دۇنيەجۇزىلىك بانك مۇناي مەن وزگە دە شيكىزاتتىق تاۋارلاردىڭ قىمباتتاۋىنىڭ ارقاسىندا جانە برازيليا مەن رەسەي ەكونوميكاسىنىڭ قالپىنا كەلۋى سەبەپتى الەمدىك ەكونوميكانىڭ 2017 جىلى قارقىن الۋىن بولجاپ وتىر.
دۇنيەجۇزىلىك بانكتىڭ الەم ەكونوميكاسىنا جاساعان بولجامىنشا, 2017 جىلعى ناقتى ءجىو ءوسىمى 2,7 پايىزدى قۇراماق. ال 2016 جىلى بۇل كورسەتكىش قارجى داعدارىسى كەسىرىنەن 2,3 پايىز عانا بولعان ەدى.
دامىعان ەلدەردىڭ ءوسىم كورسەتكىشى 2017 جىلى 1,8 پايىز بولادى دەپ كۇتىلۋدە. ال 2016 جىلى بۇل كورسەتكىش 1,6 پايىز بولعان. ال دامۋشى ەلدەر ءۇشىن بىلتىرعى ءوسىم 3,4 پاىز بولسا, 2017 جىلى 4,2 پايىز بولادى دەپ كۇتىلۋدە.
دەگەنمەن, دۇنيەجۇزىلىك بانكتىڭ ءوزى بۇل بايانداماسىندا ايتىلعان مالىمەتتەرگە تولىقتاي كەپىلدىك بەرە الماي وتىر. ويتكەنى, دونالد ترامپتىڭ سىرتقى ساياساتتاعى ۇستانىمدارى مەن اقش ەكونوميكاسىن قاي باعىتقا بۇراتىنى ساراپشىلار تاراپىنان ءالى دە بولسا بىرجاقتى باعالانباي وتىر.
اقش-تىڭ بيىلعى ءجىو ءوسىمى 2,2 پايىز بولادى دەپ كۇتىلۋدە. ال 2016 جىلى بۇل كورسەتكىش 1,6 پايىز بولعان ەدى.
"اقش ەكونوميكاسىنداعى بۇل قارقىندى ءوسىم فەدەرالدى قوردىڭ قارجى-ۆاليۋتا ساياساتىنىڭ ىقپالىنان بولۋى مۇمكىن," - دەلىنگەن باياندامادا.
ال قىتايدىڭ جالپى ىشكى ءونىم ءوسىمىنىڭ كورسەتكىشى 2017 جىلى 6,2 پايىز شاماسىندا بولجانۋدا. ال 2016 جىلى قىتايدىڭ ەكونوميكالىق ءوسىم دەڭگەيى 6,7 پايىز بولعان. قىتاي قارقىنى ازايعانىمەن, وڭتۇستىك-شىعىس ازياداعى يندونەزيا مەن تايلاند باستاعان ەلدەردىڭ ەكونوميكالىق ءوسىمى قارقىن الماق.
ءۇندىستاننىڭ ەكونوميكالىق ءوسىمى 2016 جىلى 7 پايىز بولسا, 2017 جىلى بۇل كورسەتكىش 7,6 پايىزعا ۇلعايادى دەگەن جورامال بار.
ايتا كەتەيىك, قازاقستاننىڭ جالپى ىشكى ءونىمى 2016 جىلى 1 پايىزعا وسسە, 2017 جىلى بۇل كورسەتكىش 2,2 پايىز بولادى دەپ كۇتىلۋدە.