بىلتىر ءساۋىر ايىندا مەملەكەت باسشىسىنىڭ جاستار ساياساتىن دامىتۋعا قاتىستى تاپسىرماسىنا ساي, اباي وبلىسىنىڭ جاستار ساياساتى ماسەلەلەرى جونىندەگى باسقارماسى قۇرىلعان بولاتىن. وسى رەتتە, اتالعان باسقارمانىڭ اتقارعان جۇمىستارىنا شولۋ جاساعان ەدىك.
باسقارما باسشىسى ولجاس بەيسەنباەۆتىڭ ايتۋىنشا, بۇل مەكەمە – وڭىردەگى مەملەكەتتىك جاستار ساياساتىن ىسكە اسىرۋ, جاستاردىڭ باستامالارىن قولداۋ, كاسىبي جانە كاسىپكەرلىك داعدىلارىن, ولاردىڭ دەنساۋلىعىن نىعايتۋ, ينتەللەكتۋالدىق مۇمكىندىگىن ارتتىرۋعا جاۋاپتى ورگان. وبلىستا بۇل جۇمىس جۇيەلى تۇردە قولعا الىنىپ وتىر.
«قۇرىلعانىنا كوپ ۋاقىت بولماسا دا باسقارمانىڭ وبلىس جاستارىمەن بىرگە اتقارعان جۇمىسى از ەمەس. ەڭ ءبىرىنشى, وڭىردە جاستار سالاسىنداعى جۇمىستىڭ ينستيتۋتسيونالدى قۇرىلىمى نىعايدى, جاڭا ۇيلەستىرۋشى ورگان قۇرىلدى. باسقارما قۇرامىنا شتات بويىنشا 14 قىزمەتكەر بەرىلىپ وتىر. جاستار سالاسىنا بولىنەتىن قاراجات ۇلعايتىلدى», دەيدى ول.
باسقارمانىڭ مالىمەتىنشە, قازىر وبلىستاعى NEET ساناتىنداعى جاستاردىڭ ۇلەسى (جىل باسىنداعى 2,4 پايىزدان 2,1-گە دەيىن) تومەندەتىلدى. 23 جەلتوقسانداعى «وتباسىنىڭ تسيفرلىق كارتاسى» بويىنشا NEET جاستاردىڭ سانى 2 346 ادام بولدى. بۇل – ەلىمىزدەگى تومەن كورسەتكىشتىڭ ءبىرى. ال وبلىستىق, اۋدان جانە قالالىق دەڭگەيدەگى بارلىق جاستار ىستەرى جونىندەگى كەڭەستەردىڭ قۇرامى جاڭارتىلدى. اكىمدىكتەر جانىنان جاستار ىستەرى جونىندەگى 13 كەڭەس جۇمىس ىستەيدى. ونىڭ قۇرامىنداعى جاستار ۇلەسى ۇلعايتىلىپ, قوعامدىق ۇيىم, ازاماتتىق سەكتور وكىلدەرى قوسىلدى. بۇعان قوسا بىلتىر وبلىستا جاستارعا ارنالعان جەڭىلدەتىلگەن يپوتەكالىق باعدارلاما قايتادان ىسكە قوسىلدى. وبلىس اكىمىنىڭ تاپسىرماسىنا سايكەس جەلتوقسان ايىندا سەمەي قالاسى اكىمدىگى مەن «وتباسى بانكى» بىرلەسىپ, جاستاردى قولداۋ ماقساتىندا 40 پاتەرگە قاراجات قاراستىرىپ وتىر. سونىمەن قاتار مەملەكەتتىك باعدارلامالار, سۋبسيديالاناتىن جۇمىس ورىندارى, گرانتتار («ديپلوممەن – اۋىلعا!», «سەرپىن», «جاستار پراكتيكاسى», «تاۋەلسىزدىك ۇرپاقتارى») ءتۇسىندىرىلىپ, ارنايى بريفينگ ءوتتى, پودكاستار شىقتى. جاستارعا بەرىلگەن مۇمكىندىك تۋرالى بۋكلەتتەر مەن فلاەرلەر, اناليتيكالىق ينفوگرافيكا دايىندالدى. وسى جۇمىستى اباي وبلىسىنىڭ جاستار ساياساتى ماسەلەلەرى جونىندەگى باسقارماسى رەسۋرستىق ورتالىقتار, ءتيىستى جەرگىلىكتى اتقارۋشى ورگان, اۋدان اكىمدىكتەرى جانە قۇقىق قورعاۋ ورگاندارىمەن بىرلەسىپ اتقاردى.
«2025 جىلى وڭىرلىك جۇمىسپەن قامتۋ كارتاسى اياسىندا 10 698 جاس جۇمىسقا ورنالاستى, ونىڭ ىشىندە ۇلتتىق جوبالار – 1 099, بوس جۇمىس ورىندارىنا – 3 052, مەملەكەت باسشىسىنىڭ باستاماسى بويىنشا – 4 070, سۋبسيديالاناتىن جۇمىس ورىندارىنا – 2 414. «العاشقى جۇمىس ورنى» جانە «ۇرپاقتار كەلىسىمشارتى» جوبالارى بويىنشا 277 ادام جۇمىسقا ورنالاستى. ال «ديپلوممەن – اۋىلعا!» باعدارلاماسى اياسىندا 99 بيۋدجەتتىك كرەديت بەرۋگە قاراجات قاراستىرىلدى. جەرگىلىكتى بيۋدجەت ەسەبىنەن 315 كوتەرمە جاردەماقى تولەندى. بۇل باعدارلاما 2026 جىلى دا وڭىرىمىزدە جالعاسىن تابادى», دەيدى باسقارما باسشىسى.
ونىڭ ايتۋىنشا, جاستاردىڭ ەڭبەككە ەپتىلىگىن ارتتىرۋ ماقساتىندا بىلتىر وڭىردە Business.enbek پورتالى ارقىلى «باستاۋ بيزنەس» جوباسىندا 320 جاس وقىتىلدى, 191-ءى سەرتيفيكات الدى, الەۋمەتتىك وسال توپتاعى 63 جاسقا 400 اەك كولەمىندە قايتارىمسىز گرانت بەرىلدى. قىسقامەرزىمدى كاسىپتىك وقىتۋعا 86 جاس جولداندى, ونىڭ 70-ءى تۇراقتى جۇمىسقا ورنالاستى. Skills.enbek.kz پورتالىندا 979 جاس تەگىن ونلاين-كۋرستارعا تىركەلدى, 951-ءى اياقتادى.
«وبلىستا بارلىعى ءۇش جوعارى وقۋ ورنى جۇمىس ىستەيدى: ەكەۋى – مەملەكەتتىك, بىرەۋى – جەكەمەنشىك. جالپى, جوعارى وقۋ ورنىنىڭ ستۋدەنتتىك كونتينگەنت 20 مىڭ ادامنان اسادى. سونىمەن قاتار 996 شەتەلدىك ستۋدەنت, 366 ادام «سەرپىن» باعدارلاماسىمەن, 71 ستۋدەنت قانداستار كۆوتامەن ءبىلىم الادى. ءبىلىم بەرۋ مەكەمەلەرىندە 27 جاتاقحانا جۇمىس ىستەيدى, ورىن تاپشىلىعى جوق. قاڭتار ايىندا بارلىق جاتاقحانانى ارالاپ شىقتىق, بىرقاتارى جوندەۋگە دايىندالىپ جاتىر», دەيدى ولجاس تۇسىپبەك ۇلى.
ماڭىزدى باعىتتىڭ ءبىرى – جاس بۋىن ورتاسىنداعى قۇقىقبۇزۋشىلىقتىڭ الدىن الۋ, پرەزيدەنتتىڭ العا قويعان «زاڭ مەن ءتارتىپ» قاعيداتىن ورنىقتى ىسكە اسىرۋ.
«ەسىرتكى, لۋدومانيا جانە قۇقىقبۇزۋشىلىققا قارسى جۇمىس اياسىندا 393 ءىس-شارا وتكىزىلىپ, 62 210 جاس قامتىلدى. 17 مەملەكەتتىك الەۋمەتتىك تاپسىرىس ءىس-شاراسى, 10 اقپاراتتىق كەزدەسۋ, 8 دوڭگەلەك ۇستەل, 3 رەيد, 78 ناركو-بوت جازباسى جۇزەگە اسىرىلدى. ينتەرنەتتەگى الاياقتىق, ويىنقۇمارلىق قاتەرلى ىندەت بولىپ تۇر. ەكونوميكالىق تەرگەپ-تەكسەرۋ دەپارتامەنتىمەن بىرگە وتكەن «اباي وبلىسى – لۋدومانياسىز ايماق» فورۋمىندا 200-دەن اسا جاس قاتىستى, 26 ادام ماراپاتتالدى», دەيدى ول.
پاتريوتتىق جانە رۋحاني تاربيە بويىنشا «جەڭىس شىراعى – 80 جىل», رەسپۋبليكالىق «ASK CAMP» فورۋمى, جاستاردىڭ لاڭكەستىككە قارسىلىعىن بىلدىرەتىن كوشە بيىنەن «DANCE BATTLE», «ەڭبەكشى جاستار» فەستيۆالى ءوتتى. وبلىستا كۋيز ويىنى وتە ۇلكەن قوزعالىسقا يە بولدى. «SarbazTALK» چەللەندجى ارقىلى 10 بەينەروليك ءتۇسىرىلىپ, اسكەردەگى ءومىردى جاستار اۋديتورياسىنا جەتكىزۋگە تىرىستىق. كرەاتيۆتى الاڭدار جوباسى اياسىندا «ERTIS ART» جاستار تەاترلارىنىڭ فەستيۆالى ءوتتى. جىل سوڭىندا جاستار اراسىنداعى ۇزدىكتەر اتالىمدار بويىنشا وبلىس اكىمى بەرىك ءۋاليدىڭ العىسحاتىمەن ماراپاتتالدى.
ال اباي قۇنانباي ۇلىنىڭ 180 جىلدىعى اياسىندا سەمەي قالاسىندا «اباي QUIZ» رەسپۋبليكالىق زياتكەرلىك ويىنىنا ءوزىمىز دە كۋامىز. وعان 1 080 ادام, بارلىعى 180 كوماندا قاتىستى. جالپى, جۇلدە قورى 5 ملن-عا جۋىق سومانى قۇرادى. مەرەيتويعا 500 ۆولونتەر تارتىلدى, ءىس-شارالاردا ناۆيگاتسيا, اقپارات جانە مەديتسينالىق كومەك كورسەتتى.
اباي وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ مالىمەتىنشە, «تازا قازاقستان» اكتسياسى بويىنشا 3 مىڭنان اسا جاس 200 گەكتار اۋماقتى تازالادى. «سەمەي ورمانى» رەزەرۆاتىندا «حالىق» قورىمەن بىرگە مىڭداعان ءتۇپ اعاش ەگىلدى.
«جالپى, اباي وبلىسىندا جاستار ساياساتىن دامىتۋدىڭ ستراتەگيالىق جوسپارى مەملەكەت باسشىسى بەكىتكەن «قازاقستان رەسپۋبليكاسى ىشكى ساياساتىنىڭ نەگىزگى قاعيداتتارى, قۇندىلىقتارى مەن باعىتتارى» قۇجاتى نەگىزىندە ىسكە اسىرىلىپ, «زاڭ جانە ءتارتىپ», «ادال ازامات», «تازا قازاقستان» قاعيداتتارى مەن ۆولونتەرلىك پەن زياتكەرلىك الەۋەتتى نىعايتۋعا باسىمدىق بەرىلەدى», دەيدى باسقارما باسشىسى.
2026 جىل پرەزيدەنت باستاماسىمەن حالىقارالىق ەرىكتىلەر جىلى بولىپ بەلگىلەندى. وسىعان وراي, بىرقاتار حالىقارالىق جانە رەسپۋبليكالىق ءىس-شارانى وتكىزۋ كوزدەلگەن. وسىلايشا, وبلىس جاستارىنا سەرپىلىس بەرىپ, ولكەدەن شىققان تالانتتار قايتا ورالىپ, ورتانى تولتىرسا, ءوڭىردىڭ الەۋمەتتىك-ەكونوميكالىق, زياتكەرلىك, كرەاتيۆتى كۇش-قۋاتىن ارتتىرۋعا ۇلەس قوسادى دەگەن ءۇمىت مول.
اباي وبلىسى