ماڭعىستاۋ مالدى ءوڭىر. سونىڭ ىشىندە ەلىمىزگە بەلگىلى اداي جىلقىسىنىڭ الىس جولعا توزىمدىلىگى, كۇي تالعاماي ءوسىپ ونەتىندىگى ءجونىندە اڭگىمە دە كوپ, كوز كورگەندەردىڭ دالەلى دە مول. دەگەنمەن, وسىناۋ ەرەكشە قاسيەتتەر ەش جەردە رەسمي جازىلىپ, كورسەتىلمەپتى.
مىنە, سوعان وراي تۇپقاراعان اۋدانىنا قاراستى اقباستاۋ جەرىندە اداي جىلقىسىنىڭ تولىققاندى تانىلۋىنىڭ العاشقى قادامى رەتىندە «ماڭعىستاۋ وبلىسى اكىمىنىڭ كۋبوگى» ءۇشىن الىس قاشىقتىققا ات سىناعى ۇيىمداستىرىلدى. سىناقتى قازاقستان رەسپۋبليكاسىنىڭ ات سپورتى قاۋىمداستىعى ۇيىمداستىرىپ, ونىڭ تالاپقا ساي ءوتۋىن حالىقارالىق سۋديالار, دارىگەرلەر, عالىمدار مەن اتاقتى مالبەگىلەر باقىلاپ, باعالادى.
شىندىعىندا, بۇل ات بايگەسى ەمەس, اداي جىلقىسىنىڭ شىدامدىلىعىن, توزىمدىلىگىن, ياعني تۇقىمدىق ساپاسىن انىقتاي ءتۇسۋ بولدى. سىناققا 36 ات قاتىستى. ولار 90 شاقىرىمدىق قاشىقتىقتى 30, 30, 20, 10 شاقىرىمنان ءتورت ءبولىپ ءوتتى. ءاربىر بولىكتەن سوڭ مال دارىگەرلەرى, ۆەتەرينارلىق كوميسسيادان قۇرالعان ساراپشىلار ءاربىر اتتىڭ قان قىسىمىن, جۇرەك سوعىسىن, تاعى دا باسقا قاجەت تۇستارىن تەكسەرىپ, 40 مينۋتتىق ءۇزىلىس بەرىپ وتىردى. سىناق ناتيجەسىندە 11 ات جارىستان شىعىپ قالسا, جالپى, ءتورت اينالىم بويىنشا ورتاشا جىلدامدىق ساعاتىنا 18,7 كيلومەتردى قۇرادى. بۇل – ۇلكەن جىلدامدىق دەپ باعالانۋدا.
وسى سالا ماماندارىنىڭ ايتۋىنشا, بۇل سىناق وسى جىلى الماتىدا وتەتىن قازاقستان حالقىنىڭ سپارتاكياداسىنا دايىندىق تا ىسپەتتى. وعان ماڭعىستاۋدان 5 جۇيرىك ات بارادى دەپ جوسپارلانۋدا. سونداعى 80 شاقىرىمدىق سايىستا اداي جىلقىلارىنىڭ باس ءجۇلدەلەر الۋعا ءمۇمكىندىگى بار دەپ بولجاۋعا بولاتىنداي.
قورىتا ايتساق, ماڭعىستاۋدا اتا-بابامىزدىڭ قاناتى بولعان قاسيەتتى تۇلپارلارىمىزدىڭ اسىل تۇقىمدارىن ومىرگە قايتا اكەلۋگە دەگەن قۇلشىنىس سوڭعى جىلدارى عانا پايدا بولدى. وسى شارۋامەن تۇبەگەيلى اينالىساتىن سەنەك جانە قاراعان تۇبەك شارۋاشىلىقتارى اسىل تۇقىمدى جىلقى زاۋىتى رەتىندە جۇمىس جاسايدى. ونداعى جىلقىلار عىلىمي باقىلاۋعا الىنىپ, ەلەكتروندى تۇردە قۇجاتتاندىرىلۋ ارقىلى باعىپ, كۇتىلىپ وتىر.
ايماقتا العاش رەت وتكەن ات سىناعى قازاقتىڭ قۇس قاناتتى جىلقىلارىنىڭ ءبىر تەكتى تۇقىمى رەتىندەگى اداي جىلقىلارىنىڭ ەرەكشە قاسيەتتەرىن تاعى دا ءبىر دالەلدەپ كورسەتۋىمەن ەستە قالعان يگى شارا بولدى.
جولامان بوشالاق.
ماڭعىستاۋ وبلىسى, تۇپقاراعان اۋدانى.