قازاقستاندا IT سالاسىن قولداۋ شارالارى ۇزاق مەرزىمگە جالعاسۋى مۇمكىن. جاساندى ينتەللەكت جانە تسيفرلىق دامۋ مينيسترلىگى تەحنولوگيالىق كاسىپكەرلىكتى دامىتۋ ماقساتىندا Astana Hub قاتىسۋشىلارىنا ارنالعان سالىقتىق جەڭىلدىكتەردى 2045 جىلعا دەيىن ساقتاۋ ماسەلەسىن قاراستىرىپ جاتىر, دەپ حابارلايدى Egemen.kz.
ۆەدومستۆو بۇل باستامانى ەكونوميكانى تسيفرلىق ترانسفورماتسيالاۋ ستراتەگياسى اياسىندا جۇزەگە اسىرۋدى جوسپارلادى. وسىعان بايلانىستى Astana Hub رەزيدەنتتەرىن قولداۋدىڭ 2028 جىلدان كەيىنگى پارامەترلەرى ازىرلەنىپ, ولاردى 2045 جىلعا دەيىن ۇزارتۋ كوزدەلگەن.
مينيسترلىكتىڭ مالىمەتىنشە, باستاما قازاقستاننىڭ وڭىرلىك IT-ورتالىق رەتىندەگى پوزيتسياسىن نىعايتىپ, تەحنولوگيالىق كومپانيالار ءۇشىن تۇراقتى ءارى باسەكەگە قابىلەتتى بيزنەس-ورتا قالىپتاستىرۋعا مۇمكىندىك بەرەدى. ۇزاق مەرزىمدى جوسپار جاساندى ينتەللەكت سالاسىنداعى جاھاندىق ۇردىستەردى, ەكسپورتتىق الەۋەتتى كەڭەيتۋدى جانە جوعارى تەحنولوگيالىق ينۆەستيتسيالاردى تارتۋدى ەسكەرەدى.
ۆەدومستۆو Astana Hub تسيفرلىق ەكونوميكانى دامىتۋداعى تيىمدىلىگىن دالەلدەگەنىن اتاپ ءوتتى. سوندىقتان الداعى مىندەتتەردىڭ ءبىرى – قول جەتكىزىلگەن ناتيجەلەردى ساقتاپ قانا قويماي, IT-كومپانيالارعا ۇزاق جىلدارعا ارنالعان دامۋ جوسپارىن قۇرۋعا جاعداي جاساۋ.
«Digital Qazaqstan» جالپىۇلتتىق ستراتەگياسى قابىلداندى
قازىرگى تاڭدا Astana Hub ەكوجۇيەسىندە 2 268 كومپانيا تىركەلگەن. حاب اياسىندا 35 مىڭ جوعارى بىلىكتى جۇمىس ورنى اشىلىپ, 438 ملرد تەڭگە كولەمىندە ينۆەستيتسيا تارتىلعان. سونىمەن قاتار وتاندىق IT-شەشىمدەردىڭ ەكسپورت كولەمى 1,9 ملرد دوللارعا جەتكەن.
قازىر مينيسترلىك ساراپشىلار مەن مەملەكەتتىك ورگانداردىڭ قاتىسۋىمەن قولدانىستاعى قولداۋ تەتىكتەرىن تالداپ, ولاردى جەتىلدىرۋ باعىتىندا جۇمىس جۇرگىزىپ جاتىر. نەگىزگى باسىمدىقتار قاتارىندا يننوۆاتسيالىق ورتانى دامىتۋ, ادامي كاپيتالدى كۇشەيتۋ جانە جاساندى ينتەللەكت سالاسىنداعى وزىق تەحنولوگيالاردى ەنگىزۋ بار.
مامانداردىڭ پىكىرىنشە, Astana Hub-تى دامىتۋدىڭ ۇزاق مەرزىمدى ستراتەگياسى قازاقستاندى تەحنولوگيالىق بيزنەس ءۇشىن الەمدەگى ەڭ تارتىمدى ەلدەردىڭ بىرىنە اينالدىرۋعا باعىتتالعان مەملەكەتتىك ساياساتتىڭ ماڭىزدى بولىگى بولماق.