەدى قۇراماداعى جىگىتتەر. ول كەزدە 19 جاستا ەدىم. ۋنيۆەرسيتەتتە وقيتىنمىن. ارنو پايپەرس قازاقستانعا شاقىردى. بىراق ءدال سول كەزدە وقۋىما بايلانىستى ەشقايدا بارا المادىم.
– قازىرگى جاڭا باپكەرىمىز چەح بەرانەكتەن شاقىرۋ الساڭ, قۇرامادا وينار ما ەدىڭ؟
– ءار قازاق بالاسى ءۇشىن بۇل ۇلكەن ماقتانىش. ارينە, قازاقستان ۇلتتىق قۇراماسىندا ويناعىم كەلەدى!
اڭگىمەلەسكەن ارشات ورازوۆ.