ەلىمىزدە سۋ رەسۋرستارىن ءتيىمدى باسقارۋعا باعىتتالعان اۋقىمدى جوبا قولعا الىندى. بيىل «قازسۋشار» قاراماعىنداعى 86 سۋارۋ كانالىن تسيفرلاندىرۋ باستالادى, دەپ جازادى Egemen.kz.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە, بۇل جۇمىستار بۇعان دەيىن رەكونسترۋكتسيادان وتكەن نىسانداردا جۇرگىزىلەدى. جوبا شەڭبەرىندە مەحانيكالىق گيدروجاپقىشتار اۆتوماتتاندىرىلىپ, ولارعا سۋ كولەمى مەن دەڭگەيىن ناقتى ەسەپكە الاتىن زاماناۋي قۇرىلعىلار ورناتىلادى. ناتيجەسىندە 502 شاقىرىمنان استام سۋارۋ جەلىسى تسيفرلىق باسقارۋ جۇيەسىنە كوشەدى.
تسيفرلاندىرۋ سۋ ءبولۋدى ءدال جوسپارلاۋعا, شىعىندى ازايتۋعا جانە سۋ پايدالانۋدىڭ اشىقتىعىن ارتتىرۋعا مۇمكىندىك بەرەدى. بۇل اسىرەسە ەگىن شارۋاشىلىعى دامىعان وڭىرلەر ءۇشىن اسا ماڭىزدى.
نۇرجان نۇرجىگىتوۆ, سۋ رەسۋرستارى جانە يرريگاتسيا ءمينيسترى: «كولەڭكەلى» نارىقپەن كۇرەستى كۇشەيتۋ ماڭىزدى
سالاداعى جاڭعىرتۋ جۇمىستارى مۇنىمەن شەكتەلمەيدى. ۆيتسە-مينيستر اسلان ءابدرايموۆتىڭ ايتۋىنشا, بيىل يسلام دامۋ بانكى قولداۋىمەن وڭتۇستىك وڭىرلەردەگى 103 كانال بويىنشا جاڭعىرتۋ جۇمىستارى باستالادى. سونىڭ ناتيجەسىندە 2027 جىلعا قاراي 900 شاقىرىمنان استام كانال قايتا جاڭارتىلىپ, اۆتوماتتاندىرىلادى.
بۇدان بولەك, 2026 جىلدىڭ ءبىرىنشى جارتىسىندا تاعى 263 كانالدىڭ رەكونسترۋكتسياسى مەن اۆتوماتتاندىرىلۋىنا ارنالعان جوبالاۋ-سمەتالىق قۇجاتتامانى ازىرلەۋ اياقتالادى. بۇل الداعى جىلدارى يرريگاتسيالىق ينفراقۇرىلىمدى جۇيەلى تۇردە جاڭعىرتۋعا نەگىز قالايدى.
سۋ رەسۋرستارىن ۇنەمدەپ, ءتيىمدى پايدالانۋ – اۋىل شارۋاشىلىعىنىڭ تۇراقتى دامۋىنىڭ باستى شارتى. جاڭا جوبالار وسى ماقساتقا قول جەتكىزۋدىڭ ناقتى قادامى بولماق.
سۋ رەسۋرستارىن باسقارۋ سالاسىن تسيفرلاندىرۋ تەتىكتەرى قارالدى