جەرگىلىكتى ءماسليحات دەپۋتاتتارى حالىق سەنىمىنەن شىعىپ ءجۇر دەپ ايتا الامىز با؟ ءدال ءبىزدىڭ اۋداندا ايتا الماساق كەرەك. اسىرەسە, ەل اۋزىندا سوڭعى دەپۋتاتتار قۇرامى دۇرىس تاڭدالماعان دەگەن اڭگىمەلەر جيىرەك ايتىلىپ قالىپ ءجۇر. سونداي-اق, ومىرلىك تاجىريبەلەرى از, وي-پىكىرلەرى قالىپتاسپاعان دەگەن دالەل-دايەكتەر دە العا تارتىلادى. ايتسا ايتقانداي, ءبىز قاتىسىپ جۇرگەن سەسسيالاردىڭ قاي-قايسىسىندا دا دەپۋتاتتاردىڭ ءۇن-ءتۇنسىز وتىراتىنى شىندىق. كۇن تارتىبىندەگى وزەكتى ءماسەلەلەرگە وزدىگىنەن اشىق پىكىر ايتۋعا نەمەسە ءوز ويىن بىلدىرۋگە ونشا ق ۇلىقتى ەمەس.
ءبىزدىڭ ۇعىمىمىزدا حالىق قالاۋلىلارى ەلدىڭ قامىن جەپ, مۇڭ-مۇقتاجى جولىندا تەر توگە الاتىن, جوعارى بيلىك الدىندا سول حالىقتىڭ ءسوزىن سويلەي الاتىن ەلدىڭ ازاماتى ەمەس پە؟! سونداي-اق, ولار تۇرعىنداردىڭ جەكە ماسەلەلەرى بويىنشا كەستەلى كەزدەسۋلەرىن جۇيەلى وتكىزە بەرمەيدى. وسىنىڭ بارلىعى جەكەلەگەن الىس اۋىلدار سايلاۋشىلارىنىڭ ماسەلەلەرىن شەشۋدە بارىنشا قيىندىق تۋعىزادى. سودان كەيىن تۇرعىندار تاراپىنان نارازىلىق پايدا بولادى, ول ءوز كەزەگىندە وڭىردە الەۋمەتتىك شيەلەنىس تۋىنداتۋى ىقتيمال.
سوڭعى جىلدارى قازاقستان رەسپۋبليكاسى پرەزيدەنتىنىڭ جارلىعىنا سايكەس جەرگىلىكتى اكىمدەر تۇرعىندار جانە ءماسليحات دەپۋتاتتارى الدىندا ەسەپ بەرىپ ءجۇرگەنى بارشامىزعا ايان. الايدا, وسى جەردە شىنىن ايتۋ كەرەك, جەرگىلىكتى تۇرعىندار اكىمدەردىڭ ءىش پىستىرارلىق, ساندارعا تولى ۇزاق-سونار ەسەپتى بايانداماسىن ۇيالعاننان ازەر تىڭدايدى. ال سەنىم ارتقان دەپۋتاتتارىمىز «ءبىرىنىڭ اۋزىنا ءبىرى ءتۇكىرىپ قويعانداي» ءبىر سارىن, جاتتاندى سوزدەردى ايتىپ, جينالىسقا قاتىسۋشىلاردى مەزى ەتەدى.
سوسىن تاعى ءبىر ايتا كەتەتىن جايت, سەسسيا سايىن «اۋداننىڭ قۇرمەتتى ازاماتى» اتاعىن بەرۋ داستۇرگە اينالىپ بارادى. ولاردىڭ باسىم كوپشىلىگى زەينەتكەرلىككە شىققان اكىمقارالار, اراسىنان قاراپايىم ەڭبەك ادامدارىن شاممەن ىزدەسەڭ دە تابا المايسىڭ.
ەل مۇددەسى قاي ۋاقىتتا دا ءبىرىنشى كەزەكتە تۇرۋى ءتيىس ەمەس پە؟! حالىق قالاۋلىلارى سوعان ساي قىزمەت ەتىپ, اماناتقا ادالدىق تانىتىپ جاتسا, نۇر ۇستىنە نۇر بولار ەدى.
اياپبەرگەن ساليحوۆ
اتىراۋ وبلىسى,
يساتاي اۋدانى