بۇگىن «استانا» حالىقارالىق قارجى ورتالىعى (احقو) مەن REDmoney Group بىرلەسىپ ۇيىمداستىرۋىمەن IFN تمد فورۋمى ءوتتى.
فورۋمنىڭ نەگىزگى ماقساتى – تمد ەلدەرىندەگى يسلامدىق قارجىلاندىرۋدىڭ دامۋىنا, ايماقتاعى ينۆەستيتسيالىق مۇمكىندىكتەردى زەرتتەۋگە ىقپال ەتۋ, سونىمەن قاتار قاتىسۋشىلارعا ءوزارا بايلانىس قۇرىپ, سەرىكتەستىك قارىم-قاتىناستاردى بەكىتۋگە مۇمكىندىك بەرۋ.
فورۋمدا احقو باسقارۋشىسى ق.كەلىمبەتوۆ, كاتار ۇلتتىق بانكى توراعاسى شەيح ابدۋللا بين ساۋد ال-تاني, جەكە سەكتوردى دامىتۋ جونىندەگى يسلام كورپوراتسياسىنىڭ باسشىسى حاليد ال-ابۋدي, Masraf Al Rayan ديرەكتورلار كەڭەسىنىڭ توراعاسى حۋسسەين الي ال ابدۋللا, كاتار قارجىلىق ورتالىعىنىڭ توراعاسى مايكل رايان, قىرعىز قور بيرجاسى باسقارما توراعاسى ا. سۋلتانوۆ, Qatar Investment Authority كاتار ينۆەستيتسيالىق قورىنىڭ بيزنەستى دامىتۋ دەپارتامەنتىنىڭ ديرەكتورى شەيح ابدۋلازيز بەن الي ال-تاني, رەسەي بانكى توراعاسى كەڭەسشىسى ا.سيمانوۆسكي, قازاقستان دامۋ بانكى توراعاسى ب.جامىشەۆ, Nomura Asset Management باس ديرەكتورى رامليە كامساري, Amundi Islamic اتقارۋشى ديرەكتورى ارساد سينۋن, Nastaq Dubai بيزنەستى دامىتۋ توراعاسى تاحير ماحمۋد, تاتارستان رەسپۋبليكاسى ينۆەستيتسيالىق دامۋ اگەنتتىگى, Bahrain Institute of Banking and Finance, Finance Accreditaion Agency وكىلدەرى جانە ت.ب. قاتىستى.
احقو باسقارۋشىسى قايرات كەلىمبەتوۆ, يسلامدىق قارجىلاندىرۋ احقو جۇمىسىنداعى بەس نەگىزگى باعىتتىڭ ءبىرى, قازىرگى كۇنى وسى باعىتتا يسلام قارجىلاندىرۋى ينستيتۋتتارىنا قۇقىقتىق جانە رەگۋلياتورلىق قولايلى جاعداي جاساۋ ءۇشىن جۇمىس جۇرگىزىلىپ جاتقاندىعىن ايتتى.
جەكە سەكتوردى دامىتۋ جونىندەگى يسلام كورپوراتسياسىنىڭ باسشىسى حاليد ال-ابۋدي يسلام قارجىلاندىرۋىنىڭ تمد-گى مىقتى الەۋەتىنە توقتالىپ, يسلام قارجىلاندىرۋىنىڭ ينفراقۇرىلىمدىق جوبالاردى قارجىلاندىرۋدى ارتاراپتاندىرۋعا مۇمكىندىك بەرەتىنىن ايتتى. ونىڭ ايتۋىنشا, يسلام ميكرونەسيەلەۋى كەدەيشىلىكتەن ارىلۋعا اسەر ەتەتىن نەگىزگى قۇرالداردىڭ ءبىرى.
فورۋم كەزىندەگى «تمد-دەگى يسلام قارجىسى دامۋى جولىنداعى كەدەرگىلەردى ەڭسەرۋ» سەسسياسى كەزىندە ديسسكۋسسيانىڭ قاتىسۋشىلارى ايماقتاعى يسلام قارجىلاندىرۋىنىڭ وسىمىنە باعىتتالعان ءوز ۇسىنىستارىن ايتتى.
«يسلام قارجىلاندىرۋى العىشارتتارىنا سايكەس كاپيتالدى تارتۋ ارقىلى ايماقتىق دامۋعا ىقپال ەتۋ» اتتى سەسسيا كەزىندە تمد ەلدەرى ورتا جانە شاعىن بيزنەس وكىلدەرى يسلام قارجىسىن تارتۋ بويىنشا قانداي تيىمدىلىككە قول جەتكىزە الادى, مۇناي-گاز, ەنەرگەتيكا, اۋىل شارۋاشىلىعى, حالال يندۋستريا سالالارى بويىنشا ايماقتىق رەسۋستاردىڭ دامۋىنا يسلام قارجىسىنىڭ قاندايلىقتى اسەرى بولاتىنى تۋرالى تالقىلادى.
فورۋم كەزىندە ايماقتىق قارجىلىق رەتتەۋشىلەر كەزدەسۋى ءوتىپ, وندا قاتىسۋشىلار قۇقىقتىق جانە نورماتيۆتىك بازا دامۋى ماسەلەلەرىن قاراستىردى. ساراپشىلار, سونىمەن قاتار, يسلام قارجىلاندىرۋىنىڭ ءوسىمىن قامتاماسىز ەتەتىن قوسىمشا ءىس-شارالاردىڭ قابىلدانۋى مۇمكىندىگىن دە ايتتى.