الماتىدا 3 مىڭ كورەرمەنگە ارنالىپ سالىنعان «حالىق ارەنا» مۇز ارەناسى دۇنيەجۇزىلىك قىسقى ۋنيۆەرسيادانىڭ باستى نىساندارىنىڭ بىرىنەن سانالادى. مۇندا ستۋدەنتتىك ويىن كۇندەرى حوككەي سايىستارى وتەتىن بولادى. بۇل ۇلكەن سپورت كەشەنىن سالۋ 2014 جىلعى شىلدەدە باستالعان. نىسان قۇرىلىسىن جۇرگىزگەندەردىڭ 60 پايىزىن قازاقستاندىقتار قۇرادى. عيمارات قۇرىلىسى مەجەگە ساي تامىز ايىنىڭ سوڭىندا اياقتالۋعا ءتيىس ەدى. الايدا, ونىڭ مەردىگەرى بولعان «اريا جاڭا استانا» جشس جۇمىستى مەرزىمنەن 2 اي بۇرىن ءبىتىردى.
«حالىق ارەنا» الماتى قالاسىنىڭ مەدەۋ اۋدانىنداعى كۇلجىن جانە تالعار جولدارىنىڭ قيىلىسىندا 11 گەكتار اۋماقتى الىپ جاتىر. عيماراتتىڭ جوباسىن «ارح-سينتەزپروەكت» جشس جاسادى. جوبالاۋشىلاردىڭ ايتۋىنشا, قالانىڭ وسى جەرى ءالسىز شوكپەلى توپىراقتان تۇرادى. سوندىقتان تۇراقتىلىق ءۇشىن قۇرىلىسشىلار 15 مەتر جوعارعى قاباتتى كوتەرىپ, ارنايى باللاستپەن كومگەن. نىساننىڭ ىرگەتاسى مونوليت تەمىربەتوننان, جوعارعى بولىگى مەتالل كونسترۋكتسيادان سوعىلعان. قۇرىلىس بارىسىندا كوبىنە قازاقستاندىق قۇرىلىس ماتەريالدارى, ونىڭ ىشىندە ەنەرگيانى ۇنەمدەيتىن اينەكتەر پايدالانىلعان, تەك شاتىر عانا گەرمانيادا ءوندىرىلگەن ارنايى بولات كاسىبي جابىنمەن جابىلعان.
عيمارات سەيسميكالىق جاعىنان تۇراقتى, ول 9-10 باللعا ەسەپتەلگەن جانە بارىنشا دەربەس جۇمىس جاسايدى. ونىڭ جەكە جىلىتۋ جايى, ءبىرىنشى ساناتتىق ترانسفورماتورلىق شاعىن ستانساسى, سۋ قويمالارى بار. ايماقتاعى جاس كوشەتتەر وزىندىك جەر استى ۇڭعىمادان اۆتوماتتى تۇردەگى سۋعارعىشپەن سۋارىلادى.
«حالىق ارەنا» باس, قوسالقى جانە اكىمشىلىك سياقتى ءۇش بلوكتان تۇرادى. عيماراتتىڭ نەگىزگى وشاعى بولىپ شايبالى حوككەيگە ارنالعان 61ح30 مەتر كولەمىندەگى باستى ارەنا تابىلادى. قاسىندا ۇلكەن حالىقارالىق جارىستاردى وتكىزۋ ءۇشىن مىندەتتى شارت بولىپ تابىلاتىن, ولشەمى دە سونداي قوسالقى جاتتىعۋ ارەناسى ورنالاسقان.
كەشەندە سپورتشىلاردىڭ جارىستى تابىستى وتكىزۋلەرىنە بارلىق جاعداي جاسالعان. جالپى العاندا, حوككەي كوماندالارىنا ارنالعان 12 كيىم اۋىستىرۋ بولمەسى بار, ءاربىر كيىم اۋىستىرۋ بولمەسىندە مەديتسينالىق ماسساج ورنى قاراستىرىلعان.
كيىم اۋىستىرۋ بولمەلەرى جانىندا دۇنيەجۇزىلىك دوپينگكە قارسى اگەنتتىك (WADA) تالاپتارىنا سايكەس دوپينگ-باقىلاۋ سىنامالارىن الاتىن بولمەلەر بلوگى ورنالاسقان. بلوك كۇتۋ بولمەسىنەن, اناليزدەردى قابىلداۋ ءبولمەسى جانە زەرتحانادان تۇرادى. جەكە تورەشىلىك ايماق, كونكيلەردى ۇشتاۋعا ارنالعان ارنايى ورىن, جارىسقا قاتىسۋشىلاردىڭ سپورتتىق فورمالارىن كەپتىرۋگە ارنالعان ورىندار بار. سونىمەن قاتار, سپورتشىلارعا ارنالعان قوسالقى ءۇي-جايلار كارديوجاتتىعۋ قۇرىلعىلارى, كۇش جاتتىعۋ قۇرىلعىلارى جانە دەنەنى كەرۋگە ارنالعان بوس ايماعى بار جاتتىعۋ زالى قىزمەت كورسەتەدى. سونداي-اق, ەكى قاباتتا ارنايى مەديتسينا-قالىپقا كەلۋ ورتالىعى جابدىقتالعان. كليمات-باقىلاۋدىڭ زاماناۋي جۇيەسى جايلى 20-22˚س تەمپەراتۋرانى تولىق قامتاماسىز ەتەدى.
بۇقارالىق اقپارات قۇرالدارى ءۇشىن بارلىق قاجەتتى جاعدايلار جاسالعان. ءباسپاسوز ورتالىعى, باسپاسوز-كونفەرەنتسيالارعا ارنالعان زال, ءباسپاسوز-بار, باسپاسوزگە جانە فوتوگرافتارعا ارنالعان جۇمىس بولمەلەرى بار. باق-قا ارنالعان ارالاس ميكس-ايماق تا قاراستىرىلعان. وندا جۋرناليستەر جارىستارعا قاتىسۋشى-كوماندالار وكىلدەرىمەن سۇحباتتاسا الادى. «حالىق ارەنادا» 4 كوممەنتاتور كابيناسى جابدىقتالعان جانە حالىقارالىق ستاندارتتارعا سايكەس تەلەكورسەتىلىمدەر ءۇشىن جاعدايلار جاسالعان. سىمدىق جانە سىمسىز عالامتور, بولىنگەن بايلانىس ارنالارى بار.
جوبالاۋشىلار ارەنانىڭ كورەرمەندەر ءۇشىن بارىنشا جايلى بولۋى جاعىن دا كوزدەدى. كەشەن اۋماعىندا ىڭعايلى 4 كىرەبەرىس تۇر. جەكە اۆتوكولىكتەر ءۇشىن 250 ورىندىق (ونىڭ ىشىندە 40 ورىن – حالىقتىڭ قيمىلى شەكتەۋلى توبىنا ارنالعان) جەرۇستىلىك تۇراق ءبولىنگەن. جەر استىلى تۇراق ودان دا كوپ كولىك سانىن قامتي الادى, وندا 330 كولىك ورنى قاراستىرىلعان, 20 اۆتوبۋسقا ارنالعان جەكە تۇراق ىسكە قوسىلعان. عيماراتتا 160 وتىرعىزۋ ورىندارى بار, سونداي-اق, كافە جانە 150 ادامدى سىيدىراتىن ەكى كافە-بۋفەت جۇمىس ىستەيدى.
مۇمكىندىگى شەكتەۋلى جاندار ءۇشىن ەرەكشە جاعدايلار جاسالعان. ولارعا ايماقتاعى كرەسلو-اربالارعا بولىنگەن سىزىقتار, پاندۋستار, ارنايى ليفتتەر مەن باس حوككەي زالىنداعى جەكە ورىندار جانە تاعى باسقالار جاتادى.
كورەرمەندەر سپورت جارىستارىنىڭ بارلىق قىزىقتارىن, بەينە قايتالاۋلاردى, ماتىندىك اقپاراتتى مۇز ايدىنىنىڭ ۇستىندە ورنالاسقان الىپ جارىق-ديودتىق بەينەلىك تەكشە ەكرانىنان كورە الادى. «حالىق ارەنانىڭ» زالى ەڭ زاماناۋي جارىقتىق-تەحنيكالىق جانە دىبىس جابدىقتارىمەن قامتاماسىز ەتىلگەن.
جوبالاۋ ساتىسىنىڭ وزىندە وسى زاماناۋي سپورت قۇرىلىمىن ۋنيۆەرسيادادان كەيىن دە پايدالانۋ يدەياسى قويىلعان. كەشەن ءوزىنىڭ بەلگىلەگەن ماقساتى بويىنشا كوپفۋنكتسيونالدى بولىپ تابىلادى. بىرىنشىدەن, مۇندا حوككەيدەن باسقا اۋقىمدى جارىستاردى وتكىزۋ مۇمكىندىگى بار. ارەنا باسقا دا ويىن جانە جەكە سپورت تۇرلەرىنە قاراي وزگەرتىلەدى. ەكىنشىدەن, ەڭ باستىسى سپورتتىق كەشەن بالالىق-جاسوسپىرىمدىك سپورتتى دامىتۋعا, بارلىق قالا تۇرعىندارىن دەنە شىنىقتىرۋعا تارتۋعا ەسەپتەلگەن (مىسالى, قوسالقى سىرعاناق ايدىندا بارشا نيەت بىلدىرگەن ادامدار ءۇشىن كوپشىلىك سىرعاناۋدى ۇيىمداستىرۋ). سونداي-اق, مۇز ارەناسىنىڭ كوپتەگەن سپورتتىق-جاتتىعۋ زالدارى دا ءوز كەلۋشىلەرىن كۇتەدى.
«حالىق ارەنادا» مادەني-كورىنىستىك ءىس-شارالاردى وتكىزۋگە قاراي وزگەرۋ قۇبىلىسى قاراستىرىلعان.
جالپى, «حالىق ارەنا» ساۋلەت كەشەنى رەتىندە جەرگىلىكتى تابيعات كورىنىسىنە ءساتتى ۇيلەسەدى, ول قالانى بولاشاقتا دامىتۋدىڭ ماڭىزدى وشاعى جانە بارلىق قالاۋشىلار ءۇشىن سپورتپەن اينالىسۋ جانە دەمالىس ورنىنا اينالۋى ءتيىس. بولجامدار بويىنشا, ارەنا ءوز اۋماعىنا جىل سايىن شامامەن 150 000 كەلۋشىنى تارتا الادى.
تالعات رايىمبەك,
«ەگەمەن قازاقستان»