ەلباسىمىز ەل تاۋەلسىزدىگىنىڭ 20 جىلدىعى قارساڭىندا ءار اۋماق ءومىر سۇرۋگە قولايلى, جۇمىس ىستەپ, دەمالۋعا ىڭعايلى بولىپ كورىكتەنۋى ءتيىس دەگەن بولاتىن. سوعان وراي وتكەن اپتانىڭ سوڭىندا شاكارىم اتىنداعى سەمەي مەملەكەتتىك ۋنيۆەرسيتەتىندە «تاۋەلسىزدىك اللەياسى» اشىلدى.
«تاۋەلسىزدىكتىڭ 20 جىلدىعىنا – 20 جارقىن ءىس» شاراسى اياسىندا جۇزەگە اسىرىلعان يگى ءىس بارىسىندا اتالعان ۋنيۆەرسيتەتتىڭ بارلىق وقۋ عيماراتتارىنىڭ اۋلاسىنا ستۋدەنتتەر كۇشىمەن 1000 كوشەت وتىرعىزىلدى.
وسى ورايدا «جاسىل ەل» رەسپۋبليكالىق قوزعالىسىنىڭ وبلىستىق شتابى سەمەيدە جۇمىس ىستەپ جاتقانىن جانە ونىڭ باسشىسى وسى جوعارى وقۋ ورنىنىڭ جاس وقىتۋشىسى مەرەي شامەنوۆ ەكەندىگىن ايتپاسقا بولمايدى. بۇگىندە ءبىزدىڭ شتاب مۇشەلەرىنىڭ سانى بەس مىڭنان اسىپ وتىرسا, سونىڭ ءۇش مىڭى سەمەي ءوڭىرىنىڭ جاستارى دەيدى ول.
جاسىلەلدىكتەر وزدەرى قۇرىلعاننان بەرگى بەس جىلعا جەتەر-جەتپەس ۋاقىت ىشىندە قاراعايلى ورمان القابىنا 20 مىڭ كوشەت وتىرعىزعانى دا كوڭىل سەرگىتەدى. ايتپەسە, سوڭعى جىلدارداعى ورمان القابىنداعى سوراقىلىقتار شەگىنەن اسىپ كەتكەنى بارشاعا ءمالىم. ال مۇنداي ورنى تولماس ولقىلىقتارمەن قالىڭ كوپشىلىك بولىپ شۇعىلدانباسا, ءىس ىلگەرىلەمەيتىندىگى ايتپاسا دا تۇسىنىكتى.
جاسىلەلدىكتەر ەندىگى رەتتە ەركە ەرتىس ايرىعىنداعى تابيعاتى كوركەم ارالدى قوقىستان تازارتۋمەن اينالىسپاق. ولاردىڭ جۇمىسى بۇدان كەيىن دە توقتاماق ەمەس. ياعني, تابيعات جاناشىرلارىنان تۇراتىن ستۋدەنتتىك وتريادتار ءوز جۇمىسىن جاز بويى جالعاستىراتىن بولادى. ونىڭ ءار مۇشەسى وتكەن جىلى اي سايىن 25-30 مىڭ تەڭگە كولەمىندە اقشا تاپقان بولاتىن. سولايشا بۇل ءىس ەكى جاققا دا ءتيىمدى بولىپ وتىر.
داۋلەت سەيسەن ۇلى.
سەمەي.