ماڭعىستاۋ وبلىسىندا دارىگەرلەردىڭ ءبىلىمى مەن بىلىگىن ارتتىرۋ باعىتىنداعى ءتۇرلى باسقوسۋ, سەمينار, تاجىريبەلىك ساباق ءجيى ۇيىمداستىرىلادى. جاقىندا وبلىستىق كوپبەيىندى اۋرۋحاناسىنىڭ بازاسىندا ۋرولوگيا, ونكوۋرولوگيا سالاسىنداعى وزىق ادىستەردى تاجىريبەدە قولدانۋعا ارنالعان شەبەرلىك ساعاتى ءوتتى.
ساعات بارىسىندا ۋرولوگ دارىگەرلەر ۋرولوگيا سالاسىنداعى ەڭ وزىق, از ءينۆازيۆتى تەحنولوگيالاردىڭ ءبىرى سانالاتىن رەتروگرادتى ينترارەنالدى حيرۋرگيا (RIRS) ادىسىمەن, جۇمساق ۋرەتەرورەنوسكوپ «MacroLux» اپپاراتىنىڭ كومەگىمەن بۇيرەك تاستارىن الۋ وپەراتسياسىن جاسادى. ءاربىر وپەراتسيا شامامەن ءبىر ساعاتقا سوزىلدى.
دارىگەرلەردىڭ ايتۋىنشا, وپەراتسيا بارىسىندا قولدانىلعان «MacroLux» اپپاراتى – سوڭعى بۋىنداعى فلەكسيبلدى ۋرەتەرورەنوسكوپ. ونىڭ باستى ارتىقشىلىعى – وتە جۇقا ءارى يكەمدى قۇرىلىمى. اپپارات بۇيرەكتىڭ قولجەتىمى قيىن بولىكتەرىنە دەيىن ەركىن جەتۋگە مۇمكىندىك بەرەدى. سونداي-اق حيرۋرگكە وپەراتسيا ايماعىن ءدال باقىلاۋعا جاعداي جاسايدى. بۇل ءوز كەزەگىندە حيرۋرگيالىق مانيپۋلياتسيالاردىڭ قاۋىپسىزدىگىن ارتتىرىپ, ناۋقاس اعزاسىنا تۇسەتىن جۇكتەمەنى ازايتادى. ناتيجەسىندە, وپەراتسيا ۋاقىتى قىسقارىپ, اسقىنۋ قاۋپى تومەندەيدى, پاتسيەنتتىڭ تەز قالپىنا كەلۋىنە مۇمكىندىك تۋادى.
شەبەرلىك ساعاتىنا قاراعاندى مەديتسينالىق ۋنيۆەرسيتەتىنىڭ قاۋىمداستىرىلعان پروفەسسورى, مەديتسينا عىلىمدارىنىڭ كانديداتى, قاراعاندى وبلىسىنىڭ شتاتتان تىس باس ۋرولوگى سەرىك ءجۇنىسوۆ ارنايى شاقىرۋمەن كەلىپ, ماڭعىستاۋ وبلىسىنىڭ شتاتتان تىس باس ۋرولوگى, اۋرۋحانانىڭ ۋرولوگيا ءبولىمى مەڭگەرۋشىسى مۇرات بەكحوجين, ۋرولوگ دارىگەرلەر ارمان نابيتۇردىەۆ, اقىن قۇدايبەرگەن, «SofieMed», «ياسين», №2 ەمحاناسى دارىگەرلەرىنىڭ قاتىسۋىمەن كۇردەلى وپەراتسيالاردى ورىنداۋ تاجىريبەسىن ءبولىستى.
سەمينار بارىسىندا جەتى ناۋقاسقا مىندەتتى الەۋمەتتىك مەديتسينالىق ساقتاندىرۋ جۇيەسى شەڭبەرىندە تەگىن وپەراتسيا جاساۋ جوسپارلانعان, وپەراتسيالار جوعارى مامانداندىرىلعان مەديتسينالىق كومەك تالاپتارىنا ساي جۇرگىزىلىپ جاتىر. سونداي-اق اۋرۋحانا بازاسىندا ونكوۋرولوگ دارىگەرلەردىڭ قاتىسۋىمەن وتەتىن شەبەرلىك ساعاتىندا ۋرولوگيالىق, ونكولوگيالىق اۋرۋلاردى ەمدەۋدىڭ زاماناۋي حيرۋرگيالىق تاسىلدەرى كورسەتىلەدى. بۇل باعىتتاعى وپەراتسيالار دارىگەرلەر تاجىريبەسىن ارتتىرىپ قانا قويماي, وڭىردە ونكوۋرولوگيالىق كومەكتىڭ ساپاسىن جاڭا دەڭگەيگە كوتەرەدى.
«مۇنداي شەبەرلىك سىنىپتارى وڭىرلىك اۋرۋحانالاردا جوعارى تەحنولوگيالىق وپەراتسيالاردى ەنگىزۋگە, مامانداردىڭ كاسىبي دەڭگەيىن كوتەرۋگە, تۇرعىندارعا كورسەتىلەتىن مەديتسينالىق كومەكتىڭ ساپاسىن ارتتىرۋعا سەپتىگىن تيگىزەدى», دەيدى باسقوسۋعا قاتىسۋشى دارىگەرلەر.
ماڭعىستاۋ وبلىسى