قازاقستاننىڭ 27 جولاۋشىلار پويىزىنا سپۋتنيكتىك ينتەرنەت قوسىلادى. بۇل تۋرالى ۇكىمەت باسشىسىنىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ دەپۋتاتتىق ساۋالعا بەرگەن جاۋابىندا مالىمدەدى, دەپ حابارلايدى Egemen.kz
ۆەدومستۆو مالىمەتىنشە, بايلانىس OneWeb جانە Starlink سياقتى نەگەوستاتسيونارلىق سپۋتنيكتىك جۇيەلەر ارقىلى قامتاماسىز ەتىلەدى.
بۇدان بولەك, ەل اۋماعىنداعى رەسپۋبليكالىق ماڭىزى بار اۆتوموبيل جولدارىندا بايلانىس ساپاسىن جاقسارتۋ ءۇشىن انتەننا-دىڭگەك قۇرىلعىلار ورناتىلادى. 2027 جىلى وبلىستىق جولدار بويىندا قوسىمشا 243 مۇنارا سالۋ جوسپارلانعان.
جاساندى ينتەللەكت جانە تسيفرلىق دامۋ مينسترلىگى مەن تۋريزم جانە سپورت مينيسترلىگى 50 تۋريستىك نىساندا 4G ءموبيلدى ينتەرنەتىن ەنگىزۋدى قولعا الماق. بۇل جۇمىس 2027-2028 جىلدارى جۇزەگە اسادى.
پويىزداردىڭ قوزعالىسىن رەتتەۋ ءۇشىن Starlink سپۋتنيكتىك جۇيەسى قولدانىلادى
سونداي-اق مينيستر جاۋابىندا تەلەكوممۋنيكاتسيا ينفراقۇرىلىمىنىڭ ينتەراكتيۆتى تسيفرلىق كارتاسى ازىرلەنىپ جاتقاندىعى ايتىلعان.
«بۇل كارتا قازاقستاننىڭ بارلىق اۋماعىندا ۇيالى بايلانىستىڭ (2G, 3G, 4G, 5G) قامتىلۋىن جانە ساپا دەڭگەيىن, سونىمەن قاتار تالشىقتى-وپتيكالىق بايلانىس جەلىلەرىنىڭ بار-جوعىن كورسەتەدى. كارتا ناقتى ۋاقىت رەجيمىندە ەلدى مەكەندەردىڭ, اۆتوموبيل جولدارىنىڭ, تۋريستىك نىسانداردىڭ جانە باسقا دا اۋماقتاردىڭ بايلانىسپەن قامتاماسىز ەتىلۋ دەڭگەيىن انىقتاۋعا, سونداي-اق تومەن ساپالى نەمەسە بايلانىس جوق ايماقتاردى بەلگىلەۋگە مۇمكىندىك بەرەدى. جالپى العاندا, اتالعان باعىتتار بويىنشا جۇمىس جالعاسۋدا جانە ۇكىمەت باقىلاۋىندا تۇر», دەلىنگەن جاۋاپتا.
كتج مالىمەتىنشە, 2026 جىلدىڭ جازعى ماۋسىمىندا قازاقستان تەمىر جولى شامامەن 4,2 ميلليون جولاۋشىنى تاسىمالداۋدى جوسپارلاپ وتىر. وسىعان بايلانىستى بالقاش جانە الاكول باعىتىنا قوسىمشا پويىزدار قاتىناماق.