باتىس قازاقستان وبلىسىندا ەلباسىنىڭ 2016 جىلعى 30 جەلتوقسانداعى جارلىعىمەن تاعايىندالعان جاڭا سۋديالار تانىستىرىلدى, دەپ حابارلايدى قازاقپارات.
سىرىم اۋداندىق سوتىنىڭ سۋدياسى بولىپ تاعايىندالعان تايماس كەڭەس ۇلى نيازوۆتى بقو سوتى قىلمىستىق ىستەر جونىندەگى سوت القاسىنىڭ توراعاسى مىندەتىن اتقارۋشى نيازبەك دىلدابەكوۆ تانىستىرىپ, ونىڭ وسى سالادا تاجىريبەسى مول ەكەندىگىن اتاپ ءوتتى. «سىرىم وڭىرىندە ءادىل تورەلىك ەتۋ ءداستۇرى اۋەلدەن قالىپتاسقان. اتاقتى بي سىرىم دات ۇلى, الاش كوسەمى, زاڭگەر جاھانشا دوسمۇحامەدوۆ سىندى بىرەگەي تۇلعالاردى بۇكىل ەل بىلەدى. اۋداننىڭ جاڭا سۋدياسى دا زاڭنىڭ ۇستەمدىگى ءۇشىن ادال ەڭبەك ەتەدى دەپ سەنەمىن», – دەدى اۋدان اكىمى ابات شىنىبەكوۆ.
تايماس نيازوۆ 1979 جىلى قوستاناي وبلىسىندا تۋعان.
سول سەكىلدى بقو بويىنشا سوتتار اكىمشىسىنىڭ باسشىسى راقىمقۇل ايتماعامبەتوۆ ەلباسى جارلىعىمەن تاسقالا اۋداندىق سوتىنىڭ سۋدياسى بولىپ تاعايىندالعان ءاليا تەبەرىكوۆانى اۋدان اكتيۆىنە تانىستىرىپ, جۇمىسىنا ساتتىلىك تىلەدى.
ءا.تەبەرىكوۆا 1998-2005 جىلدارى جەتىسۋ اۋداندىق سوتىنىڭ كۋرەرى, 2005-2008 جىلدارى وسى سوتتىڭ باس مامانى, 2008-2009 جىلدارى الماتى قالالىق ادۆوكاتتار القاسى ادۆوكاتىنىڭ ماشىقتانۋشىسى, 2009-2010 جىلدارى «KB-Agro Company» جشس-ءنىڭ, «Z-Club» جشس-ءنىڭ زاڭگەرى, 2011-2014 جىلدارى الماتى قالاسى مەدەۋ اۋداندىق سوتىنىڭ باس مامانى, 2014-2016 جىلدارى وسى سوت ءماجىلىسىنىڭ حاتشىسى قىزمەتتەرىن اتقارعان.