استاناداعى №3 كوپسالالى قالالىق بالالار اۋرۋحاناسىندا قىزىلشا دياگنوزىمەن اۋرۋحاناعا جاتقىزىلعان بالالارعا كەزەكتى تەكسەرۋ جۇرگىزىلدى. تەكسەرۋ ناتيجەسىندە اۋرۋ جۇقتىرعان بالالاردىڭ سانى ارتقانى انىقتالىپ وتىر, دەپ جازادى Egemen.kz.
اۋرۋحانانىڭ مەديتسينالىق ءبولىم جونىندەگى ديرەكتور ورىنباسارى روزا وتەگەنوۆانىڭ ايتۋىنشا, 2025 جىلدىڭ قازان ايىنان باستاپ ەلوردادا قىزىلشامەن اۋىراتىن ناۋقاستار سانى ارتقان.
«2025 جىلدىڭ قازان ايىنان بەرى قىزىلشا دياگنوزىمەن تۇسەتىن ناۋقاستار سانى كوبەيدى. گوسپيتاليزاتسيانىڭ ەڭ جوعارى كورسەتكىشى 2025 جىلدىڭ قاراشا-جەلتوقسان ايلارىندا تىركەلدى. بيىل قاڭتاردان باستاپ كورسەتكىش تومەندەگەنىمەن, بۇل دياگنوزبەن بالالار ءالى دە ءتۇسىپ جاتىر», دەدى ول.
اتىراۋدا جۇزدەگەن ادامنىڭ قىزىلشا جۇقتىرعانى حابارلاندى
قازىر ستاتسيوناردا قىزىلشا دياگنوزىمەن 50-دەن استام بالا ەم قابىلداپ جاتىر. ولاردىڭ باسىم بولىگى – بەس جاسقا دەيىنگى بۇلدىرشىندەر. سونىمەن قاتار مەكتەپ وقۋشىلارى مەن ورتا جانە جوعارى وقۋ ورىندارىنىڭ ستۋدەنتتەرى دە بار.
ەكى جاسار اسىلىمنىڭ اناسى بەكزادا ءامىرجانوۆا اۋرۋ اسقىنعاندا عانا ەكپەنىڭ ماڭىزىن تۇسىنگەنىن ايتتى.
«سارسەنبى كۇنى قىزىمنىڭ قىزۋى كوتەرىلدى. بۇل قىزىلشا بولۋى مۇمكىن دەپ ويلاعان جوقپىز. سەنبى كۇنى كەشكە قاراي دەنەسىنە قاتتى بورتپە شىققان سوڭ جەدەل جاردەم شاقىردىق. دارىگەرلەر قىزىلشا ەكەنىن ايتتى. ءبىزدى بىردەن جۇقپالى اۋرۋلار بولىمىنە جاتقىزدى. سول جەردە قىزىلشاعا قارسى ەكپە العان-الماعانىمىزدى سۇرادى. وكىنىشكە قاراي, قىزىما دا, ءتورت جاسار ۇلىما دا ەكپە سالدىرعان جوقپىز. اۋرۋحاناعا تۇسكەننەن كەيىن بالالارىما ەكپە سالدىرماعانىما قاتتى وكىندىم», دەيدى ول.
دارىگەر روزا وتەگەنوۆا ۆاكتسينا قىزىلشا ينفەكتسياسىنىڭ الدىن الۋعا ەداۋىر كومەكتەسەتىنىن ايتتى.
«بالا ەكپە الماعان بولسا, ينفەكتسيا – وتە جۇقپالى. قىزىلشا اسقىنعاندا برونحيت, ءارتۇرلى دەڭگەيدەگى پنەۆمونيا, باسقا اعزالاردىڭ زاقىمدانۋى بولۋى مۇمكىن. اسىرەسە ورتالىق جۇيكە جۇيەسىنە كەرى اسەر ەتۋى مۇمكىن», دەپ ءتۇسىندىردى روزا وتەگەنوۆا.
ەلىمىزدە قىزىلشاعا قارسى ۆاكتسيناتسيا ناۋقانى توقتادى ما؟
ونىڭ ايتۋىنشا, قىزىلشا اۋا-تامشى جولىمەن تارايدى جانە ناۋقاسپەن بايلانىس كەزىندە جۇقتىرۋ ىقتيمالدىعى وتە جوعارى. ماماننىڭ سوزىنشە, قىزىلشاعا قارسى العاشقى ەكپە بالالارعا ءبىر جاسىندا سالىنادى. بۇل – قىزىلشا, قىزامىق جانە پاروتيتكە قارسى بىرىكتىرىلگەن ۆاكتسينا. قازىرگى ەپيدەميولوگيالىق جاعدايعا بايلانىستى باس مەملەكەتتىك سانيتاريالىق دارىگەردىڭ التى ايدان باستاپ بالالاردى قوسىمشا يممۋنداۋ تۋرالى قاۋلىسى كۇشىنە ەنگەن.
«وكىنىشكە قاراي, مۇنداي ەرتە جاستا ۆاكتسينا العانداردىڭ ۇلەسى ءالى دە تومەن. بۇل اتا-انالاردىڭ بالا دەنساۋلىعىنا دەگەن جاۋاپكەرشىلىگىن ارتتىرۋ قاجەت ەكەنىن كورسەتەدى», دەدى دارىگەر.
ايدا بالاەۆا قىزىلشاعا قاتىستى ەپيدەميولوگيالىق احۋالدى ەرەكشە باقىلاۋعا الۋدى تاپسىردى
اۋرۋحانا ماماندارى اتا-انالاردى ۆاكتسيناتسيانى كەيىنگە قالدىرماي, بالالاردى قاۋىپتى ينفەكتسيالاردان ۋاقىتىلى قورعاۋعا شاقىرىپ وتىر.