«ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ مۇشەلەرى قوستاناي وبلىسىنىڭ تۇرعىندارىمەن جاڭا كونستيتۋتسيانىڭ نەگىزگى ەرەكشەلىكتەرىن تالقىلادى. ءتۇرلى الاڭداردا وتكەن كەزدەسۋلەرگە زيالى قاۋىم مەن ەتنومادەني بىرلەستىكتەردىڭ وكىلدەرى, ەڭبەك ۇجىمدارى, كاسىپكەرلەر مەن جاستار قاتىستى, دەپ حابارلايدى Egemen.kz.
اتالعان توپ الدىمەن قوستاناي قالاسىندا قوعامدىق ۇيىمدار مەن ازاماتتىق قوعام وكىلدەرىمەن جانە كاسىپكەر ايەلدەرمەن كەزدەستى. جيىنعا 200-گە جۋىق ازامات قاتىستى. اشىق ءارى مازمۇندى اڭگىمە بارىسىندا قاتىسۋشىلار ءوز پىكىرلەرىمەن ءبولىسىپ, كوكەيلەرىندەگى ساۋالدارىن قويدى. جۇرتشىلىق اتا زاڭنىڭ ەل بولاشاعى ءۇشىن ماڭىزى, تاريحي داستۇرلەر ساباقتاستىعى, قوعامنىڭ توپتاسۋى مەن ەلدىڭ دامۋىنداعى رۋحاني قۇندىلىقتاردىڭ الاتىن ورنى تۋرالى ايتتى.
ءىس-شارادا پارلامەنت ءماجىلىسىنىڭ دەپۋتاتى, جالپىۇلتتىق كواليتسيا مۇشەسى ەكاتەرينا سمىشلياەۆا جاڭا كونستيتۋتسيادا ۇلى دالانىڭ مىڭجىلدىق تاريحىنىڭ مادەني كودى بار ەكەنىن ايتتى. ونىڭ ايتۋىنشا, جاڭا كونستيتۋتسياداعى ءبىلىمنىڭ, عىلىمنىڭ جانە يننوۆاتسيانىڭ قۇندىلىقتارى تۋرالى نورمالار وسى سالالاردى بيۋدجەتتەن قارجىلاندىرۋدى نەگىزسىز قىسقارتۋدان قورعايدى.
جامبىل وبلىسىندا كونستيتۋتسيالىق رەفورمانىڭ ساياسي جاڭعىرۋداعى ءرولى تالقىلاندى
«جاڭا كونستيتۋتسيا ادىلەتتى قازاقستاننىڭ بەرىك قۇقىقتىق نەگىزىن قالىپتاستىرادى. ول زاڭ ۇستەمدىگىن نىعايتۋعا, الەۋمەتتىك ادىلەتتىلىكتى قامتاماسىز ەتۋگە جانە ءاربىر ازاماتتىڭ ءوز الەۋەتىن جۇزەگە اسىرىپ, ەل دامۋىنا ۇلەس قوسۋعا جاعداي جاساۋعا باعىتتالعان», دەدى دەپۋتات.
تالقىلاۋ بارىسىندا قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازيەۆا كونستيتۋتسيالىق رەفورمالار مەملەكەت پەن قوعام اراسىنداعى ءوزارا سەنىمدى نىعايتىپ, ازاماتتاردىڭ مەملەكەتتىك ينستيتۋتتارعا دەگەن سەنىمىن ارتتىراتىنىن جانە ازاماتتىق قوعامنىڭ ماڭىزدى شەشىمدەر قابىلداۋعا قاتىسۋىن كەڭەيتەتىنىن اتاپ ءوتتى.
جاڭا كونستيتۋتسيا – ورنىقتى ەكونوميكالىق ءوسىمنىڭ ىرگەتاسى: ولجاس بەكتەنوۆ ينۆەستيتسيالىق احۋال جونىندەگى كەڭەس وتكىزدى
ودان ءارى جالپىۇلتتىق كواليتسيانىڭ جۇمىسى بوروۆسكوە اۋىلىندا جالعاستى. كواليتسيا مۇشەلەرى اۋىل تۇرعىندارىمەن جانە بىرقاتار ەڭبەك ۇجىمىمەن كەزدەسىپ, جاڭا كونستيتۋتسيا جوباسىنىڭ مازمۇنىن جان-جاقتى ءتۇسىندىردى. جيىنعا 300-گە جۋىق تۇرعىن قاتىستى.
ءوز سوزىندە ءماجىلىس دەپۋتاتى, كواليتسيا مۇشەسى ەركىن ءابىل الداعى رەفەرەندۋمنىڭ تاريحي ماڭىزىن ەرەكشە اتاپ ءوتتى. ونىڭ ايتۋىنشا, بۇل ساياسي ناۋقان – ەل دامۋىنىڭ جاڭا كەزەڭىن ايقىندايتىن جاۋاپتى كەزەڭ. رەفەرەندۋم ارقىلى ازاماتتار مەملەكەتتىڭ بولاشاق باعىتىن ايقىنداۋعا تىكەلەي قاتىسىپ, قوعامدىق كەلىسىم مەن ادىلەتتىلىك قاعيداتتارىن نىعايتۋعا ءوز ۇلەسىن قوسادى.
ال ءماجىلىس دەپۋتاتى, كواليتسيا مۇشەسى ايداربەك حودجانازاروۆ پرەامبۋلادا ۇلى دالانىڭ مىڭجىلدىق تاريحىنىڭ ساباقتاستىعى كورىنىس تابۋى مەملەكەتتىڭ بىرەگەيلىگىن ايقىنداپ, دامۋ باعدارىن بەلگىلەيتىنىن جەتكىزدى. ول كەز كەلگەن قۋاتتى مەملەكەتتىڭ تاعدىرى ونىڭ زاڭدارىمەن, تاريحي ساباقتاستىعىمەن جانە حالىقتىڭ اسقاق رۋحىمەن ايقىندالاتىنىن اتاپ ءوتتى.
بۇدان سوڭ كواليتسيا مۇشەلەرى اۋليەكول اۋىلىنداعى اۋداندىق مادەنيەت ۇيىندە تۇرعىندارمەن كەزدەستى. جيىن بارىسىندا اتالعان توپ جوباداعى نەگىزگى نوۆەللالار تۋرالى باياندادى. ءماجىلىس دەپۋتاتى بەرىك بەيسەنعاليەۆ ادام قۇقىعىنا كەپىلدىك بەرۋ اياسى كەڭەيگەنىنە جانە ازاماتتاردىڭ الەۋمەتتىك تۇرعىدا قورعالۋىنا نازار اۋداردى.
سونداي-اق اتالعان توپ قوستاناي وبلىسىنىڭ ليساكوۆسك, توبىل قالالارىندا جانە قارابالىق, فەدوروۆ اۋداندارىندا دا ەڭبەك ۇجىمدارىمەن بىرقاتار كەزدەسۋ وتكىزدى. ونىڭ بارىسىندا ازاماتتار جاڭا كونستيتۋتسيا جوباسى قوعام سۇرانىسىنا جاۋاپ بەرەتىنىن, مەملەكەتتىڭ قۇقىقتىق نەگىزىن نىعايتىپ, ازاماتتاردىڭ ءوزىن دامىتۋىنا قاجەت جاڭا مۇمكىندىكتەرگە جول اشاتىنىن اتاپ ءوتتى. ءىس-شارالارعا قاتىسۋشىلار 15 ناۋرىزدا رەفەرەندۋمعا كەلىپ, قۋاتتى, ادىلەتتى جانە پروگرەسسيۆتى قازاقستان قۇرۋعا باعىتتالعان جاڭا اتا زاڭدى قولداۋعا دايىن ەكەندەرىن ءبىلدىردى.
ەسكە سالا كەتەيىك, «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى 12 اقپاندا قۇرىلدى. ونىڭ قۇرامىنا 5 ساياسي پارتيا مەن شامامەن 300-گە تارتا قوعامدىق ۇيىم كىردى. ولار شامامەن 5 ميلليون قازاقستاندىقتى بىرىكتىرەدى.