فۋتبولدان قازاقستان جاستار قۇراماسى (U18) گراناتكين مەموريالى ءتۋرنيرىنىڭ فينالىندا رەسەي قۇراماسىمەن كەزدەسىپ, 0:1 ەسەبىمەن ەسە جىبەردى.
سانكت-پەتەربۋرگ قالاسىنداعى ماتچ تارتىسقا تولى ءوتتى. ءبىرىنشى تايمنىڭ ورتاسىنا قاراي رەسەيلىكتەر قاقپاشىمەن بەتپە-بەت شىققان, الايدا قازاقستاندىقتىڭ باعى باسىم بولىپ, گولدان امان ساقتاپ قالدى. دەگەنمەن, گراناتكين مەموريالىندا تاجىريبەسى بىزدەن كوش ىلگەرى رەسەي قۇراماسى 27-مينۋتتا جالعىز ءارى جەڭىستى گولدى سوعىپ كەتتى. ناتيجەلى سوققىنىڭ اۆتورى – نيكيتا پولياكوۆ.
كەزدەسۋدىڭ ەكىنشى 45 مينۋتىندا الەكساندر كۋزنەتسوۆتان جاڭا نۇسقاۋلار العان ورەندەرىمىز ادۋىندى شابۋىلدارعا كوشتى. تورەشىنىڭ ىسقىرىعى ەستىلىسىمەن ويىن تىزگىنىن ءوز قولىنا الىپ, دوپتان ايرىلعان تۇستاردا قارسىلاسىن قىسپاققا الۋعا تىرىسىپ باقتى. ۇرىمتال تۇستاردا بىرنەشە قاۋىپتى سوققى باعىتتاپ تا ۇلگەرگەن. بىراق وسىنداي ورايلى ساتتەر جەرلەستەرىمىزدىڭ ۋىسىنان سۋسي بەردى. وكىنىشكە وراي, ماتچ سوڭىنا دەيىن تابلوداعى ەسەپ وزگەرىسسىز قالدى.
سونىمەن قاتار, بۇل كۇنى جارىستىڭ ءۇشىنشى ورنى ءۇشىن سانكت-پەتەربۋرگ پەن گرەكيا كوماندالارى سىنعا ءتۇسىپ, تۋرنير يەلەرى 4:2 ەسەبىمەن جەڭىسكە جەتتى. جەڭىمپاز ۇجىمنان ەفرەم ۆارتانيان (29, 57-مينۋتتاردا), نيكيتا كولدۋنوۆ (44-مينۋت) جانە رۋسلان كازاكوۆ (51-مينۋت) مەرگەندىگىمەن تانىلسا, گرەكتەردەن افاناسيوس كوستاناسيوس (20-مينۋت) پەن گەورگيوس تزوۆاراس (74-مينۋت) كوزگە ءتۇستى.
ايتا كەتەيىك, جاستارىمىز گراناتكين ءتۋرنيرىنىڭ فينالىنا العاش رەت شىعىپ تۇر. بۇعان دەيىن 2012 جىلى سوڭعى, 2014 جىلى 16-ورىنعا يە بولسا, 2015 جىلى 14 كوماندانىڭ اراسىندا 10-ورىنعا ورنالاسقان.