WBA (Super), IBO, WBC جانە IBF تۇجىرىمدارى بويىنشا ورتا سالماقتا الەم چەمپيونى گەننادي گولوۆكين (36-0, 33 كو) دەنيەل دجەيكوبسپەن (32-1, 29 كو) وتەتىن كەزدەسۋى تۋرالى ءوز پىكىرىن ءبىلدىردى. بۇل تۋرالى vesti.kz حابارلادى.
«شىنى كەرەك, قوبالجىپ ءجۇرمىن. دجەيكوبس – بۇعان دەيىنگى قارسىلاستارىمنىڭ ىشىندەگى ەڭ مىقتىسى. سونداي-اق, ونىڭ كومانداسىندا مەن جۇدىرىقتاسقان ءۇش بوكسشى بار. ال Madison Square Garden مەنىڭ ەكىنشى ءۇيىم سەكىلدى, جانكۇيەرلەردىڭ قولداۋى ەرەكشە كۇش بەرەدى», – دەدى گولوۆكين.
«ءتورت بەلبەۋىم بار, ول كىمنىڭ بولسا دا ارمانى. 18 ناۋرىز كۇنى ورتا سالماقتا كىمنىڭ مىقتى ەكەنىن انىقتاۋىمىز كەرەك, ول وتە ماڭىزدى. بۇل كۇنى تاريحتاعى ۇزدىك شوۋدى كورسەتۋگە ۋادە بەرەمىن», - دەپ مالىمدەدى گولوۆكين.
ايتا كەتەيىك, كەزدەسۋدىڭ بيلەتتەرى 24 جەلتوقساننان باستاپ ساتىلىمعا شىققان. نيۋ-يورك قالاسىنداعى Madison Square Garden ارەناسىندا ءبىر ورىننىڭ ەڭ ارزان قۇنى 100 دوللاردى قۇراسا, ەڭ قىمباتى – 1000 دوللار.