الماتىدا باق بەتتەرىندە ەكونوميكا جانە بيزنەس ماسەلەلەرىن جاريالاپ جۇرگەن قازاق ءتىلدى جۋرناليستەر ءۇشىن اقپاراتتىق ءبىلىم بەرۋ سەمينارى بولىپ ءوتتى. سەميناردى قازاقستان ءباسپاسوز كلۋبىنىڭ قولداۋ كورسەتۋىمەن بايلانىس جانە اقپارات مينيسترلىگى ۇيىمداستىردى. مۇنداعى نەگىزگى ماقسات – قازاق ءتىلدى باق بەتتەرىندە ەكونوميكا ماسەلەلەرىن جاريالاۋ تيىمدىلىگىن ارتتىرۋ, ەكونوميكا تاقىرىبى جونىندە دەرەك كوزىن تابۋ جانە اقپارات ىزدەۋ بويىنشا جۋرناليستەر داعدىسىن دامىتۋ, مەملەكەتتىك ورگاندار ءباسپاسوز قىزمەتى مەن بۇقارالىق اقپارات قۇرالدارىنىڭ سىندارلى ءارىپتەستىگىن قۇرۋ. سەمينار جۇمىسىنا ىسكەرلىك باسىلىم جۋرناليستەرى, «general interest» (جالپى قىزىعۋشىلىق) باسىلىمدارىندا ەكونوميكا ماسەلەلەرىن جاريالايتىن جۋرناليستەر, تۆ جانە اقپاراتتىق اگەنتتىكتەر قىزمەتكەرلەرى مەن بۇقارالىق مەديا سالاسىنىڭ ساراپشىلارى قاتىستى.
سپيكەرلەردىڭ باياندامالارىندا ەلىمىزدەگى ماكروەكونوميكالىق جاعدايعا مەملەكەتتىك اقشا-نەسيە ساياساتىنا جانە وزگە دە ماسەلەلەرگە ەرەكشە نازار اۋدارىلدى. ۇيىمداستىرۋشىلار ماشىقتاندىرۋ جانە ءىس-تاجىريبە ساباقتارىن وتكىزىپ, وندا تىڭ تاقىرىپتار قاراستىرىلدى. ولاردىڭ اراسىندا – اقپاراتپەن جۇمىس جاساۋ, اقپاراتتىڭ سايكەستىلىگىن تەكسەرۋ, ساراپشىلاردى ىزدەۋ, سۇحباتتاسۋ تەحنيكاسى, ەكونوميكالىق جۋرناليستيكاداعى اقپاراتتىق سەبەپتەر, ماتىنمەن جۇمىس جاساۋ اتتى ماسەلەلەر بار.
سوڭعى ۋاقىتتا باق وكىلدەرىنىڭ ىسكەرلىك اقپارات سالاسىندا ءوزىنىڭ بىلىكتىلىگىن ارتتىرۋعا, ەكونوميكا جانە ونىڭ زاڭدىلىقتارى, قۇرالدارى مەن تەتىكتەرى جونىندەگى بىلىمدەرىن جۇيەلەۋگە قاتىستى ۇمتىلىستارى بايقالۋدا, دەپ اتاپ ءوتتى سەميناردى ۇيىمداستىرۋشىلار. ۇيىمداستىرۋشىلار وسى ىسپەتتەس ءىس-شارالاردى وتكىزۋ باق-تاعى مەملەكەتتىك تىلدە جاريالاناتىن ماتەريالداردىڭ ساپاسىن كوتەرۋگە جانە كاسىبي قازاق ءتىلدى جۋرناليستيكانى دامىتۋ ارقىلى باسەكەلەستىك اقپارات الاڭىن قالىپتاستىرۋعا ىقپال ەتەتىندىگىنە سەنىمدىلىگىن ءبىلدىردى.
باقىت بالعارينا.
الماتى.