مەيىرىمدى, راحىمدى اللانىڭ اتىمەن باستايمىن!
جارىلقاۋشى ايدا جۇرتقا جەڭىلدىك جاسايىق
قازاقستان مۇسىلماندارى ءدىني باسقارماسى جانە ورتا ازيا مۇفتيلەر كەڭەسىنىڭ توراعاسى, باس ءمۇفتي, شەيح ءابساتتار قاجى دەربىسالىنىڭ مينيسترلىكتەر مەن ءتۇرلى سالالىق مەكەمەلەر جەتەكشىلەرىنە, وبلىس, قالا, اۋدان باسشىلارىنا, كاسىپكەرلەر مەن ەل حالقىنا قاسيەتتى رامازان ايىنا قاتىستى
ۇندەۋى
قۇرمەتتى مۇسىلماندار, وتانداستار! بيىل – سۇيىكتى وتانىمىز ءۇشىن ەرەكشە جىل. ەل تاۋەلسىزدىگىنىڭ 20 جىلدىعى. ءدال وسى ايتۋلى كەزەڭدە ەگەمەن ەلىمىز يسلام ىنتىماقتاستىق ۇيىمىنىڭ تىزگىنىن قولعا الىپ, قازاقتىڭ بايتاق دالاسىنىڭ شەجىرە-تاريحى يسلاممەن بىتە قايناسىپ جاتقاندىعىن ءدۇيىم جۇرتقا پاش ەتۋدە. تاۋەلسىزدىگىمىزدى العالى بەرگى از عانا مەرزىم ىشىندە ەلىمىز اياعىنان تىك تۇرىپ, قارقىندى دامۋ جولىنا ءتۇستى. اللا تاعالانىڭ مەيىرىم-راحىمى ءتۇسىپ, قازاقستان جۇرتى مەرەيلى 20 جىلدىعىن الەم الدىندا ابىرويمەن, تولاعاي تابىس جانە بەرەكە-بىرلىك, ىنتىماقپەن قارسى الىپ وتىر. نەبارى 20 جىلدا عاسىرعا تاتىرلىق وراسان زور ىستەر اتقارىلدى. حالىقارالىق مارتەبەلى ۇيىمدارعا توراعالىق ەتتى. مۇنىڭ قاي-قايسىسى دا ەلىم, جەرىم, حالقىم دەگەن ءاربىر وتانداسىمىزدىڭ ماقتانىش سەزىمى مەن قۋانىشىن تاسىتارى ءسوزسىز. بۇل تابىستاردا كەڭپەيىل دە جومارت حالقىمىزدىڭ بەيبىتشىلىكسۇيگىش دارحاندىعىنىڭ ۇلەسى مول دەپ بىلەمىن. اللا تاعالادان ەلىمىزدىڭ ودان ءارى بيىك بەلەستەرگە كوتەرىلە بەرۋىن تىلەيمىن. مۇمكىندىگى بار وتانداستارىمدى وسىناۋ قاسيەتتى دە, بەرەكەگە تولى ايدا اللا رازىلىعى ءۇشىن يگى ىستەردى مەيلىنشە كوبىرەك جاساۋعا شاقىرامىن. جىل سايىن رامازان ايى كەلۋىمەن ءدۇكەندەر مەن بازارلاردا ازىق-ت ۇلىك باعالارىنىڭ كۇرت قىمباتتاپ كەتەتىنىن كورىپ ءجۇرمىز. بۇل, ارينە, حالىقتىڭ ورىندى نارازىلىعىن تۋعىزادى. ءمۇباراك ايدا كاسىپكەر مۇسىلمان باۋىرلارىمدى جاساعان يەمىزدىڭ مەيىرىمىن تىلەپ, ازىق-ت ۇلىكتىڭ, قوناق ۇيلەر مەن قوعامدىق قىزمەتتەردىڭ باعاسىن 10 پايىزعا جەڭىلدەتۋگە شاقىرامىن. قوعامدىق كولىكتەردە ءجۇرۋ اقىسى, كوممۋنالدىق تولەماقىلار جانە تەلەكوممۋنيكاتسيالىق بايلانىس تاريفتەرى دە وسىلاي تومەندەتىلسە دەيمىز. جۇرتىمىز قاسيەتتى ايدا اللا تاعالانىڭ اشۋى مەن قاھارىن تۋدىرۋعا سەبەپشى اراق-شاراپتان, شاريعاتىمىز تىيىم سالعان باسقا دا حارام ءىس-ارەكەتتەردەن اۋلاق بولسا دەگەن تىلەگىم بار. مەيرامحانالار مەن جيىن-تويلاردا ىشكىلىكتىڭ ەشبىر ءتۇرى ىشىلمەسە, دۇكەندەردە ساتىلماسا. سەبەبى, ارداقتى مۇحاممەد (س.ع.س.) پايعامبارىمىزدىڭ قۇدسي حاديسىندە اللا تاعالا ىشىمدىك ىشكەندى, ىشكىزگەندى, ساتقاندى, ساتىپ العاندى, سونداي-اق ونى جاساپ شىعارعاندى لاعىنەتتەگەن. قاسيەتتى قۇران كارىمدە: «ءاي, يمان كەلتىرگەندەر! اراق ءىشۋ, قۇمار ويناۋ, پۇتتارعا تابىنۋ جانە بال اشاتىن وقتار – لاستىق, شايتاننىڭ iستەرi. مۇراتقا جەتەم دەسەڭدەر ولاردان اۋلاق بولىڭدار», دەلىنگەن («مايدا» سۇرەسi, 90-91 ايات). بۇل ۇندەۋ بارشا ادامزات بالاسىنا مول ريزىق بەرۋشى اللا تاعالانىڭ رازىلىعىنا ءبىزدىڭ جۇرتىمىز مۇنان ءارى قاراي دا بولەنىپ, ساۋابىنا يە بولا بەرسە دەگەن ىزگى ماقساتتان تۋىپ وتىر. ساۋاپتى امالدار جاساۋدىڭ ءساتىن قولدان شىعارىپ المايىق, اعايىن!