قازاقستاندىق بانكتەر ءۇشىن 2017 جىل اۋىر بولادى. وعان سەبەپ ءىجو كولەمىنىڭ تومەندىگى, تەڭگە باعامىنىڭ ءجيى اۋىتقۋى مەن شيكىزاتتىڭ تومەن قۇنى. مۇنىڭ ءبارى بانك سەكتورىنىڭ وسىمىنە, تابىسى مەن اكتيۆ ساپاسىنا كەرى اسەرىن تيگىزبەك, دەپ جازادى Standart & Poors رەيتينگتىك اگەنتتىگى.
«ءبىزدىڭ پىكىرىمىزشە, قازاقستان بانك سەكتورىنىڭ باستى پروبلەماسى نەسيەلىك تاۋەكەلدىڭ تىم جوعارىلىعى. رەسمي ستاتيستيكاعا سۇيەنسەك, پروبلەمالىق نەسيەلەر كولەمى بانكتەردىڭ نەسيەلىك پورتفەلدەرىنىڭ 25-30 پايىزىنا دەيىن جەتەدى. بۇل بانكتەردىڭ نەسيە نارىعىنىڭ تۇبىنە جەتۋى مۇمكىن. بۇل نەسيەلەر نەگىزىنەن بۇرىنعى جىلدارى بەرىلگەن جانە بۇگىنگە دەيىن وسى ماسەلە شەشىمىن تاپپاي وتىر. ول كەزدە بانكتەردىڭ تۇتىنۋشىلارعا تالابى تىم جۇمساق بولعاندىقتان نەسيە نارىعى وسىنداي پروبلەماعا تاپ بولدى", - دەيدى اگەنتتىك ساراپشىلارى.
S&P مالىمەتىنشە, بانكتەر ءوز بالانستارىن تازالامايىنشا, بانك سەكتورىنداعى جاعداي دۇرىستالمايدى.
«قازىرگى تاڭدا ەل بيلىگى بانك سەكتورىنا تاعى 2 ترلن تەڭگە ءبولۋ ماسەلەسىن قاراپ جاتىر. بۇل پروبلەمالىق نەسيەلەردى جابۋ ءۇشىن بولىنبەك. دەگەنمەن, بۇل قارجى ءىرى جانە ماڭىزدى بانكتەرگە عانا بەرىلمەك. ۇلتتىق بانك سترەسس تەستىلەۋ مەن ساراپتاما جۇرگىزسە, نارىقتا بەلگىسىز بولىپ كەلگەن تالاي پروبلەمالىق نەسيە اشىلار ەدى. جالپى, قازاقستانداعى بانك جۇيەسى مەملەكەتتىڭ قامقورلىعىنا ابدەن مۇقتاج بولىپ وتىر", - دەيدى اگەنتتىك.