بۇگىن استانا ۋاقىتىمەن تۇنگى 03:00-دە كۇرت تومەندەپ, 53 دوللارعا دەيىن تۇسكەن مۇناي باعاسى تاڭعى سەسسياعا قاراي قايتا قالپىنا كەلە باستادى. وعان سەبەپ بولعان ساۋد ارابياسىنىڭ مۇناي ءوندىرىسىن ازايتقانى تۋرالى مالىمدەمە.
استانا ۋاقىتىمەن كۇندىزگى 15:00-دە برەنت ماركالى مۇناي باعاسى باررەلىنە 54,12 دوللارعا كوتەرىلدى.
ترەيدەرلەردىڭ پىكىرىنشە, ساۋديالىق Saudi Aramco مۇناي كومپانياسى ازيالىق تۇتىنۋشىلارىنا اقپاندا مۇناي ەكسپورتىن ازايتاتىنىن حابارلاپ, بۇل ءوز كەزەگىندە كەلەر ايداعى قارا التىننىڭ فيۋچەرستىك باعاسىنىڭ قىمباتتاۋىنا جول اشتى.
الايدا ەر-ريادتىڭ بۇل باستاماسىنا كارتەلدىڭ وزگە دە مۇشەلەرىنىڭ قوسىلار-قوسىلماسى ءالى دە بەلگىسىز قالىپ وتىر.
وپەك-ءتىڭ ءوندىرىس جاعىنان ەكىنشى ءىرى مۇشەسى يراك باسرا پورتى ارقىلى مۇناي ەكسپورتىن ۇلعايتاتىنى ايتىلۋدا. ناقتىراق ايتار بولساق, اقپاندا وسى پورت ارقىلى ەكسپورت كولەمى تاۋلىگىنە 3,641 ملن باررەلدى قۇراپ, رەكوردتىق كورسەتكىشكە جەتپەك.
قازاقستان ءوز كەزەگىندە وزىنە تيەسىلى 20 مىڭ باررەلدى ازايتقانى ەرتەرەكتە حابارلانعان ەدى.
ەندى قاڭتاردىڭ 21-22 كۇندەرى وپەك+ كوميتەتىنىڭ بەس مۇشەسى ۆەنادا باس قوسىپ, جەلتوقساندا قابىلدانعان كەلىسىمنىڭ جۇزەگە اسىرىلۋ بارىسىن تەكسەرمەك.