جۋىردا ك.بايسەيىتوۆا اتىنداعى وپەرا جانە بالەت تەاترى ساحناسىندا استانالىق قاليبەك قۋانىشباەۆ اتىنداعى قازاق مۋزىكالىق دراما تەاترى ەل تاۋەلسىزدىگىنىڭ 20 جىلدىعىنا ارناپ «تەرەڭ تامىرلار» اللەگوريالىق دراماسىنىڭ پرەمەراسىن قويدى.
درامانىڭ باس كەيىپكەرىنە ەلباسى بەينەسى الىنعان. قويىلىمنىڭ وقيعا جەلىسى پرەزيدەنتتىڭ استانانىڭ جاسىل بەلدەۋىن ارالاۋىنان باستالادى. جوسپارسىز, اياق استىنان ەلوردا ماڭايىنداعى ورمانعا سوعا كەتۋدى ءجون كورگەن پرەزيدەنت وسى ورمانعا باس-كوز بوپ جۇرگەن عالىممەن, كۇتىپ-باپتاپ ايالاپ ءوسىرىپ جۇرگەن جايناق ورمانشىمەن كەزدەسەدى. ەلباسىنى ورمانشىنىڭ ءىس-ارەكەتى تاڭ قالدىرادى. ورمان ديرەكتورى جايناق شالدىڭ كەي اعاشتاردى بالاداي ماپەلەۋىنە السا, ەندى ءبىرىن جايقالىپ تۇرعانىنا قاراماستان بالتامەن شاۋىپ تاستايتىنىن «جۇقالاپ» جەتكىزەدى. ال ورمانشى بولسا, ونىڭ ءمانىن ءتۇسىنۋ ءۇشىن پرەزيدەنتكە ورمانعا تۇندە جالعىز كەلۋىن سۇرايدى. جانىنداعىلاردىڭ قارسىلىعىنا قاراماستان تۇندە ازاماتپەن بىرگە جايقالعان ورمانعا كەلگەن ەلباسى اعاشتارعا جان ءبىتىپ, ولاردىڭ ادامشا ءسويلەگەنىن كورەدى. ولاردىڭ ءاربىرى بۇگىنگى قوعامدا بولىپ جاتقان وقيعاعا ءوز رەڭ-بوياۋىن بەرە وتىرىپ, ەلباسىمەن پىكىرلەسەدى.
اعاشتار مەن ولاردى كۇتىپ-باققان ورمانشى قارت ارقىلى تاۋەلسىزدىكتى الۋ, ونى نىعايتۋ جولىندا ەلباسىنى قولداۋشىلار دا, اياقتان شالۋشىلار دا بار ەكەندىگىن كورەمىز. وتكەندى كوكسەگەن ەسكى قاراعاش, ەلەسىنىڭ ءوزى كومەسكىلەنگەن كەڭەستىك تۋىستىقتى اڭساعان زارجاقتارمەن اڭگىمە-دۇكەن قۇرىپ, ولارعا كەتكەن ۋاقىتتى زايا كەتتى دەپ ەسەپتەمەي, تۇششىمدى جاۋاپ قايتارادى. ءوزدەرىن ەرەكشە كۇتىمگە الىپ, باپتاپ-ساقتاۋىن مىندەتسىگەن قاراعاش ءوز زامانىنىڭ وتكەنىن بايقاماي دا قالعانعا ۇقسايدى. پرەزيدەنتتىڭ «ناعىز بولماي بارا جاتسا, كوشكە بەرگەن تايىن قايتىپ السىن» دەگەن جاۋابىنا ازەر توقتايدى. الايدا, ساناسى ۋلانعان, ءوزگە اعاشتاردىڭ ماپەلەنگەنىن كورە الماي كوكىرەگىندە قىزعانىش وتى بىقسىعان كەيبىر اعاشتاردىڭ اڭگىمەسى مۇنىمەن بىتپەيدى. ورمانعا نەعۇرلىم تەرەڭىرەك ەنگەن سايىن ەلباسى ولاردىڭ پەيىلىمەن تانىسا باستايدى. جانىنداعىلاردىڭ تىنىسىن تارىلتىپ, بۇتاقتارىمەن قىسقان, قىڭىر بىتكەن اعاشتاردى ەلباسىنىڭ باستاماسىمەن, تاۋەلسىزدىك تاڭىندا وتىرعىزىلعاندىعىن ايتقان جايناق شال ولاردىڭ وتىن رەتىندە دە پايداسى بار ەكەندىگىن ەسكەرتەدى. الايدا, ىزگىلىك پەن ولارعا جاسالعان قايىرىمدىلىق ولاردى وزگەرتەدى دەگەن ويعا بەكىنگەن پرەزيدەنت ولارعا كۇتىم جاساۋدى تاپسىرادى.
ءتۇن قويناۋىندا, ورمان ىشىندە وتەتىن قويىلىم جەلىسى بۇگىنگى كۇننىڭ شىنايى كەلبەتىن اشىپ كورسەتكەن. ساحناداعى كورىنىستى باقىلاي وتىرىپ, «ءار اعاشتىڭ ءوز تىلسىم سىرى» بار ەكەندىگىن ۇعاسىڭ. العاش رەت تاۋەلسىزدىك تاقىرىبى, بۇگىنگى قوعام ماسەلەلەرى, پرەزيدەنتتىڭ ساحنالىق وبرازى قازاق تەاتر ساحناسىندا كوركەم بەينە رەتىندە جاسالعان. جاڭا تۋىندىنىڭ اۆتورى ەركىن جۋاسبەك, ال قويۋشى رەجيسسەرى نۇرلان جۇمانيازوۆ. باستى ءرولدەردەگى ورمانشى شال جايناقتى قازاقستاننىڭ ەڭبەك سىڭىرگەن قايراتكەرى اقىش ومار, ال ەلباسىن قۋاندىق قىستىقباەۆ, ونىڭ كومەكشىسىن سىرىم قاشقاباەۆ ويناپ شىقتى. سپەكتاكل پرەمەراسىنا ساحنا تارلانى ءاسانالى ءاشىموۆ كەلدى. ول قويىلىمنان العان اسەرىمەن «ەگەمەن قازاقستانمەن» ءبولىستى.
– قۋانىشباەۆ اتىنداعى تەاتردىڭ دارىندى ۇجىمىنىڭ ونەرىنە ءتانتى بولدىم. بۇل ۇجىم اكتەرلارىنىڭ ويىنى ماعان ۇنايدى. تاۋەلسىزدىك مەيرامىنا وراي, قالا كۇنى قارساڭىندا ۇسىنىلىپ وتىرعان دراماتۋرگيالىق دۇنيە جاپ-جاقسى دەپ ويلايمىن. پرەزيدەنت ءرولى دە جاقسى شىقتى. حالىققا كەرەك تاقىرىپ. مەن دە جىلى قابىلدادىم, – دەدى ول.
جايناق شالدىڭ بەينەسىن شىنايى الىپ شىققان اقىش ومار دا قويىلىمدى كورۋگە كەلگەن حالىقتىڭ ويىنان شىققاندىعىنا سەنىمىن ءبىلدىردى. «ويتكەنى, مەنىڭ وبرازىم حالىقتىڭ جيىنتىق وبرازى. قاراپايىم حالىقتىڭ ەگەمەندىك الىپ, تاۋەلسىز بولعانىنا, ءوز اۋزىنا ءوزى قول جەتكەنىنە قۋانىشىن بەينەلەيدى. ءوز ءرولىمدى سومداۋعا بارىنشا دايىندالدىم».
سپەكتاكل كۇزگى ماۋسىمنان باستاپ حالىق نازارىنا ۇسىنىلادى. ال رەپەرتۋارعا ەنگەن جاڭا سپەكتاكل پرەمەراسى استانالىق كورەرمەندەر كوڭىلىنەن شىقتى.
ۆەنەرا تۇگەلباي.
سۋرەتتەردى تۇسىرگەن ورىنباي بالمۇرات.