مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى, دەپ حابارلايدى Egemen.kz.
اتالعان زاڭ قازاقستان رەسپۋبليكاسىنىڭ 2022–2026 جىلدارعا ارنالعان سىبايلاس جەمقورلىققا قارسى ساياساتىنىڭ تۇجىرىمداماسىن ىسكە اسىرۋ, سونداي-اق سىبايلاس جەمقورلىققا قارسى حالىقارالىق ستاندارتتاردى ۇلتتىق زاڭناماعا ەنگىزۋ ماقساتىندا ازىرلەندى.
مۇددەلەر قاقتىعىسىنىڭ الدىن الۋ بولىگىندە ونىڭ: الەۋەتتى, ناقتى جانە ورىن العان تۇرلەرى بويىنشا ارا جىگى اجىراتىلدى. ءاربىر ءتۇرى ءۇشىن ناقتى مەرزىمدەرى كورسەتىلگەن ارەكەت ەتۋ الگوريتمى بەلگىلەندى. مۇددەلەر قاقتىعىسى جاعدايىندا قابىلدانعان اكتىلەر مەن جاسالعان مامىلەلەر جارامسىز دەپ تانىلۋى مۇمكىن.
سىبايلاس جەمقورلىققا قارسى كومپلاەنس-قىزمەتتەردىڭ دەربەستىگى كۇشەيتىلدى: ولار تەك ديرەكتورلار كەڭەسىنە نەمەسە بايقاۋ كەڭەسىنە ەسەپ بەرەدى, اتقارۋشى ورگاننان تاۋەلسىز تۇردە ءوز وكىلەتتىكتەرىن جۇزەگە اسىرادى جانە اگەنتتىكپەن تىكەلەي ءوزارا ءىس-قيمىل جاسايدى.
مەملەكەت باسشىسىنىڭ 2024 جىلعى 21 قاراشاداعى №709 جارلىعىن ىسكە اسىرۋ شەڭبەرىندە ەڭبەك كودەكسىندە قىزمەتكە قابىلداۋ كەزەڭىندە مۇددەلەر قاقتىعىسىن اۆتوماتتى تۇردە انىقتاۋعا مۇمكىندىك بەرەتىن تسيفرلىق كادرلىق جۇيەنىڭ قۇقىقتىق نەگىزدەرى بەكىتىلدى.
جازانىڭ بۇلتارتپاستىعى قاعيداتىن قامتاماسىز ەتۋ ماقساتىندا سىبايلاس جەمقورلىق تاۋەكەلدەرىن جويۋ بويىنشا شارالار قابىلداماعانى, سونداي-اق باعىنىستى قىزمەتكەرلەردىڭ سىبايلاس جەمقورلىق قۇقىق بۇزۋشىلىقتار جاساۋى ءۇشىن مەملەكەتتىك ورگاندار باسشىلارىنىڭ جاۋاپكەرشىلىگى كۇشەيتىلدى.
جەكە تۇلعالاردى سىبايلاس جەمقورلىق قۇقىق بۇزۋشىلىقتارى ءۇشىن اكىمشىلىك جاۋاپكەرشىلىككە تارتۋدىڭ تالاپ قويۋ مەرزىمى 1 جىلدان 3 جىلعا دەيىن ۇزارتىلدى.
پارا بەرۋگە ۋادە ەتۋ, پارا ۇسىنۋ جانە پارا تالاپ ەتۋ ءۇشىن قىلمىستىق جاۋاپتىلىق ەنگىزىلدى.
اتالعان نورمالار ەكونوميكالىق ىنتىماقتاستىق جانە دامۋ ۇيىمىنا (ەىدۇ) مۇشە بارلىق 38 مەملەكەتتە قولدانىلادى. حالىقارالىق تاجىريبە مۇنداي ارەكەتتەر ءۇشىن قىلمىستىق جاۋاپتىلىق بەلگىلەۋ سىبايلاس جەمقورلىققا مۇلدەم توزبەۋشىلىك مادەنيەتىن قالىپتاستىرۋعا, سونداي-اق قۇقىق بۇزۋشىلىقتاردىڭ قوعامدىق قاۋىپتى سالدارلارى تۋىنداعانعا دەيىن ولاردىڭ جولىن كەسۋگە ىقپال ەتەتىنىن كورسەتەدى. اتالعان نورمالار 2027 جىلعى 1 قاڭتاردان باستاپ قولدانىسقا ەنگىزىلەدى.
تۇرمىستىق سىبايلاس جەمقورلىققا قارسى ءىس-قيمىل بولىگىندە ازاماتتاردىڭ كۇندەلىكتى ومىرىنە تىكەلەي اسەر ەتەتىن اۋرۋحانالاردا, مەكتەپتەردە, جوعارى وقۋ ورىندارىندا, بانكتەردە جانە كوممۋنالدىق قىزمەت كورسەتۋ ۇيىمدارىندا ورىن الاتىن قۇقىق بۇزۋشىلىقتارعا ەرەكشە نازار اۋدارىلدى. وسى ۇيىمداردىڭ قىزمەتكەرلەرى تاراپىنان ءىرى مولشەردە نە قورقىتىپ الۋ جولىمەن زاڭسىز سىياقى العانى ءۇشىن جاۋاپتىلىق كۇشەيتىلدى.
اتالعان ۇيىمداردىڭ قىزمەتكەرلەرىنە زاڭسىز سىياقى بەرگەنى ءۇشىن قىلمىستىق جاۋاپتىلىق ەنگىزىلدى. سونىمەن قاتار, قىلمىستىق كودەكس زاڭسىز سىياقى الۋعا ارانداتقانى ءۇشىن جاۋاپتىلىقتى كوزدەيتىن جاڭا نورمامەن تولىقتىرىلدى.
سونىمەن قاتار, زاڭدارمەن سىبايلاس جەمقورلىققا قارسى فۋنكتسيالار اراجىگى اجىراتىلدى: ۇلتتىق قاۋىپسىزدىك كوميتەتى سىبايلاس جەمقورلىق قۇقىق بۇزۋشىلىقتاردى انىقتاۋدى جانە تەرگەپ-تەكسەرۋدى جۇزەگە اسىرادى, ال مەملەكەتتىك قىزمەت ىستەرى اگەنتتىگى سىبايلاس جەمقورلىققا قارسى ساياساتتى قالىپتاستىرۋ مەن ىسكە اسىرۋدى قامتاماسىز ەتەدى.
قابىلدانعان زاڭدار سىبايلاس جەمقورلىقتىڭ الدىن الۋعا, جازانىڭ بۇلتارتپاستىعىن قامتاماسىز ەتۋگە جانە قوعامدا ادالدىق پەن پاراساتتىلىق قاعيداتتارىن نىعايتۋعا باعىتتالعان.
ەسكە سالا كەتەيىك, بۇگىن مەملەكەت باسشىسى قىرعىزستاننىڭ جوگوركۋ كەنەشىنىڭ توراعاسى مارلەن ماماتاليەۆتى قابىلدادى. پرەزيدەنت پەن جوگوركۋ كەنەش توراعاسى قازاقستان مەن قىرعىزستاننىڭ ستراتەگيالىق سەرىكتەستىك جانە وداقتاستىق قارىم-قاتىناسىن جان-جاقتى دامىتۋعا بەيىل ەكەنىن راستادى.