الماتىدا وتەتىن 28-ءىنشى قىسقى ۋنيۆەرسيادا ويىندارىنا بايلانىستى قالاداعى 218 مىڭ وقۋشى كەزەكتەن تىس دەمالاتىن بولدى, دەپ حابارلادى ءبىلىم جانە عىلىم مينيسترلىگىنىڭ ءباسپاسوز قىزمەتى.
«الماتىدا ساناۋلى كۇندەردەن كەيىن دۇنيەجۇزىلىك قىسقى وليمپيادا ويىندارى باستالادى. وڭتۇستىك استانا بۇل جارىسقا جان-جاقتى دايىندالىپ جاتىر. دايىندىق ءبىلىم بەرۋ سالاسىن دا سىرت اينالىپ وتپەدى. اتاپ ايتساق, ۋنيۆەرسيادا ويىندارىنا بايلانىستى الماتى قالاسىنىڭ وقۋشىلارى ءۇشىن 30 قاڭتار مەن 8 اقپان ارالىعىندا قوسىمشا دەمالىس بەرىلەدى», - دەلىنگەن حابارلامادا.
حالىقارالىق جارىستار كەزىندە وسىنداي شارالار وزگە ەلدەردە دە قولعا الىنعان. ءباسپاسوز قىزمەتىنىڭ حابارلاۋىنشا, دەمالىسقا شىققان وقۋشىلار دۇنيەجۇزىلىك ستۋدەنتتەر جارىسىن وزدەرى بارىپ تاماشالاي الادى.
«الماتى قالالىق ءبىلىم باسقارماسىنىڭ حابارلاۋىنشا, بۇل قوسىمشا كانيكۋل ناۋرىز مەيرامى كۇندەرىنە اسەر ەتپەيدى. الماتىداعى وقۋشىلار قازاقستاننىڭ باسقا وقۋشىلارىمەن بىردەي 24 ناۋرىز بەن 1 ءساۋىر ارالىعىندا وقۋىن جالعاستىرىپ, 1 ساۋىردە ولارعا توقساندىق باعالار قويىلادى. 4 ساۋىردە 4-ءشى توقسان باستالادى»,-دەپ ناقتىلادى دەرەككوز. حابارلانىپ وتىرعانداي, بۇل وزگەرىس الماتىداعى جوعارى وقۋ ورىندارى مەن كوللەدجدەردىڭ ساباقتار كەستەسىنە اسەر ەتپەيدى.
ايتا كەتەيىك, الماتىدا 201 مەكتەپ بار, وندا 218 مىڭ وقۋشى ءبىلىم الادى.