بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆتىڭ قاۋىمدار پالاتاسىنىڭ سىرتقى ىستەر جانە حالىقارالىق دامۋ كوميتەتىنىڭ توراعاسى روبەرت نولتتىڭ باسشىلىق ەتۋىمەن, كانادانىڭ پارلامەنتتىك دەلەگاتسياسىمەن كەزدەسۋى ءوتتى, دەپ حابارلايدى primeminister.kz.
كەزدەسۋ بارىسىندا قازاقستان مەن كانادانىڭ الەۋمەتتىك-ەكونوميكالىق دامۋىنىڭ ءتۇرلى سالالارىنداعى ىنتىماقتاستىقتىڭ كەلەشەگى, سونىڭ ىشىندە اۋىلشارۋاشىلىعى, اگرارلىق ونەركاسىپ, مادەني-گۋمانيتارلىق بايلانىس, ازاماتتىق اۆياتسيا, اەروعارىش جانە اسكەري-ونەركاسىپتىك سالالارداعى ماسەلەلەرى تالقىلاندى.
كەزدەسۋدە باستى نازار 2016 جىلى قۇرىلعان قازاقستان-كانادا ىسكەرلىك كەڭەسى اياسىنداعى ەكى ەلدىڭ بيزنەس-قۇرىلىمدارىنىڭ ءوزارا ءىس-قيمىلىنا اۋدارىلدى. تاراپتاردىڭ پىكىرىنشە, كەڭەس قىزمەتى ەكى ەل اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى جانداندىرۋعا مۇمكىندىك بەرەدى. پرەمەر-مينيستر كانادانىڭ قازاقستاننىڭ ماڭىزدى سەرىكتەسى ەكەنىن ايتىپ ءوتتى. ەكى ەلدىڭ دە جاھاندىق ەكونوميكالىق سىن-تەگەۋرىندەردى ەڭسەرۋدەگى ارەكەتتەرى ينفراقۇرىلىمعا ينۆەستيتسيالاردىڭ ءوسۋى مەن وڭىرلىك جانە جاھاندىق ەكونوميكالىق ىقپالداستىقتى ەسەپكە العاندا سايكەس كەلەتىنىن ايتتى.