بۇگىنگى عىلىم مەن ءوندىرىستىڭ قاتار دامۋى قاي سالانىڭ بولماسىن باسەكەگە قابىلەتتىلىگىن ارتتىراتىنى انىق. مال ونىمدەرىنىڭ ساپاسى تارازى باسىنا تۇسكەندىكتەن, شارۋالار وزىق تەحنولوگيانى پايدالانۋعا باتىل بەت بۇرعان. ءتورت ت ۇلىك جانە قۇس ەتىنىڭ ساپاسى مەن ەكولوگيالىق تازالىعىنا ۇلەس قوسقان ءوندىرىس ورنىنىڭ جۇمىسى وسىلاي العا باستى دەۋگە بولادى.
ىلە اۋدانى بورالداي كەنتتىك وكرۋگىنىڭ وندىرىستىك ايماعىنا ورنالاسقان «كورموۆيك – ەۆروتەحنولوگيا» سەرىكتەستىگى ءتورت ت ۇلىك مال مەن ءۇي قۇستارىنا قاجەتتى ازىقتىق قوسپا دايىنداۋمەن اينالىساتىن بىردەن-ءبىر كاسىپورىن سانالادى. جىلدىق قۋاتتىلىعى 10 مىڭ توننا. بۇل كاسىپورىن ۇدەمەلى يندۋستريالىق-يننوۆاتسيالىق باعدارلاما اياسىندا قۇلاشىن كەڭگە جايعان. قازىردىڭ وزىندە گوللانديالىق تەحنولوگيامەن جاراقتاندىرىلعان زاۋىت ونىمدەرىن جەتىسۋ ءوڭىرى, جامبىل, وڭتۇستىك قازاقستان جانە شىعىس قازاقستان وبلىستارىنىڭ شارۋالارى تاپسىرىسپەن الۋدا. دايىندالعان دارۋمەندەر مال مەن قۇسقا بەلگىلى رەتسەپتپەن دايىندالادى. سودان سوڭ قۇتى ىدىستارعا, پاكەتتەرگە سالىنىپ, تۇتىنۋشىعا جونەلتىلەدى. سونداي-اق, جەكە تاپسىرىس بەرۋشىلەردىڭ تىلەكتەرى دە نازاردان تىس قالمايتىنىن ايتقان ءجون.
يننوۆاتسيالىق تەحنولوگيانى ەنگىزگەن كاسىپورىن ءونىمى ەلىمىزدىڭ قۇس فابريكالارى, بورداقىلاۋ الاڭدارى مەن تاۋارلى-ءسۇت فەرمالارىندا ۇلكەن سۇرانىسقا يە. زاۋىت ءاربىر اۋىلشارۋاشىلىق قۇرىلىمدارىنا عىلىمي نەگىزدەلگەن ازىق دايىنداسا, قۇراماجەم ميكروەلەمەنتتەرگە, ءدارۋمەندەرگە باي. نەگىزىنەن قوسپالار مالدىڭ كۇيىن جاقسارتادى. اتالعان قوسپانىڭ ءىرى قارا مەن جىلقىنىڭ, قاز, ۇيرەك, ۇندىك, تاۋىق, بالىقتىڭ تەز جەتىلۋى مەن سالماق قوسۋىنا ەرەكشە اسەرى بار. ال وسىندا دايىندالعان ارنايى قوسپا بۇزاۋ مەن ق ۇلىنعا, قوزىعا قاجەتتى انالىق ءسۇتتى الماستىرا الاتىنىن دا ايتقان ءجون.
كاسىپورىندى ىسكە قوسۋعا 200 ملن. تەڭگەدەي قارجى جۇمسالىپتى. ازىقتىق قوسپا جاساۋعا شيكىزاتتىڭ ءبىر بولىگى ەۋروپادان اكەلىنسە, ءبىر بولىگى ەلىمىزدە دايىندالادى. ءدال وسىنداي ءونىم شىعاراتىن كاسىپورىن ەلىمىزدە وسى «كورموۆيك» قانا. سوندىقتان ءونىم وتكىزۋدە ەش كەدەرگى جوق, كەرىسىنشە سۇرانىس كوپ.
– بۇگىنگى باسقارۋ جۇيەسى زاۋىت جۇمىسىن تولىعىمەن قاداعالاۋعا ءمۇمكىندىك بەرەدى. جالپى, مۇنداعى تەحنولوگيا گوللانديالىق ادىسپەن باسقارىلادى. ءبارى اۆتوماتتاندىرىلعان. ادام كۇشى از جۇمسالادى. مەن تەحنولوگ بەرگەن ازىقتى كومپيۋتەرگە سالامىن. ارنايى باعدارلاما بارلىق جۇمىستى ءوزى اتقارىپ شىعادى. ءناتيجەسىندە ءبىز ساپالى ءونىم الامىز, – دەيدى سەرىكتەستىكتىڭ ءوندىرىستىك مەڭگەرۋشىسى سامات شامباەۆ.
زاۋىت ءوزىن جان-جاققا تانىتۋ ءۇشىن 400 توننا ءونىم شىعارۋدى مەجەلەگەن. ال تۇسكەن سۇرانىسقا قاراي تولىق قۋاتتىلىققا كوشەتىن كۇندەر دە الىس ەمەس.
كۇمىسجان بايجان, الماتى وبلىسى.