كەشە بەيبىتشىلىك جانە كەلىسىم سارايىندا سالتاناتتى جاعدايدا اشىلعان ەكىنشى حالىقارالىق «استانا» ەكشن-فيلمدەر فەستيۆالىنە قازاقستان, امەريكا مەن رەسەيدىڭ بەلگىلى كينوجۇلدىزدارى قاتىسۋدا. فەستيۆال شىلدەنىڭ 5-ىنە دەيىن جالعاسادى.
«استانا» ەكشن-فيلمدەر فەستيۆالىنىڭ قالاي دۇنيەگە كەلگەنىن وسى يدەيانىڭ اۆتورى تيمۋر بەكمامبەتوۆ: «اۆتورلىق جانە دەتەكتيۆتى جانردا ءتۇسىرىلگەن فيلمدەرگە ارنالعان فەستيۆالدەر كوپتەپ قولعا الىنسا, ەكشن-فيلمدەرگە مۇنداي اۋقىمدى بىردە-ءبىر شارا ارنالماعان ەكەن. نەگە وسىنى قازاقستاندا جۇزەگە اسىرماسقا دەگەن يدەيا تۋدى دا, سول ۇسىنىسىمىزدى استانا اكىمدىگىنە جەتكىزدىك. قالا اكىمى يمانعالي تاسماعامبەتوۆكە راحمەت, ءسوزىمىزدى جەرگە تاستاماي, مۇنى ويداعىداي جۇزەگە اسىرۋىمىزعا مۇمكىندىك تۋعىزدى.
ەكىنشى كينوفەستيۆال بارىسىندا جۇرتشىلىق بەلگىلى رەجيسسەرلەردىڭ 20-عا تارتا تاماشا كينوتۋىندىلارىن تاماشالاپ, اقش, ەۋروپا, ازيا مەن تمد ەلدەرى رەجيسسەرلەرىنىڭ ونەرىنە قانىعاتىن بولادى. ءتۇرلى ەلدەردىڭ كينەماتوگرافيستەرى قاتىسۋىمەن وتەتىن دوڭگەلەك ۇستەلدەر مەن شەبەرلىك سىنىپتارىنىڭ ونەردەگى بالاۋسا قاناتتارعا كول-كوسىر پايداسى تيەدى دەگەن سەنىمدەمىز», دەپ باياندادى.
مۇحيت اسىپ كەلگەن امەريكالىق قوناقتار مەن رەسەيلىك ونەر تارلاندارىن, قازاقستاندىق تەاتر جانە كينو ونەرىنىڭ شەبەرلەرىن بەيبىتشىلىك جانە كەلىسىم سارايى كىرەبەرىسىنە توسەلگەن قىزىل كىلەممەن قۇرمەتتەپ جۇرت تورگە وزدىردى. كوز الدارىنان ءوتىپ بارا جاتقان مايكل مەدسەن, ارماند اسسانتە سىندى مايتالمانداردان قولتاڭبا الىپ, سۋرەتكە ءتۇسۋدىڭ رەتىن تاۋىپ قالعان جانكۇيەرلەر قۋانىشىندا شەك جوق. ءبىر تۇستا رەسەيلىك رەجيسسەر, جەرلەسىمىز ناتاليا ورىنباساروۆانىڭ بالاسى ەگور كونچالوۆسكي جاستاردىڭ كوڭىلىن قالدىرماي قولتاڭبا بەرىپ جاتسا, قاپتالداسا وتكەن بەلگىلى تەلەجۇرگىزۋشى ەكاتەرينا ستريجەنوۆا جۇرتشىلىق بەيىلىنە رياسىز كوڭىلمەن قول بۇلعاپ بارا جاتتى. دميتري ناگيەۆ, گوشا گۋتسەنكو, كاسىپقوي بوكسشى نيكولاي ۆالۋەۆ جان-جاقتان قاۋمالاعان جاستار توبىنىڭ ىشىنە ەنىپ كەتكەن. گولليۆۋدتىڭ بەلگىلى اكتەرى ستيۆەن سيگال كىلەمگە اياق باسىسىمەن حالىق امەريكانىڭ اتاقتى ونەرپازىنا ەرەكشە كوڭىلمەن قۇرمەت كورسەتكەن. ءبارىن ايت تا, ءبىرىن ايت, فەستيۆال قازاق ۇلتتىق كينو ونەرىنە ۇلكەن جول اشىپ, الەمدىك دەڭگەيگە كوتەرىلۋگە مۇمكىندىك تۋعىزباسا, وسىنشا ۋ-دۋدىڭ ءبارى بوس. سوندىقتان ەكشن-فيلمدەر فەستيۆالىنىڭ باستى ماقساتى دا تۇپتەپ كەلگەندە وسىعان سايادى. وتاندىق كينوونەرىن وركەندەتۋ, دامىتۋ, ايتۋلى تۇلعالاردى قازاقستانعا تارتۋ ارقىلى قازاق كينوسىنىڭ مارتەبەسىن كوتەرۋ بولىپ تابىلادى. سول سەبەپتى دە مەرەكەلىك كىلەمنەن ءاسانالى ءاشىموۆ باستاعان فارحاد ءابدىرايىموۆ, ءامىر قاراقۇلوۆ, باقتيار قوجا, داۋلەت ابدىعاپاروۆ, قارلىعاش مۇحامەدجانوۆا سىندى قازاق كينوسىنىڭ بەلگىلى وكىلدەرى وتكەندە كورسەتكەن جۇرتتىڭ ىقىلاسى الابوتەن. سوڭعى جىلدارى كينو ونەرىنىڭ بويىنا ەپتەپ قان جۇگىرە باستاعانى سەزىلەدى. وسىناۋ تابىسقا ەلىمىزدە وتەتىن كينوفەستيۆالدەردىڭ تيگىزگەن ىقپالى از ەمەس ەكەنىن بايقادىق.
قاراشاش توقسانباي.