مەملەكەت باسشىسى قاراعاندى وبلىسىنىڭ اكتيۆىمەن ءوڭىردىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى, دەپ حابارلادى اقوردانىڭ ءباسپاسوز قىزمەتى.
كەڭەستە ەلباسى وبلىستىق ءماسليحاتتىڭ دەپۋتاتتارى كانديداتۋراسىن ماقۇلداعان ءوڭىردىڭ جاڭا اكىمى ەرلان قوشانوۆتى تانىستىردى.
نۇرسۇلتان نازارباەۆ جيىنعا قاتىسۋشىلارعا ارناعان سوزىندە ەلىمىزدىڭ جانە قاراعاندى وبلىسىنىڭ ەكونوميكالىق جانە الەۋمەتتىك دامۋ كورسەتكىشتەرىنە توقتالىپ ءوتتى.
– تاۋەلسىزدىك العاننان بەرى بۇل ءوڭىردىڭ ەكونوميكاسى 23 ەسە ءوستى, يندۋستريالاندىرۋدىڭ 72 نىسانى ىسكە قوسىلدى. وبلىسقا سوڭعى 5 جىلدا 1,7 تريلليون تەڭگە ينۆەستيتسيا سالىندى. اپاتتى جاعدايداعى مەكتەپتەر پروبلەماسى جويىلىپ, ءۇش اۋىسىممەن ءبىلىم بەرۋ ماسەلەسى شەشىلۋدە. جول كارتاسى اياسىندا 4 مىڭنان استام ادام جۇمىسپەن قامتىلدى, – دەدى مەملەكەت باسشىسى.
قازاقستان پرەزيدەنتى ەلدەگى ساياسي رەفورمالار ۇدەرىسىنە ەرەكشە نازار اۋدارىپ, پرەزيدەنتتىك ۆەرتيكالدى ساقتاۋدىڭ اسپەكتىلەرىنىڭ جانە مەملەكەتتىك بيلىكتىڭ بارلىق تارماعىنىڭ جاۋاپكەرشىلىگىن ارتتىرۋدىڭ ماڭىزدىلىعىن اتاپ ءوتتى.
سونداي-اق, ەلباسى بىرقاتار وزەكتى مىندەتتەردى ورىنداۋ قاجەتتىگىن ايتىپ, وبلىس تۇرعىندارىن ەلدىڭ ەكونوميكالىق جاڭعىرۋىنا بەلسەنە اتسالىسۋعا شاقىردى.
– ينۆەستيتسيا تارتۋ ءۇشىن قولايلى جاعداي تۋعىزۋ كەرەك. قازاقستان دۇنيەجۇزىلىك بانك رەيتينگىنىڭ «بيزنەس جۇرگىزۋ جەڭىلدىگى» كريتەريى بويىنشا 35-ورىندى يەلەنىپ وتىر. بۇل – جاقسى كورسەتكىش, الايدا بىزگە ەڭ اۋەلى وڭىرلەردەگى جۇمىستى جالعاستىرۋ قاجەت. ءبىز بيزنەس جۇرگىزۋ جەڭىلدىگى بويىنشا وبلىستاردىڭ ارناۋلى رەيتينگىن جاساپ, جىل سايىن يندۋستريالاندىرۋ كۇنى تابىس ەتىلەتىن اتاۋلى سىيلىق تاعايىندايمىز, – دەدى نۇرسۇلتان نازارباەۆ.
سونىمەن بىرگە, مەملەكەت باسشىسى كاسىپكەرلىك اياسىن كەڭەيتۋ, مەملەكەت-جەكەمەنشىك سەرىكتەستىگىن دامىتۋ, اۋىل شارۋاشىلىعىن سۋبسيديالاۋ, «نۇرلى جەر» باعدارلاماسىن ىسكە اسىرۋ, وندىرىلەتىن ونىمدەگى قازاقستاندىق ۇلەستى ارتتىرۋ, سونداي-اق عىلىمي-زەرتتەۋ ينستيتۋتتارىن قاتىستىرۋ ارقىلى ونەركاسىپ سەكتورىن يننوۆاتسيالىق تۇرعىدان دامىتۋ شارالارىنا نازار اۋداردى.
– ءبىز باسەكەگە قابىلەتتى ەكسپورتتىق كاسىپورىندارعا نەگىزدەلگەن يندۋستريالاندىرۋدى جالعاستىرۋعا ءتيىسپىز. تاۋار جەتكىزۋ, قىزمەت كورسەتۋ جانە ولاردى تۇتىنۋ جونىنەن جاھاندىق جۇيەدەن ورنىمىزدى تابۋىمىز قاجەت. بۇل ماقساتقا ترانسۇلتتىق كومپانيالاردى تارتۋ ارقىلى قول جەتكىزە الامىز, – دەدى قازاقستان پرەزيدەنتى.
نۇرسۇلتان نازارباەۆ ەلدەگى اكىمدەر مەن دامۋ ينستيتۋتتارى باسشىلارىنىڭ الدىنا وتاندىق كاسىپورىنداردى ودان ءارى دامىتۋ ءۇشىن ينۆەستورلارمەن جۇمىستى جانداندىرۋ مىندەتىن قويدى.
كەزدەسۋ سوڭىندا قاراعاندى وبلىسىنىڭ جاڭا اكىمى قازاقستان حالقىنا جانە پرەزيدەنتىنە انت بەردى.