عالىمدار حالىقارالىق فۋتبول فەدەراتسياسى (فيفا) ۇزدىك دەپ تانىعان «پەنانگ» كلۋبىنىڭ جارتىلاي قورعاۋشىسى فايز سۋبري سوققان گولدىڭ قۇپياسىن ءتۇسىندىردى. بۇل تۋرالى vesti.kz حابارلادى.
مالايزيالىق فۋتبولشىعا فەرەنتس پۋشكاش اتىنداعى سىيلىق 9 قاڭتار كۇنى شۆەيتساريانىڭ تسيۋريح قالاسىندا وتكەن سالتاناتتى كەشتە تابىستالعان.
بۇل گولدى 29 جاستاعى سۋبري ەل چەمپيوناتىندا «پاحانگ» كومانداسىنا شامامەن 35 مەتر جەردەن بەلگىلەنگەن ايىپ دوبىنان سوققان بولاتىن. ونىڭ باعىتتاعان سوققىسى سوزبەن ايتىپ جەتكىزگىسىز تراەكتوريادا ۇشىپ, الىس توعىزدىققا كىرگەن.
عاجايىپ گول فيزيكا زاڭىمەن تۇسىندىرىلەدى. جىل گولىن سالۋ ءۇشىن مالايزيالىق اياقدوپشىعا «ماگنۋس اسەرى» كومەكتەسكەن. وعان سونداي-اق, مۇنداي سوققى جاساۋ ءۇشىن اۋا رايىنىڭ قولايلىعى مەن قاقپامەن اراداعى قاشىقتىعى دا سەپتىگىن تيگىزىپتى.
العاش رەت «ماگنۋس اسەرىن» نەمىس فيزيگى گەنريح ماگنۋس 1853 جىلى جازعان. بۇل فيزيكالىق قۇبىلىس اينالمالى دەنەنىڭ سۇيىقتىق جانە گاز اعىنى كەزىندە اينالىپ اعۋىنان پايدا بولادى. اينالمالى نىسان ءوز ورتاسىندا قۇيىن ءتارىزدى قوزعالىس جاسايدى. ناتيجەسىندە دەنە تۋرا ۇشپاي, ءوز باعىتىن وزگەرتەدى. فۋتبولشىلاردىڭ اسىرەسە, اينالدىرا سوققى جاساعانىنىڭ قۇپياسىن عالىمدار وسى قۇبىلىسپەن تۇسىندىرەدى.