ناۋرىز مەرەكەسى كۇندەرى قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى بولگاريا ەلىنە تۇڭعىش رەت گاسترولدىك ساپارمەن بارعالى وتىر. پلوۆديۆ, سوفيا, ۆارنا قالالارىندا 19-26 ناۋرىز ارالىعىندا وتەتىن « ۇلى دالا اۋەندەرى» اتتى كونتسەرتتىك باعدارلامالاردا قۇرمانعازى, تۇركەش, ءشامشى قالداياقوۆ, احمەت جۇبانوۆ, نۇرعيسا تىلەنديەۆ, تولەگەن مۇحامەدجانوۆ سىندى قازاق كومپوزيتورلارىنىڭ كۇيلەرى مەن اندەرى, الەم كلاسسيكتەرى جورج بيزە, انتونيو ۆيۆالدي, يمرە كالمان, يوگانن شتراۋس, اندەرسوننىڭ شىعارمالارى سالتانات قۇرادى. ۇلتتىق اسپاپتار كۇمبىرى بولگار حالقىنىڭ حالىق اندەرى مەن فولكلورلىق شىعارمالارىن دا اۋەلەتەدى.
ۇستىمىزدەگى جىلى قازاقستان مەن بولگاريا اراسىنداعى ديپلوماتيالىق قاتىناستاردىڭ ورناتىلعانىنا 25 جىل تولادى. وسى مەرەيتويعا ورايلاستىرىلعان گاسترولدىك ساپار مادەنيەت جانە سپورت مينيسترلىگى, قازاقستاننىڭ بولگاريا رەسپۋبليكاسىنداعى ەلشىلىگىنىڭ تىكەلەي قولداۋىمەن جۇزەگە اسادى.
گاسترولدىك ساپاردىڭ ماقساتى – ەكى ەل اراسىنداعى ىنتىماقتاستىقتى تەرەڭدەتۋ, مەملەكەتتەر اراسىنداعى مادەني بايلانىستى نىعايتۋ عانا ەمەس, ەلوردادا وتەتىن ەحرو-2017 كورمەسىنىڭ ماڭىزدىلىعىن ايشىقتاۋ بولىپ تۇر.
گاسترولدىك ساپار ناتيجەسى بويىنشا تاجىريبە الماسۋ ماقساتىندا ونەر ۇجىمدارى مەن مەموراندۋمعا قول قويىلىپ, ءوزارا ارىپتەستىكتى دامىتۋ ماقساتىندا جۇمىس جۇرگىزىلەتىن بولادى.
ءىس-شاراعا قۇرمانعازى اتىنداعى وركەسترىمەن قاتار قازاقستاننىڭ ەڭبەك سىڭىرگەن ءارتىسى مايرا مۇحامەدقىزى, قازاقستاننىڭ ەڭبەك سىڭىرگەن قايراتكەرلەرى جەڭىس ىسقاقوۆا, ەرلان رىسقالي, مەملەكەتتىك «دارىن» جاستار سىيلىعىنىڭ يەگەرى باتىرجان مىقتىباەۆ, رەسپۋبليكالىق جانە حالىقارالىق كونكۋرستاردىڭ لاۋرەاتتارى اعايشا جۇرباي, اسەل راقىمجان قاتىسادى. بولگارياعا وركەستردى باس ديريجەر, مەملەكەتتىك «دارىن» جاستار سىيلىعىنىڭ يەگەرى ارمان جۇدەباەۆ پەن ديريجەر, قازاقستاننىڭ ەڭبەك سىڭىرگەن قايراتكەرى جاناس بەكەنتۇروۆ باستاپ بارادى.
ايناش ەسالي,
«ەگەمەن قازاقستان»
الماتى