دۇنيەجۇزىلىك قىس ۋنيۆەرسيادانىڭ قارساڭىندا قازكوممەرتسبانك (QAZKOM) پەن جاپونياداعى تولەم كارتالاردىڭ ەڭ ءىرى ەميتەنتى مەن ەكۆايەرى سانالاتىن JCB Co., Ltd. (JCB) كومپانياسى قازاقستاندا JCB كارتالاردى قابىلداۋ جوباسىن ىسكە قوستى, دەپ جازادى abctv.kz.
Visa جانە Master Card, سونداي-اق China Union Pay (قحر), American Express پەن Diners Club (اقش) تولەم كارتالارىنا قىزمەت كورسەتەتىن قازكوممەرتسبانك ەندى ءوزىنىڭ ەكۆايرينگتىك جەلىسى ارقىلى جاپوندىق JCB جۇيەسىنىڭ تولەم كارتالارىن قابىلدايتىن بولادى. بۇل الەمنىڭ ءتۇرلى ەلىنەن ۋنيۆەرسياداعا كەلەتىن جانكۇيەرلەردىڭ, سولاردىڭ ىشىندە جاپون ەلىنەن كەلەتىن قوناقتارعا جايلىلىق بەرەدى. ۋنيۆەرسياداعا شاماسى 30 مىڭ شەتەلدىك تۋريست كەلەدى دەپ بولجانعان.
«ءبىز ءتۇرلى حالىقارالىق تولەم جۇيەلەرىمەن ىنتىماقتاستىق قۇرۋعا دايىنبىز جانە مەملەكەتتىڭ قازاقستاننىڭ تۋريستىك پوتەنتسيالىن دامىتۋ ۇمتىلىسىن قولدايمىز. ءبىز ۋنيۆەرسيادانىڭ, سونداي-اق EXPO-2017-گە كەلگەن قوناقتارىنا ءوزىن ەركىن, ءارى جايلى سەزىنۋگە مۇمكىندىك بەرۋ ءۇشىن Qazkom-نىڭ ەكۆايرينگ جۇيەسىنىڭ مۇمكىندىگىن كەڭەيتۋدى جالعاستىرامىز», – دەدى Qazkom-نىڭ باسقارۋشى ديرەكتورى نۇرلان جاعىپاروۆ.
ال, «JCB International Eurasia» جشس-ءنىڭ باس ديرەكتورى تاكاشي سۋەتسۋگۋ (Takashi Suetsugu) اتالعان ۋاعدالاستىق ورتالىق ازيادا JCB كارتالارىن قولدانۋ اياسىنىڭ كەڭەيە تۇسەتىنىنە سەنىمدىلىك ءبىلدىردى.
«بۇل ايماقتىڭ JCB كومپانياسى ءۇشىن ستراتەگيالىق ماڭىزى زور. الەم بويىنشا JCB كارتالارىن ۇستايتىن پايدالانۋشىلاردىڭ, اسىرەسە رەسەيدەن, قىتايدان جانە جاپونيادان قازاقستانعا كەلەتىن كليەنتتەردىڭ سۇرانىسىن ورىندايدى. ءبىزدىڭ قارىم-قاتىناسىمىز قازاقستاندا كارتالىق تولەمدەر كولەمىنىڭ وسۋىنە جانە ءتۋريزمنىڭ دامۋىنا وڭ ىقپال ەتىپ, الەم بويىنشا JCB كارتا ۇستاۋشىلارى ءۇشىن وتە قولايلى بولماق», – دەدى.
قازكوممەرتسبانكتىڭ جاپوندىق JCB جۇيەسىمەن قارىم-قاتىناسى Discover Financial Services كومپانياسى ارقىلى ورنادى. اتالعان كومپانيا 2006 جىلدان بەرى اقش-تا Discover جەلىسىندە JCB كارتالاردىڭ, ال جاپونيادا JCB جەلىسىندە Discover كارتالارىنىڭ قابىلدانۋىن قامتاماسىز ەتەدى.
Discover Financial Services كومپانياسىنىڭ فيليالى - ءوزارا ەسەپ ايىرىسۋمەن اينالىساتىن Discover Global Network ءوز جەلىسىندە قازكوممەرتسبانككە تيەسىلى بارلىق ساۋدا جانە سەرۆيستىك كاسىپورىندارىندا JCB كارتالارىن پايدالانۋ ءۇشىن بارلىق جاعداي جاسايدى.
بانك ءۇشىن تولەم جۇيەسىنىڭ جاڭا برەندى رەتىندە JCB-نىڭ جەلىسىنە قوسىلۋى نارىقتا جاڭا مۇمكىندىكتەردى, ال JCB كومپانياسى ءۇشىن ونىڭ كارتالارىن ۇستايتىن 95,6 ملن كليەنتكە قازاقستاندا تولەم جۇرگىزگەندە كارتانى پايدالانۋعا مۇمكىندىك بەرەدى. الەمنىڭ 21 ەلىندە شىعارىلعان بارلىق JCB-كارتالارى ەندى Discover Global Network ارقىلى قازاقستان ايماعىنداعى «قازكوممەرتسبانكتىڭ» اق جەلىسىندە قابىلداناتىن بولادى.