قازاقستان رەسپۋبليكاسىنىڭ ءبىلىم جانە عىلىم ءمينيسترى ەرلان ساعاديەۆ ۇكىمەتتە ۇبت-داعى قازاق تىلىنە قاتىستى وزگەرىستەردى ءتۇسىندىردى.
"بيىل قازاق ءتىلىن مەكتەپ تۇلەكتەرىنىڭ 100 پايىزى تاپسىرادى. 12 جىل بويى ورىس مەكتەپتەرىنىڭ تۇلەكتەرى قازاق ءتىلىن ۇبت اياسىندا تاپسىرىپ كەلگەن بولسا دا, ونىڭ ناتيجەلەرى ەسەپكە الىنباعان. ءتىل ءبىلىمىن باعالاۋ ناتيجەلەرى گرانتتى الۋعا ىقپال ەتپەگەن. سونىمەن قاتار, مەكتەپ تۇلەكتەرىنىڭ ءبىر بولىگى قازاق ءتىلىن تەست نەگىزىندە ەمەس, مەكتەپتە ازىرلەنگەن بيلەتتەر بويىنشا تاپسىرعان. ۇبت ەكى كەزەڭگە ءبولىنۋى سەبەپتى, سونداي-اق, بيىلعى مەكتەپ تۇلەكتەرىنىڭ 100 پايىزى قازاق ءتىلىن تاپسىرۋ ماقساتى قويىلىپ وتىرعاندىقتان, اتتەستاتتى الۋ ءۇشىن ءاربىر تۇلەك ەمتيحان تاپسىرىپ, ءتىل ءبىلىمىن تەستىلەۋ قورىتىندىلارى بويىنشا سايكەس باعاسىن الۋى ءتيىس. جوعارى وقۋ ورنىنا بارعان كەزدە قازاق تىلىندە مەكتەپ بىتىرگەن بالالار ۇبت-نى قازاق تىلىندە الىپ وتىر عوي. بيىل ولاردىڭ ۇلەسى - 80-85%. 15 پايىزى بىرىڭعاي تەست رەتىندە قازاق ءتىلىن تاپسىراتىن بولادى", - دەدى مينيستر.