وتكەن جەكسەنبىدە استانا كۇنى مەرەكەسىنىڭ مادەني ءىس-شارالار باعدارلاماسى اياسىندا «استانا-ءبايتەرەك» مونۋمەنتى جانىندا قازاقستان سۋرەتشىلەرىنىڭ رەسپۋبليكالىق سيمپوزيۋمى ءوز جۇمىسىن باستادى.
ەل تاۋەلسىزدىگىنىڭ 20 جىلدىق شەجىرەسىندە ەلىمىزدىڭ ەكونوميكاسى, ءبىلىمى مەن عىلىمى, ونەرى مەن مادەنيەتى عارىشتى قارقىنمەن دامىدى. جاڭا استانانىڭ بۇگىنگى بالاماسىز ءسانى مەن ساۋلەتىنە سۋرەتشىلەر وداعى شىعارماشىلىق ۇجىمىنىڭ قوسقان ۇلەسى مول. قالاداعى «قازاق ەلى», «جەر انا» ەسكەرتكىش-مونۋمەنتتەرى, «اراي» ەتنوساياباعىنداعى مۇسىندىك جوبالار, اباي, بوگەنباي, جانىبەك پەن كەرەي, ءساكەن سەيفۋللين ەسكەرتكىشتەرى قالا بويىنشا لاندشافتىق دەكوراتيۆتىك پىشىندەر, اقوردا, سالتانات سارايى, ءماجىلىس, ۇكىمەت ءۇيى, اكىمشىلىك عيماراتتارى ينتەرەرلەرى قازاقستاندىق سۋرەتشىلەردىڭ كەسكىندەمە تۋىندىلارىمەن بەزەندىرىلسە, «دۋمان» ويىن-ساۋىق ورتالىعىنىڭ, «دجۋنگلي» اتتراكتسيونىنىڭ, كوركەم-دەكوراتيۆتى جۇمىستارى تولىعىمەن استانا قالاسى سۋرەتشىلەرىنىڭ قولىنان شىققان. ال مۇنداي اۋقىمدى شارالاردىڭ ءىس جۇزىنە اسۋى سۋرەتشىلەرگە دەگەن مەملەكەت تاراپىنان كورسەتىلگەن ۇلكەن سەنىم ەكەندىگى ءسوزسىز.
بەينەلەۋ ونەرى بويىنشا الەمدە سيمپوزيۋمدار مەن ءتۇرلى فورۋمدار ۇدايى ۇيىمداستىرىلىپ وتىرادى. وسى جىلدىڭ وزىندە 330-دان اسا ماڭىزدى سيمپوزيۋمدار, كونفەرەنتسيالار, كورمەلەر مەن فورۋمدار وتكىزۋ ءىسى جوسپارلانعان. سول شارالاردىڭ بىرەگەيى – قازاقستان سۋرەتشىلەرىنىڭ رەسپۋبليكالىق سيمپوزيۋمى. ونى وتكىزۋدەگى باستى ماقسات – بەينەلەۋ ونەرىن ناسيحاتتاۋ, قالا تۇرعىندارى مەن قوناقتارىن رەسپۋبليكامىزدىڭ بارلىق وبلىستارىنان كەلگەن سۋرەتشىلەر شىعارماشىلىعىمەن تانىستىرۋ, سۋرەتشىلەر اراسىندا ءتاجىريبە الماستىرۋ.
ەلىمىزدىڭ 14 وبلىسىنان كەلگەن 22 قىلقالام شەبەرلەرى قاتىسقان سيمپوزيۋمدا پارلامەنت سەناتىنىڭ دەپۋتاتى عاريفوللا ەسىم: «ادام ومىرگە كەلگەندە اسەمدىككە قۇشتار بولادى عوي. بىراق, وسە كەلە سول اسەمدىككە قۇشتار قاسيەتتى ءوز بويىندا ساقتاي الادى ما؟ كوپ جاعدايدا ساقتاي الماي قالامىز. سول ءبىر جاقسى داعدىنى بويىندا ۇستاپ قالاتىن ادامداردىڭ توبىن سۋرەتكەرلەر قۇرايدى. سوندىقتان دا ءبىز سىزدەرگە باس يەمىز», – دەسە, سۋرەتشىلەر وداعى باسقارماسىنىڭ توراعاسى بايتۇرسىن ءومىربەكوۆ: «استانا قالاسىنىڭ اكىمشىلىگى, مادەنيەت باسقارماسى ۇيىمداستىرىپ وتىرعان وسىناۋ شارانىڭ ماڭىزى وتە زور. قولعا الىنىپ وتىرعان جاڭا باستامانىڭ اياعى كەرەمەت شارالارعا ۇلاسادى دەپ ويلايمىن. مۇنداي ىزگى باستامالار مادەنيەتتىڭ دامۋىنا ىقپال ەتەتىن ءبىردەن-ءبىر سارا جول», – دەدى.
سۋرەتشىلەر وداعىنىڭ شىعارماشىلىق ۇجىمى حالىقارالىق, رەسپۋبليكالىق دەڭگەيدەگى كورمەلەرگە, بايقاۋلارعا, سونداي-اق سيمپوزيۋمدارعا قاتىسىپ, ەل ءمادەنيەتىن شەت ەلدەرگە تانىتىپ, ابىرويمەن ەڭبەك ەتۋدە. بۇل رەتتە, استانا قالاسى سۋرەتشىلەر وداعىنىڭ باسقارما توراعاسى قوڭىر مۇحامەديەۆ 2007 جىلى استانادا الەمنىڭ 12 مەملەكەتىنەن شاقىرىلعان حالىقارالىق تانىمال سۋرەتشىلەر سيمپوزيۋمى ءوتكەندىگىن ايتا كەلە: «بۇگىن تاۋەلسىز قازاقستاننىڭ بارلىق وبلىستارىنان شاقىرىلعان بەينەلەۋ ونەرىنىڭ بەلگىلى قايراتكەرلەرىنىڭ باسىن قوسىپ, شالعايداعى سۋرەتشىلەرىمىزدىڭ ونەرىمەن استانا جۇرتشىلىعىن, قالا قوناقتارىن تانىستىرىپ, ءدۇبىرلى مەرەكەمىزدىڭ تاماشا ءبىر بولىگى رەتىندە ۇيىمداستىرىپ وتىرمىز», – دەپ اتاپ كورسەتتى. سيمپوزيۋمعا قاتىسۋشى ارىپتەستەرىنىڭ جۇمىستارىنا شىعارماشىلىق تابىس, مەرەكەلىك كوڭىل-كۇي تىلەدى.
سيمپوزيۋمعا قاتىسۋشى سۋرەتشىلەردىڭ ءبىر توبى «بايتەرەك» مونۋمەنتى جانىنداعى سۋلى-جاسىل ايماقتا شەبەرلىك مەكتەبىن ءوتكىزسە, ەكىنشى توپ ەسىل وزەنى جاعاسىنداعى «استانا كورىنىستەرى» اتتى پلەنارلىق جۇمىستارعا قاتىستى. 4-ءشى شىلدە كۇنى اتالعان ەكى توپ ورىن اۋىستىردى. 5-ءشى شىلدەدە قىلقالام شەبەرلەرى «تاۋەلسىزدىك جىلدارىنداعى بەينەلەۋ ونەرىنىڭ قالىپتاسۋ كەزەڭى» تاقىرىبىندا دوڭگەلەك ءۇستەل, «تاۋەلسىزدىكتىڭ 20 جىلدىعى» اتتى شەبەرلىك مەكتەبىن ۇيىمداستىرسا, استانا كۇنى مەرەكەسى اتالاتىن 6-شى شىلدەدە سيمپوزيۋمنىڭ سالتاناتتى جابىلۋ ءراسىمى وتەدى دەپ جوسپارلانۋدا. سونداي-اق, شەبەرلىك سىنىبى كونكۋرسى اياسىندا سۋرەتشىلەرگە اقشالاي سىيلىقتار تاپسىرىلاتىن بولادى.
جۇلدىز ءبايدىلدا.