اتىراۋدا سوت «Lets School» جەكەمەنشىك مەكتەبىنىڭ ديرەكتورىنا قاتىستى ۇكىم شىعاردى, دەپ حابارلايدى Egemen.kz.
ول جابىرلەنۋشىلەرگە 119 ملن تەڭگە كولەمىندە زالال كەلتىرگەن الاياقتىق ءىسى بويىنشا كىنالى دەپ تانىلدى.
سوت انىقتاعانداي, ديرەكتور سىبايلاسىمەن بىرگە عيماراتتى جالعا الىپ, مەكتەپتى ينتەرنەت پەن Instagram جەلىسىندە جارنامالاعان, اشىق ەسىك كۇندەرىن ۇيىمداستىرعان جانە اتا-انالارمەن وقۋ جىلى ءۇشىن مىندەتتى الدىن الا تولەم شارتىمەن كەلىسىمشارتتار جاساعان. الايدا ولاردىڭ ءبىلىم بەرۋ قىزمەتىن جۇزەگە اسىرۋعا ليتسەنزياسى بولماعان. 2024 جىلدىڭ قىركۇيەگىنەن 2025 جىلدىڭ اقپانىنا دەيىن اتا-انالاردان اقشا العانىمەن, ۋادە ەتىلگەن قىزمەتتەردىڭ تولىق كولەمىن كورسەتپەگەن.
اتا-انالاردىڭ ايتۋىنشا, مەكتەپ ساپالى ءبىلىم, ۇيىرمەلەر, تاماقتانۋ جانە بالالاردى تاسىمالداۋ قىزمەتىن ۋادە ەتكەن. الايدا ساباقتار تۇراقسىز وتكەن, مۇعالىمدەر جۇمىستان شىققان, ليتسەنزيا بولماعاندىقتان بالالار باسقا مەكتەپتەرگە اۋىستىرىلعان. بۇل دەرەكتەر كەلىسىمشارتتار, بانك اۋدارىمدارى جانە تۇبىرتەكتەر ارقىلى راستالعان.
«سوت ديرەكتوردىڭ ارەكەتىن الدىن الا ءسوز بايلاسۋ ارقىلى ادامدار توبى جاساعان, اسا ءىرى مولشەردەگى الاياقتىق دەپ تانىدى. سوتتالۋشىنىڭ قارجىلىق قيىندىقتار مەن قىزمەتتىڭ ءبىر بولىگىن كورسەتكەنى تۋرالى ۋاجدەرى قاراماستان, ونىڭ قاساقانا ارەكەت ەتكەنى دالەلدەندى», دەلىنگەن ۇكىمدە.
رەيسكە كىرگىزبەگەن: Air Astana جولاۋشىعا 500 مىڭ تەڭگە وتەماقى تولەۋگە مىندەتتەلدى
جەڭىلدەتەتىن ءمان-جايلاردى, سونىڭ ىشىندە كامەلەتكە تولماعان بالالارىنىڭ بار ەكەنىن ەسكەرە وتىرىپ, سوت ديرەكتورعا 6 جىل باس بوستاندىعىنان ايىرۋ جازاسىن تاعايىندادى. سونداي-اق ءدال وسىنداي مەرزىمگە باسشىلىق قىزمەت اتقارۋ قۇقىعىنان ايىردى. جابىرلەنۋشىلەردىڭ ازاماتتىق تالاپ-ارىزدارى ءىشىنارا قاناعاتتاندىرىلىپ, كەلتىرىلگەن زالال ورتاق تارتىپپەن وندىرىلەتىن بولادى.
اقمولا وبلىسىندا زاڭسىز بالىق اۋلاعان ەكى تۇرعىن سوتتالدى
ۇكىم زاڭدى كۇشىنە ءالى ەنگەن جوق.