بيىل كوكتەمدە پاۆلودار وبلىسى ەكىباستۇز قالاسىندا كرەمني زاۋىتى سالىنادى. قۇرىلىس جۇمىستارىن باستاۋ مامىر ايىنا جوسپارلانعان, دەپ حابارلايدى وبلىس اكىمدىگىنىڭ رەسمي سايتى.
زاۋىتتىڭ باستاپقى جوباسى بويىنشا ونىڭ وندىرىستىك قۋاتى جىلىنا 35 مىڭ تەحنيكالىق كرەمني بولسا, كەيىن ايماقتاعى ينۆەستيتسيالىق قولايلىلىققا بايلانىستى جوبانىڭ جىلدىق قۋاتىن 135 مىڭ تونناعا دەيىن ۇلعايتۋ كوزدەلگەن.
«ەكىباستۇز قالاسىنداعى №1 ەلەكتر ستانساسىنىڭ جانىنان 70 گەكتار جەر ءبولىندى, – دەدى «ANSA Silicon» جشس-ءنىڭ وكىلى بولات توقتاسىنوۆ. – سونىمەن بىرگە, ءبىز ستانسانىڭ سىرتقى ەلەكترمەن قامتۋ جۇيەسىنە قوسىلۋعا تەحنيكالىق شارت الدىق. ياعني, ءبىز ەلەكتر قۋاتىن «KEGOC» اق-تىڭ جەلىسى بويىنشا ەمەس, تىكەلەي ستانسانىڭ وزىنەن الاتىن بولامىز. سونداي-اق بولىنگەن جەر شيكىزات ورىندارىنا جاقىن ورنالاسقان. كۆارتسيت قاراعاندى وبلىسىنان, مۇناي كوكسى پاۆلوداردان, ال اعاش كەسىندىلەر رەسەيدەن تاسىمالدانادى. بۇل فاكتورلار ءبىزدىڭ ءونىمنىڭ باعاسىنىڭ نارىقتىق باسەكەگە قابىلەتتىلىگىن ارتتىرادى دەپ ۇمىتتەنەمىز».
جوباعا قۇيىلعان ينۆەستيتسيالاردىڭ جالپى كولەمى 38 ميلليارد دوللاردى قۇرايدى. 2019 جىلى كاسىپورىنداعى ءوندىرىستىڭ ءۇشىنشى كەزەڭىن ىسكە قوسقاننان كەيىن 600 جاڭا جۇمىس ورنى قۇرىلادى.