ازەربايجاننىڭ جەتەكشى جوعارى وقۋ ورنى – ادا ۋنيۆەرسيتەتىندە كاسپي تەڭىزىنىڭ تايازدانۋى ماسەلەلەرىنە ارنالعان «كاسپي ماسەلەسى: سەبەپتەرى, سالدارلارى جانە شەشىمدەرى» تاقىرىبىندا دوڭگەلەك ۇستەل ءوتتى, دەپ جازادى Egemen.kz.
بۇل ءىس-شارا بيىل 22-24 ساۋىردە استانادا وتەتىن وڭىرلىك ەكولوگيالىق سامميت قارساڭىندا قازاقستاننىڭ ازەربايجانداعى ەلشىلىگىنىڭ باستاماسىمەن ۇيىمداستىرىلدى. دوڭگەلەك ۇستەلگە اكادەميالىق ورتا, عىلىمي-زەرتتەۋ ينستيتۋتتارى, مەملەكەتتىك ورگاندار, ديپلوماتيالىق ميسسيالار جانە حالىقارالىق ۇيىمداردىڭ وكىلدەرى قاتىستى.
اتاپ ايتقاندا, قازاقستاننىڭ ازەربايجانداعى ەلشىسى ءالىم بايەل, ميللي ءماجىلىس دەپۋتاتى, ادا ۋنيۆەرسيتەتىنىڭ پرورەكتورى فاريز يسمايلزادە, ەكونوميكالىق ىنتىماقتاستىق ۇيىمىنىڭ تازا ەنەرگيا ورتالىعىنىڭ اتقارۋشى ديرەكتورى ايسەل ياگۋبوۆا, قر ءسىم ەرەكشە تاپسىرمالار جونىندەگى ەلشىسى ءزۇلفيا سۇلەيمەنوۆا, ازەربايجان رەسپۋبليكاسى ءسىم كليماتتىق ديپلوماتيا دەپارتامەنتىنىڭ ديرەكتورى ەلچين اللاحۆەرديەۆ, سۋ ماسەلەلەرى جانە كليماتتىق ديپلوماتيا سالاسىنداعى باسقا دا جەتەكشى ساراپشىلار ءسوز سويلەدى.
ەكولوگيالىق تۇيتكىلدىڭ ءتۇيىنى قاشان تارقايدى؟
ەلشى ءالىم بايەل ءوز سوزىندە قازاقستان پرەزيدەنتى قاسىم-جومارت توقاەۆتىڭ ەكولوگيا ماسەلەلەرىنە ايرىقشا ءمان بەرىپ كەلە جاتقانىن اتاپ ءوتتى.
«15 ناۋرىزدا قازاقستاندا جاڭا كونستيتۋتسيانى قابىلداۋ جونىندە رەسپۋبليكالىق رەفەرەندۋم وتەدى. اتا زاڭنىڭ جاڭا جوباسىندا ازاماتتاردىڭ تابيعاتتى ساقتاۋ جانە ونىڭ بايلىقتارىنا ۇقىپتى قاراۋ جونىندەگى مىندەتتەرى العاش رەت ايقىندالعان. ال مەملەكەت ادام ءومىرى مەن دەنساۋلىعىنا قولايلى قورشاعان ورتانى قورعاۋدى ماقسات ەتەدى», دەدى ول.
سونداي-اق ەلشى دوڭگەلەك ۇستەل قاتىسۋشىلارىن ءساۋىر ايىندا استانادا وتەتىن وڭىرلىك ەكولوگيالىق سامميت تۋرالى حاباردار ەتتى. ديپلومات قازاقستان پرەزيدەنتى ق.توقاەۆتىڭ بۇۇ جۇيەسى اياسىندا تولىققاندى سۋ ۇيىمىن قۇرۋ جونىندەگى باستاماسى تۋرالى دا ايتىپ بەردى.
«تازا قازاقستان»: اباي ۋنيۆەرسيتەتىنىڭ ستۋدەنتتەرى ىلە-الاتاۋ پاركىمەن ەكولوگيالىق جوبالاردى ىسكە اسىرادى
ايسەل ياگۋبوۆا كاسپي تەڭىزىنىڭ تايازدانۋ سەبەپتەرى مەن ونىڭ جاعالاۋداعى مەملەكەتتەر ءۇشىن سالدارىنا توقتالىپ, بۇل ماسەلەگە حالىقارالىق قاۋىمداستىقتىڭ نازارىن اۋدارۋ قاجەتتىگىن اتاپ ءوتتى. ال ءزۇلفيا سۇلەيمەنوۆا كاسپي ماسەلەلەرىن تالقىلاۋ باستاماسىنا جوعارى باعا بەرىپ, بۇگىنگى كۇنى تەڭىزدىڭ تايازدانۋىن تەك تسيكلدىك ۇدەرىستەرمەن بايلانىستىرۋعا بولمايتىنىن مالىمدەدى. ونىڭ ايتۋىنشا, تەڭىزدىڭ جاعدايىنا جاھاندىق جىلىنۋ ەلەۋلى تەرىس اسەر ەتىپ جاتىر. سونداي-اق ول قازاقستاننىڭ تابيعاتتى قورعاۋ شارالارىنداعى جەتىستىكتەرى تۋرالى ايتىپ بەردى.
ەكولوگيالىق مادەنيەت قالىپتاستىرۋ – تۇبەگەيلى قاعيدات قاتارىندا
دوڭگەلەك ۇستەل بارىسىندا وڭىردەگى ەكولوگيالىق داعدارىستىڭ سەبەپتەرى تالقىلانىپ, ىقتيمال شەشىمدەر بويىنشا پىكىر الماسۋ ءوتتى. قاتىسۋشىلار قورشاعان ورتانى قورعاۋ ماسەلەلەرىن بىرلەسىپ شەشۋ جولىنداعى قازاقستان مەن ازەربايجاننىڭ ءىس-قيمىلدارىنا جوعارى باعا بەردى.