ەلباسى اقمولا وبلىسىنىڭ اكتيۆىمەن ءوڭىردىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى, دەپ حابارلايدى اقوردانىڭ رەسمي سايتى.
مەملەكەت باسشىسى كەزدەسۋگە قاتىسۋشىلارعا جەرگىلىكتى ءماسليحاتتىڭ كەزەكتەن تىس سەسسياسىندا كانديداتۋراسى ماقۇلدانعان وبلىستىڭ جاڭا اكىمى مالىك ءمىرزاليندى تانىستىردى.
قازاقستان پرەزيدەنتى وبلىس اكتيۆىنە ارناعان سوزىندە بىرقاتار كورسەتكىشتەر بويىنشا, اتاپ ايتقاندا ونەركاسىپ, اۋىل شارۋاشىلىعى ونىمدەرىن ءوندىرۋ, ينۆەستيتسيالار تارتۋ كولەمى, سونداي-اق تۇرعىن ءۇي قۇرىلىسى جونىنەن ءوڭىر ەكونوميكاسى دامي تۇسكەنىن ايتتى.
– اۋقىمدى ءۇش داعدارىستى باستان وتكەرسەك تە, ەلىمىزدەگى تۇراقتىلىقتى ساقتاپ قالدىق جانە ءارى قاراي دامىپ كەلەمىز. ەكونوميكالىق قيىندىقتاردى ەڭسەرۋگە مۇمكىندىك بەرەتىن ۇلتتىق قور جيناقتاي الدىق. ەندى الدىمىزدا الەمنىڭ دامىعان 30 ەلىنىڭ قاتارىنا قوسىلۋ ماقساتىنا قول جەتكىزۋ ءۇشىن «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدى ىسكە اسىرۋ اياسىنداعى جاڭا مىندەتتەر تۇر, – دەدى نۇرسۇلتان نازارباەۆ.
ەلباسى الەمنىڭ جاڭا ناقتى احۋالى جاعدايىندا تەحنولوگيالار قارقىندى دامىپ كەلە جاتقانىن اتاپ ءوتىپ, جولداۋدا كورسەتىلگەن مىندەتتەردى ىسكە اسىرۋ ءۇشىن جاڭا ءبىلىم مەن تاسىلدەردى قولدانۋ قاجەتتىگىنە نازار اۋداردى.
مەملەكەت باسشىسى يندۋستريالاندىرۋ باعدارلامالارىن جۇزەگە اسىرۋدىڭ, ءوڭىر جانە بۇكىل رەسپۋبليكا بويىنشا ينفراقۇرىلىمدى دامىتۋدىڭ ماڭىزدىلىعىنا توقتالدى.
– تاياۋ جىلدارى قازاقستاندا 7 مىڭ شاقىرىم اۆتوموبيل جولدارى سالىناتىن بولادى. وڭىرلەردىڭ بارلىعى جوعارى ساپالى ماگيسترالدار ارقىلى بايلانىسادى. ولار بالالارىمىز بەن نەمەرەلەرىمىز ءۇشىن ماڭگىلىككە قالاتىن بولادى. سونداي-اق, اۋەجايلار قالپىنا كەلتىرىلۋدە. كاسپيدە 2 تەڭىز پورتى سالىنۋدا. ەلىمىزدە جۇزەگە اسىرىلىپ جاتقان بارلىق باعدارلامالار جاڭاشا تاسىلدەردى قولدانۋدى قاجەت ەتەدى, – دەدى قازاقستان پرەزيدەنتى.
سونداي-اق, نۇرسۇلتان نازارباەۆ م.مىرزالينگە وبلىستىڭ اۋىل شارۋاشىلىعى سەكتورىن ودان ءارى دامىتۋعا قاتىستى بىرقاتار مىندەت جۇكتەدى. اتاپ ايتقاندا, مەملەكەت باسشىسى اۋىل شارۋاشىلىعى كووپەراتيۆىن قۇرۋ, عىلىمي الەۋەتتى پايدالانۋ ارقىلى ونىمدىلىكتى ارتتىرىپ, اۋىل شارۋاشىلىعىنا شاعىن نەسيە ءبولۋ, شاعىن جانە ورتا بيزنەستى جانداندىرۋ ارقىلى اگروونەركاسىپ كەشەنىن دامىتۋدىڭ ماڭىزدىلىعىن ايتتى.
ەلباسى الداعى «ەكسپو-2017» حالىقارالىق كورمەسى اياسىندا پايدالانىلاتىن وبلىستىڭ تۋريستىك الەۋەتىن ەرەكشە اتاپ ءوتتى.
سوڭىندا قازاقستان پرەزيدەنتى قاتىسۋشىلارعا بيىلعى استىقتىڭ مول ولۋىن تىلەپ, كوكتەمگى ەگىس جۇمىستارىندا تابىسقا جەتۋلەرىنە نيەتتەستىك ءبىلدىردى.